‘Wiri Nakpinyemu ka Yugopa Ba’
“Da nga Ba, kina Wiriko ini he, na gu ni Wiriko nakpi nyemu ka yugo ho fu ni.”—RK. 10:22.
GAONI KARAGAPAI NGA GINE?
Tipagine Yesu adu ti ni na rengba beko ka yugopa Ba wenengai?
Wai gu Yesu ayugupa Ba fu kura aboro?
Ngba gini agene rengbe ani ka wirika Yesu niyugo ani pa Ba fu kura aboro?
1, 2. Gini sanahe navundo badungu aboro, na tipagine?
‘DA NGA Mbori?’ Gi sanahe re navundo badungu aboro. Nikpiapai, wa vura duhe nga badungu agu aboro du ni aKristano ti kina rimo gbua idi kuti gupai nga Mbori nga Tirinita, badunguyo nagumba gupai nga gi yugopai re ima kpakara ka giarogoyo. Bake buku sa nibarumbatayo rogo pambori agumba gupai nga: “Si nga gu yugopai ka berã boro arengbanga ka berã kuriihe ya. Si dagba agu apai yo rengbe boro ka berã kuriihe te.” Ono tipa agu aboro naida kuti gu yugopai tigayo nga ahe akuru nisaha, i nagumba gupai nga Mbori ti ni te. I nagumba gupai nga gu kusikusi ahe dunduko ani abihe re akuru mbiko kungbo mamu gbua. Wa vura duhe wo, kuba gupai nga Charles Darwin gumba gupai nga Mbori ti ni te, ko agumba gupai nga: “Kuti re tigimi, gu yangara wene digisopai da mi kutini nga, gu gene ahe akuru ngbaha, boro ho rengbe ka gia tiní nani te.”
2 Wa vura duhe nga aboro na gayo aida nibakiakia, dunguyo naberã kurii agu apai du tipa padu Mbori ti ni. Ono tie, ka i gbata karagapai vurũ ka i adanga kuti wene digisopai ya, dunguyo nambu berã kurii agu apai du tipa Mbori. Nirengo, Satana ima ‘kiso bera azanga idapase.’ (2 Kor. 4:4) Si nga ndu gupai adunga badungu aboro ti ni na inohe tipa Ba, nga Bakusi zegino ya!—Yes. 45:18.
3. (a) Da nayugupa Bakusiahe furani? (b) Gini asanahe ani nika makiapai kuriihe?
3 Ono tie, si ninyanyakipa pai tipa aboro wiriki gu rengo du tipa Mbori. Tipagine? Bambiko kina “gu ni ka kpari ni rimo Gbia ni bati abata.” (Rom. 10:13) Yamba rimo Mbori nakoda ino gu boro du gu rimo re kurini. Yesu aima fu gu nyanyakipa inohe re fu gako abawiriki. Ko aima yugopa Ba fuyo. (Oni gedi Ruka 10:22.) Tipagine kina Yesu adu ti ni na rengba beko ka yugopa Ba susi wai kura boro arengbe ka mangaha? Wai gu Yesu amangihe? Na wai gu rengbe ani ka wirika Yesu niyugo ani Ba fu kura aboro? Ani makianga pai kurii agi asanahe re.
YESU KRISTO ADU NA KPARAKPARA RENGBA BEKO KA YUGOPA BA
4, 5. Tipagine kina Yesu adu ti ni na rengba beko ka yugopa Ba wenengai?
4 Kina Yesu sa naadu na rengba beko tipa ka yugopa Ba. Tipagine? Bambiko mbata fu i kusi kura ahe dunduko, gu boro nitoro naye kada kusa ni Yesu aima du ti ni ni gu “bangisa vungu” nga ga Mbori. (Yo. 1:14; 3:18) Nairiwo gu mamu ko adu nani re! Baraho kura kusikusi boro aadunga ni ya, kina ko sa berã Ba adu kutiko na ko ki wiriki apai tipa Ko na Gako asino. Gi Ba na Wiri re aima fura tigaha wenengai na ki sonosi dawedawe nyemuse dagbatiyo tipa dungu agarã. (Yo. 5:20; 14:31) Wiri aima mangasunge na gi regbo re tipa ka wirikapai wenengai tipa asino Ba.—Oni gedi Akorosaio 1:15-17.
5 Ba aʹasia Wiri ko du nibagumba “Ga Mbori Pai.” (Yugo. 19:13) Sidu tie, kina Yesu sa naadu na rengba beko ka yugopa Ba fu kura aboro wenengai. Si arẽarẽ tie gu bake Kitabu Wene Pangbanga nangia Yoane gumba gupai nga Yesu nga “Pai,” “du ti ngbadu Mbori nga Ba.” (Yo. 1:1, 18) Nimanga Yoane sunge na gi fugo re, gupai naadu berãko yo nga gupai aboro anaamangaha ti agu aregbo re ti regbo riahe. Aboro anaasungo mbembedi na akurayo. Pa sungoyo mbembedi wa gure anaasa gupai nga fugodagbase du taata. Sidu, padu Wiri “ti ngbadu Mbori nga Ba” nayugo gupai nga i anaafura dagbatiyo wenengai.
6, 7. Wai gu pagume naadu dagba Ba na Wiri aasona kina kumbatayo?
6 Gu pagume naadu dagba Ba na Wiri aasona kina kumbatayo. Wiri aye kada nigu boro ‘rago angba ti Mbori mbiko ko na aʹuru dunduko.’ (Oni gedi Asanza 8:22, 23, 30, 31.) Si ruaru tie ani gumba gupai nga gu ngbanya naadu dagbayo asono dudunguro wa i aamangasunge wa sa na wa Wiri aawirika asino Bako. Fuo i kusi kura aboro, Wiri aye ka bi wai Yekova amangapai naayo nibasasa dunduko, na gako tambuahe tipa asino Mbori kini kii kina kumbatayo.
7 Gu regbo Satana aye na soapai kuti ga Yekova rengo kadu na bakere pagbia rogo zegino dunduko, Wiri adu na mamu beko ka bi wai Yekova ayugo nyemuse, ruru sarangbanga, tatamana, na ome ho ko agbia tiko ni na kpakarakpakarapai. Ngba gi gene re, Wiri adu na rengba beko ka wirika wai ka diabe gu kpakaraapai ko aandu ka gbiatiko nani rogo gako sunge auru kpotosende.—Yo. 5:19.
8. Wai akitabu Wene Pangbanga aundo rani ani wirikipai wenengai tipa agu asino nga ga Ba?
8 Mbiko gu dawedawe pagume naadu dagba Wiri na Yekova, Wiri asakipai tipa ko na agu afutufutuhe dunduko susi gu ka kura boro amangihe. Ya mo kura wene gene ho rengbe ani ka ino Ba ngbaha wenengai susi gu nga ani makia agu apai gako bangisa vungu ayuguhe na ki mangihe? Ka yugoho na kpiapai, oni berẽnga pa wai rengbehe kadu nimbumbuhe tipa ka giatise wenengai na gu fugo nga “nyemuse” ka oni gedipai tipaha gbua rogo buku sakarogo afugo yo. Ono tie, ka oni makiapai wenengai kurii agu apangbanga abakeke akitabu Wene Pangbanga akekehe tipa ga Yesu sunge tungusapai na wai ko angerefuo aboro, oni ini rogo gu fugo yo aino nzunzu nga “Mbori nga nyemuse.” (1 Yo. 4:8, 16) Kina gu bangisapai re du tipa gu kura asino Mbori nga gu Yesu ayuguhe fu gako abawiriki auru kpotosende ane.
GU GENE YESU AYUGUPA BAKO NGBAHA
9. (a) Rogo gini agene ue Yesu ayugupa Bako? (b) Oni funga kpiapai ka yugo wai Yesu ayugupa Bako rogo gako yugopai yo.
9 Wai gu Yesu ayugupa Ba fu gako abawiriki gbiati gu kura aboro naye kada ni apefuoko kusa? Ko amangihe wo ngba agene ue: rogo gako ayugopai yo na rogo gako sino mangapai yo. Ani furanga mbataano tipa gako ayugopai. Gupai Yesu ayuguhe fu apefuoko, si ayugu gu dudunguro inohe ko adu nani tipa ga Bako aberã gbiati gako gene mangaapai. Nikpiapai, Yesu aringbisi Bako kuti gu wene babanda rimbasa akandoro nambu agura ka ndu ka gbata guru sa ingi. Yesu agumba gupai nga ho gu babanda akandoro re agbia gu bangisa ru re ni, ‘ní nangi angi tipa ru susi agura du 99 nainga nga ya.’ Ginipai Yesu aida ka pehe na gu kpiapai re? Ko agumba gupai nga, “a wo Baroni du ngbangbaturũ yo, sangbako nga ka gu ni kpi nga sa dagba gi rukutu yo re ya.” (Mt. 18:12-14) Ginipai rengbe oni ka wirikaha tipa Yekova rogo gi kpiapai re? Ka si vura du ti kura aregbo nga oni nabi tironi nga sunge tironi te, gu Baroni du ngbangbaturũ yo na kina nyemu roni tiko na ko nabaka bangiriko abaka tipa roni. Bangiriko, oni nga boro sa dagba “gi rukutu yo re.”
10. Wai gu Yesu ayugupa Bako rogo gako mangaapai yo?
10 Gu ue gene Yesu ayugupa Bako ngbaha fu gako abawiriki nga rogo gako mangaapai yo. Ho gu mokedi nangia Firipo aya ni fu Yesu wee: “Gbia, mo yúgu Bamo fu rani,” Yesu aduadu na rengo beko ka yaa: “Gu ni bi re ni bi Buba.” (Yo. 14:8, 9) Ani makianga bete akpiapai nga gu nayugo wai Yesu ayugu asino Bako. Ho boro ngbataka azungodi Yesu ni tipa ko husi ko, Yesu azadi gi kumba naadu na “ngbataka” tiko re ki ya fuko: “Mi nakpi nyemu he, mo hú.” Fuo gu kumba re hu be gako ngbataka, ko aima ino gupai nga Yekova du nafu ome fu Yesu ko husi ko. (Rk. 5:12, 13) Berewe a ti gu regbo Razaro akpi, ga Yesu abawiriki aima ye ka ino pa ga Yekova nunga ho ‘nunga azi Yesu ni toro ko yo, ko ki nirungo a’ na “ki nikpari ni aume.” Wa Yesu avura ino gupai nga ko aandu andu ka zingisa Razaro bekpio, ko aima du na nunga koyo du ga Razaro aborokporo gbiati abakureako ni. (Yo. 11:32-35, 40-43) Zanga kapa, apangbanga kinaho rogo Ziazia Kekeapai nga gu nasa roni oni naabi gu nunga nga ga Ba rogo agu apai yo Yesu amangihe.
11. (a) Ho Yesu agirisi yekaru ni, ginipai ko ayuguhe tipa Bako? (b) Tipagine ani agbia wasa ti ni ti gupai Yesu amangihe re?
11 Ono tie, ginipai oni awirikaha ti wai Yesu agirisi yekaru? Oni makianga gupai namangi berãroni yo: Yesu ambakadi tapatapa gire, na ki do agu aboro naabaga abaabagara gbiati akandoro kusayo. Ko agbataka gu zau-amarã nga ga abaundaamarã na ki vagadi gayo ambisa. (Yo. 2:13-17) Gu nyanyaki mangapai re asa gako abawiriki i tingidi gu sangbanebi Bakindo Davide agumbaha ki yaa: “Bambiko nyemu ga bambu arika re arika.” (Tam. 69:9) Nimanga ko gupai re wa gure, Yesu ayugu gu nyanyaki nyemupai du ko nani tipa ka banda ndikidi irisombori. Ya mo oni nabi sino Bako rogo gu gako mangaapai yo re? Si natingida rani na gupai nga anga kina ome sa du ti Mbori ka dia gbegberẽ mangapai kusayo te, ono ko na kakaka nyemu ka mangaha wo. Wai rago agbere ti Yesu na gu gbegberẽ apai re nayugo wai furani rago agbera ti Yekova ho ko abi gu gbegberẽ apai ni naima hi zegino areme si nimangi. Pa ino ani gipai re wo nafu kina wasa furani ho ani asovura ni kuti iraira sarangbanga.
12, 13. Ginipai rengbe oni ka wirikaha tipa Yekova vurube gu gene Yesu anaamanga gako abawiriki ngbaha?
12 Ani furanga tipa kura kpiapai berewe. Gu gene ko anaamanga gako abawiriki ngbaha. I akongo kuti kango tipa gu boro pani akii dagbayo. (Mk. 9:33-35; 10:43; Rk. 9:46) Mbiko gu inohe Yesu agbiaha mbuko kindi na Bako, Yesu aima inoho nga rago angbanga ti Yekova na gu ngbatunga kiiso pa tise re te. (2 Sam. 22:28; Tam. 138:6) Kurigure, Yesu aima bi ngbatunga gu sino re ti Satana Bakitingbanga. Gu boro ngbaduse re aaberã kina patiko na pa pagbia. Sidu, bakere rungo aima ti ku kpoto Yesu yo ka bi gu gako abawiriki ko araba yó tipa gbanga regbo i nisonosi gu gbegberẽ sino re. Zavura aguyo ko asia yó ni amokedi, gu sino re aduadu a dagbayo. I ayugu gu sino nga ga pagbia dakuti gu yangara uru Yesu adu auru kpotosende ane. (Rk. 22:24-27) Wa si avura du wo, Yesu anaaruga yó kindi na weneringise, kidu kindi naa kido nga uru adu kinaho i nikadu na umbasitise wakina ko. —Frp. 2:5-8.
13 Ya mo oni nabi ga Ba mangapai rogo gu gene Yesu anaaruga gako abawiriki ngbaha ti iraira bipai na zerangbaduse? Ya mo agu apai Yesu amangihe na ki gumbaha naundo roni oni bi gupai nga gu Barani du ngbangbaturũ yo ambunga gako aboro te, ka i vura kaa manga iraira apai ti mburu kuraha vurũ? Ya mo pa ino ani agu asino Mbori re afõnga ngbadurani yo ani mangi kparakpee fuko ka gumba pa gaani saberã fuko ho ani amanga irairapai ni te?
WIRI ADU NA NYEMU KA YUGOPA BAKO
14. Wai gu Yesu ayugu gupai nga ko adu na nyemu ka yugopa Bako?
14 Dungu agu abazogo nazoga aboro ngbaome ninaamanga aboro tipa i nye kutii gayo pagbia niká yó na agu apai beyo si aida i inihe. Ono si adunga wo tipa Yesu te, ko adu na nyemu ka yugopa agu apai du tipa Bako fu kura aboro wenengai. (Oni gedi Matayo 11:27.) Kurigure, Yesu afu “rugatinapai” fu gako abawiriki tipa i ini gu ko nga irarengo, Yekova Mbori. (1 Yo. 5:20) Rogo gipai re yo nga gine? Yesu azaki berã apefuoko tipa i gi tiyo na gako yugopai tipa Bako. Ko ayugongo gu rengo du tipa Bako nigumba ko gupai nga Bako nga papara Tirinita te.
15. Tipagine Yesu agumbanga agu apai ti ni dunduko du tipa Bako ya?
15 Ya mo Yesu ayugu agu apai dunduko ko ainihe tipa Bako? Oó, ko amangipai na tatamana na ki zanga kusa dungu agu apai ko ainihe. (Oni gedi Yoane 16:12.) Tipagine ko amangihe ti ni wo? Bambiko gako abawiriki “arengba nga na pa ha” ti gu regbo re te. Ono tie, a wa Yesu asakirogoyo fuyo, kumu inohe i aandu ka gbiaha fuo ye gu “mounda” nga ziazia toro nga gu naaye ka nungusa yó kurogo ‘rengo dunduko.’ (Yo. 16:7, 13) Kina wai a agu avungu agude du na tatamana ninaambu awiriyo mbata i sono i niru ka gumba kura apai fuyo tipa i gi tiyo nani wenengai, kinawo a Yesu ambu regbo fu gako abawiriki daho i adu ni na rengba beyo tipa ka giarogo agu apai du tipa Bako wenengai. Yesu aima berãpa gu zanga rengba i adu nani.
ONI WIRIKI YESU NIUNDO ONI KURA ABORO I INI YEKOVA
16, 17. Tipagine du ani adu ti ni na rengba berani ka yugopa Yekova fu kura aboro?
16 Ho oni aino boro ni wenengai na asino ní ki ngba tironi, ya mo oni tonanga kaa gumba pani fu kura aboro te? Ho Yesu adu ni auru kpotosende, ko anaafura afura tipa Bako. (Yo. 17:25, 26) Ya mo ani rengbe ka wirika ko niyugo ani pa Bako fu kura aboro?
17 A wa ani nawirikihe, Yesu adu na dudunguro inohe tipa Bako susi kura aboro dunduko. Ono tie, ko aima ida ka fu bete gu inohe ko adu nani re fu kura aboro, ko afu rugatinapai fu gako abawiriki tipa i gitiyo na gu dudunguro apai du tipa Mbori. Mbiko gu undo nga ga Yesu, ya mo ani ainongo pai tipa Barani awere ngba gu gene dungu aboro ainongo ho ya te? Ani na bakere ngbarago mbiko gupai nga Yesu ayugu Bako furani rogo gako mangapai yo na rogo gako yugopai yo. Ka pepai nimasaku, ani rengbe arengba kadu na rukö tipa gu inohe du ani nani tipa Mbori. (Yere. 9:24; 1 Kor. 1:31) Wa ani namangi ome ka mbeda na Yekova, ko ima mbeda na ani. (Yak. 4:8) Sidu, ani awere tie na rengba berani ka fu gu inohe du ani nani tipa Yekova re fu kura aboro. Wai gu rengbe ani ka mangaha wo?
18, 19. Ngba gini agene rengbe ani ka yugopa Ba fu kura aboro? Oni sakingo rogoyo.
18 Si naida ani wiriki Yesu niyugo ani Ba fu kura aboro rogo gaani afugo yo na rogo gaani mangapai yo. Si naida ani nitingidi gupai atingida kindi nga dungu agu aboro ani agbiayo gene tungusapai yo ainongo da nga Mbori te. Si rengbe kadu nga zire yugopai aima vundo gayo bipai tipa Mbori. Ani rengbe ka fu gu inoho fu aboro du ani nani tipa rimo Mbori, gako ringbisapai tipa aboro, gbiati asinoko a wa duhe rogo Ziazia Kekeapai. Kurigure, ani rengbe ka sakapai na akuarani aidipase tipa agu apangbanga nayugo sino Mbori rogo Ziazia Kekeapai nga gu ani naye ka inoho awere wenengai susi gu ani ainihe mbata. Ngba gu gene re, ani rengbe arengba a ka gbia undo.
19 Na ginipai tigaha du tipa yugopa Ba rogo gaani mangapai yo wa ani awirika Yesu? Ka aboro bi gu nyemuse Kristo ayuguhe rogo gaani mangapai yo, si rengbe ka mbedisa yó koyo du Ba ni gbiati Yesu a. (Ef. 5:1, 2) Gu mokedi nangia Pauro angarasi rani ki yaa: “Oni dú ni awiriki pa re, a wa du mi a ni wiriki pa Kristo.” (1 Kor. 11:1) Nairiwo gu wene mamu du berani nga ka undo aboro i ini Yekova vurube gaani mangaapai yo! Sidu tie, ani ndunga andu kindi kumbatayo kaa wirika Yesu niyugo ani pa Ba fu kura aboro.