Ginipai Rengbe Ani ka Wirikaha be Bamangi Gbegberẽ Apai?

Gu bamangi gbegberẽ apai rengbe ani ka wirikapai beko nga gi ko Yesu afura naako rogo gi sura re. Gu bamangi gbegberẽ apai re na gberarago tipa agu apai ko amangihe. Ko nasana Yesu nga: “Mo tíngidi pa re ho mo ka da ni ku rogo ga ngbi.” A wa mo abihe rogo gi sura re, Yesu nafura fu gi bamangi gbegberẽ apai re. Mo ini gupai Yesu agumbaha fuko?—a Yesu nakido ko nga: “Ya mi foro ni rengo, areme, ani adú na mo Paradiso yo.”

Mo nabihe nga gu Paradizo nikadu wai?— Tipa ani gbia ndikidi karagapai, ani furanga tipa gu Paradizo Mbori ambakadihe tipa bambata kumba na bambata dee nangia Adamu na Eva. Wari gu Paradizo re aduni? Si adu ngbangbaturũ yo, watadu auru kpotosende?—

Kina rengo du, ka sidu nga ga karagapai nga auru kpotosende ane. Ho ani aberã ni tipa bamangi gbegberẽ apai ku “Paradiso yo,” si naida ani berẽ pako nga ko nika raka kina auru kpotosende ane ho si nika dani nga Paradizo. Gu Paradizo re nikadu wai?— Ani bingo ho.

Tingbafuo Yekova Mbori kusi bambata aboro nga Adamu na Eva, Ziazia Kekeapai naya ko amoi yo Paradizo yo kina auru kpotosende ane. Rimoho angia ‘ati Edene.’ Ya mo mo rengbe ka berẽnga pa wai gu ‘ati Edene’ re adu nibawenehe?— Nirengo, si adu nibawene ba tipa ka raka rogoho nga gu adunga areme ya!

Mo nabi gipai re wai? Ya mo Yesu nikadu kina auru kpotosende ane na gu bamangi gbegberẽ apai naadu na gberarago tipa gu ingapai ko amangihe re?— Oó, Yesu nikadu ngbangbaturũ yo kini zogarago ni bakindo ku auru Paradizo kpotosende. Sidu, Yesu nikadu na gu bamangi gbegberẽ apai re rogo gu gene nga ko nika zingisa ko bekpio na i ngerefuo ko wenengai rogo Paradizo. Ono tipagine Yesu nika mbu gu boro nangia bamangi gbegberẽ apai ti ni ko raki rogo Paradizo yo?— Ani furanga tipa gipai re.

Rengo nga ha nga, gu bamangi gbegberẽ apai re aima manga gbegberẽ apai. Kinawo duhe tipa gu dungu abirioni aboro naraki auru kpotosende ane. Ono tie, badungu yó amangi gbegberẽ apai bambiko i awirikanga pai tipa Yekova na gupai ko akpinyemuhe te.

Sidu, ngbatunga aboro wa aguyo re kodihe na gu bamangi gbegberẽ apai Yesu afura naako ho ko aduni ti ngbunduru ngua, i nika zingisa yó azingisa tipa i raki kina auru kpotosende ane. I nika yugopai fuyo tipa gupai Mbori akpinyemuhe. Nasi nika ida i yuguhe nga i nakpinyemu Yekova.

Mo ini wai rengbe yó ka yugo gupai nga i nakpinyemu Yekova?— Nimanga yó gupai Mbori aida beyo. Nairiwo wai si nika ngba ka raka rogo paradizo na kidu dedede na agu aboro nakpinyemu Yekova na akurayo!