Ya mo si Naida Ani Kpari fu Asanto?

DA NAABAKANGA bangirini ya na ki bihe nga si naida ní ndu fuo boro tipa ní undo ní? Nibi gu bakabangirise du ani rogoho, ani nisia kina gu bakure bi ani he nga ní duna nunga rani na ní na inohe tipa gu kpakarapai du ani rogoho. Padu ní na nunga gbiati bakere inohe nasa ní nzunzu niwene bakure.

Kina gu bangisapai re rengbe kadu tipa kura aboro nibipa kparakpee. Kuba gupai nga i kpari fu Mbori, i nabi ko nga pako ima kio gbe na ko niiriwo ko fuyo, ono si fuyo taata tipa i kpari fu asanto. I nabihe nga, wa du asanto nga agu aboro naaima gbiatiyo na aʹasada gbiati agu akpakarapai namanga aboro, i rengbe kadu na bakere nunga aboro tiyo. Nikpiapai, agu aboro gayo nyanyakipa ahe naingi i nabihe nga si niwenepai i kpari fu “Santo” Antonio nangia boro Padua nga gu boro nanaafu marã fu agu aboro i anaadĩ gayo ahe. Kangia i nakpara tipa gu nyaa nawoka, i nasia ka kpara fu “Santo” Frasisko nangia boro Assis watadu fu “Santo” Yuda Tadeyo ho du yó ni rogo gbegberẽpai watadu pa gayo he nagberẽ ni.

Ono wa vura duhe wo, wai rengbe ani ka ino singia kpara fu asanto nga wene gene kparakpee ringbisihe kuti Ziazia Kekeapai? Nirengo, wa duhe nga gaani kparakpee nga agu afugo ani apehe fu Mbori, si naida ani ini gupai nga: Ya mo ko nagia gaani kparakpee? Na ya mo si aidanga ani sana tirani ki yaa: Mbori nabi kpara fu asanto wai te?

GU BIPAI DU ZIAZIA KEKEAPAI NANI TIPA KPARA FU ASANTO

Gu sino nga ga kpara fu asanto mburuhe rii gu yugopai du rogo gu Kanisa Nga ga Katoriko nga asanto nadia gaani akpe ka ndu nani koyo du Mbori ni. Ringbisihe kuti buku sa, gu berã du yó nani nga, si nga “zungoditise fu Mbori vurube gu boro Mbori abihe nga ní duna rengo beni tipa mangaha wo tipa wa ka Mbori inipai fu gu boro naida i inipai funi re.” (New Catholic Encyclopedia) Rogo gi gene re, gu boro nakpara fu asanto, ní na gu berã nga ní rengbe ka gbia inopai vurube yó mbiko gu wene pagume du asanto nani na Mbori.

Ya mo Ziazia Kekeapai nayugo ngbatunga pai wa gure? Kura aboro naya gu mokedi nangia Pauro aima yugo ndu gupai si aida aboro nikpari ti ni fu asanto rogo gako waraga yo. Nikpiapai, ko akepai fu agu aKristano naadu Roma yo ki yaa: “Were mi nakpara fu roni, awirina, mbiko Gbia Yesu Kristo, na mbiko gu nyemuse nga ga Toro, ani mongo nike na kpara fu Mbori na oni tipa re rogo gaoni kpe yo.” (ARomo 15:30) Ya mo Pauro aasana akurako aKristano tipa i zungadi Mbori ko mbupai fuko? Oó. I du narengbe ka sana Pauro nangia ga Kristo mokedi tipa ko zungudi Mbori tipa yó. Pauro aayugo gupai nga ngbaangba ani sana akuarani aKristano i kpari fu Mbori tipa rani. Ono gure kia ti gupai nga ka kpara fu gu boro aboro abihe nga ní gudu ngbangbaturũ yo tipa ní ndu ka pe gupai ani aidaha fu Mbori. Tipagine duhe ti ni wo?

Rogo gu Kitabu Wene Pangbanga nga ga Yoane, Yesu ayaa: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” (Yoane 14:6) Ko ape kurapai nga: “Gu he ka oni kpari fu Buba tipa ha ni rimore, ko fu he afu fu roni.” (Yoane 15:16) Yesu ayanga wee ani kpari fuko ko ki niru ho ka ndu ka fura na Mbori ku barani te. Kuba gure, tipa Mbori gi gaani kpee, ani duwa ka ani kpari fuko rogo Yesu angia rogo gu kura boro kia ya.

Ho ga Yesu abawiriki asanako ni ko yugu wai fuyo ka kparakpee, ko ayaa: “Ho oni ka kpara ni, oni ya: ‘Barani du ngbangbaturũ yo, ani irisi rimoro airisa.’” (Ruka 11:2) Ii, “ho” watadu agu aregbo dunduko ani akpara ti ni, si naida ani pe gaani akpee fu Mbori angianga fu Yesu watadu kura boro ya. Nibi gi ziazia yugopai nga ga Yesu re, runga ha ani kpari fu Mbori vurube “asanto” te ono vurube Yesu Kristo.

Kparakpee nga nyanyakipa papara pa gaani irisombori, na ka ani airiso gu kura boro kia angianga Mbori ya, si du nga sa na gu yugopai nga ga Ziazia Kekeapai te. (Yoane 4:23, 24; Yugoti 19:9, 10) Si nga ndu gupai si aida ani pe gaani kpee ti ni fu kina Mbori sa.

YA MO SI NAIDA ANI GUNDE TI FURA NA MBORI?

Rogo ga Yesu Tungusapai Naadu Rii Bagangara yo, ko afura tipa gu kpiapai naafura tipa gu gude nasana bai tipa ko fu riahe furu u rihe. Ya mo bai arengbe ka fu mbia furu kuba kpakuto? Watadu kere wo kuba tĩo? (Matayo 7:9, 10) Gu bagude du na nyemuse ka ní mangingo pai wa gure te!

Ani bingo gu kura kpiapai berewe tipa gu bipai nga ga vungugude. Mo berẽnga gupai nga wiro na nyemu kura ahe u aida ka sana ro tipaha. Mo ima sa gaoni pagume na wiro si du wenengai, na mo nidu ti aregbo dũ zaaza na u. Wa vura duhe wo, mbiko wa u agunde agunde nga mo andu ka zinga kuti ru, u kini mo ka sana gu kura boro tipa ní ye ka pepa agi ahe re foro. Mo bi ru wai? Ono ginipai rengbe ka manga ka si du nga sino ní nga ní naafura namo kina vurube gu kura boro re na si nawira wa wo du ní nikaa mangaha dedede? Ya mo mo du na ngbarago tipa gu gani pai re? Oó. Agu avunguagude duna nyemuse i naida awiriyo nifura naayo angianga rogo kura aboro ya na i nakpinyemu gupai nga i nisana yó tipa agu ahe i aidaha.

Ho Yesu amangisunge ni na gu kpiapai nafura tipa gu gude naasana bani tipa riahe, ko aya fu rimbasa aboro wee: “Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama wene ahe fu agu yo nakpara fu ko te re?” (Matayo 7:11) Zanga kapa, vungugude nidu na bakere nyemu ka fuhe fu wirini. Gu barani du ngbangbaturũ yo na bakere nyemu ka gia gaani akpee na kini karagapai kutini.

Mbori naida ani fura naako rogo kparakpee yo ka si vurangia ani na akpakarapai tirani vurũ. Ko ambunga gene fu kura aboro tipa i nagia gaani akpee te. Ziazia Kekeapai nazungadi rani niyaa: “Mo bá ga tindiro ku auru Yekova, ko asóngoda ro.” (Atambuahe 55:22) Kuba gupai nga ani kpari fu asanto watadu gu kura aboro kia, si naida ani sonosi gu sino nga ga kpara fu kina Yekova Mbori sa.

Gu barani du Ngbangbaturũ yo naberã parani aberã wa du ani nibasasa. Ko na nyemu ka undo rani ti gaani akpakarapai na ko nayamba rani ani mbedi koyo du ko ni. (Yakoba 4:8) Nairiwo gu ngbarago du ani nani nga ani na gu momu nga kaa fura na gu Mbori nga Barani “ninagia kpetambuahe!”—Atambuahe 65:2.