Ani Bi Agu Asino Yekova Nga Du Niruruse Na Mbupai Na Kikiipaha

1, 2. (a) Tipagine ani abi agu abakurearani du niruruyo na nambupai furani na nyanyaki payo ti ni? (b) Gini asanahe ani nika wisigopai tipaha?

GINIHE nga ndikidi bakure? Wirinarani du rimori nga Ashley ayaa: “Mi nabihe nga ndikidi bakure nga gu boro du ti aregbo dunduko barambeda namo na nambupai furo ti agu aregbo ingi mo kutini.” Ani dunduko nidu na ngbarago kadu na agu abakure du niruruyo na nambupai furani. I naundo rani ani bi tirani nga ngba barani ngba na i nakpinyemu rani akpi.—Snz. 17:17.

² Yekova nga gu yangara wene bakure du niruruko na nambupai furani. Bake papara Atambuahe ayaa tipa ko wee: “Ako Gbia, bambiko mo du ni wene ro, ki du zaza tipa vu aboro, ki du na weneringise [watadu gu nyemuse nga ga ruru sino] kpaima fu agu yo dunduko nakpara foro.” (Tam. 86:5) Ginihe nga padu boro niruruni na kini mbupai? Waigu Yekova ayugo gi wene asino re? Na wai rengbe ani ka wirika gako kpiapai? Akaragapai sa agi asanahe re nika undo rani ani sonosi gaani nyemuse tipa gu bawene bakurearani nga Yekova re. Si nika nyakasa gu pa bakure du dagbarani na kura aboro a.—1 Yo. 4:7, 8.

YEKOVA NIRURUKO

3. Padu boro niruru ní nayugo gine?

³ Du niruruse nga gu wene sino nakoda kakuti ruru mangapai fu kurase, gbiati ra nigose funi. Gu boro du niruru ní, ní aʹarianga berãni te. Kuba gure, ní nazio tiní kuti boro (watadu he), na kidu mbembedi na gu boro re watadu gu he re ka si vurangia regbo kerepai du vurũ. Ii, Yekova nga “ruru boro” naapa ko kuari gbe.—Yugo. 16:5.

4, 5. (a) Waigu Yekova ayugo padu ko niruruko? (b) Wai rengbe ani ka gbia wasa ti berã ani kurii gu ga Yekova mangapai nga ga du niruruse?

⁴ Waigu Yekova ayugo nani nga ko niruruko? Ka bangiriko gonga ti ruru airisiko te. Gu irisiko nangia Bakindo Davide aima ino gipai re nirengo. (Oni gedi 2 Samuere 22:26.) Ti gu regbo Davide adu niʹasadi asadiko, Yekova angbembatayo fuko, ki bandako, na ki batasi ko. (2 Sam. 22:1) Davide aima inoho nga padu Yekova niruruko ima susa kungbo fugo gbua. Tipagine Yekova adu ti ni niruruko fu Davide? Mbiko Davide nitiko angia “boro inapai” watadu ruru boro. Yekova nabi padu airisiko niruruyo na nyanyakipaha na gu mosoro ko afuhe fuyo nga kadu niruruko a fuyo.—Snz. 2:6-8.

⁵ Ani rengbe arengba ka gbia wasa ti berã ani kurii agu amangapai nayugo padu Yekova niruruko. Wirinarani nga Reed ayaa: “Mi naagbia undo agbia ti geda mi agu apangbanga du tipa wai Yekova amangipai fu Davide ti aregbo fudifudiapai. Zavura ho Davide anaaora ni kini raki rogo asimbia, Yekova anaangera angera fuoko dedede. Gipai re niwene ngarasaro fere! Si natingida re na gupai nga, ka apai vura kpakara akpakara wai vurũ na ka si vura gberã agbera wai, Yekova nika undo re aundo ti agu aregbo nye mi niruru re fuko.” Zanga kapa, kina gu bangisapai re du tipa roni a.—Rom. 8:38, 39.

6. Rogo gini kura agene berewe Yekova ayugo padu ko niruruko ngbaha, na gini undo airisiko agbiaha ti ni?

⁶ Gini kura agene berewe Yekova ayugo padu ko niruruko ngbaha? Ko aʹarianga gako arugute te. Ko nakidohe nga, “dati gbinza roni a Mi nga Ko” watadu mi aʹarianga sino re te. (Yes. 46:4) Ko namanga gako adiaberã dedede riipa gu gako arugute ka boro ariangaha ya du tipa rurupai na irairaha. (Mara. 3:6) Kurigure, Yekova nayugo padu ko niruruko nga ko asanga tiko ti gako akidohe te. (Yes. 55:11) Rogo gi gene re, agu airisi Yekova dũ du niruruyo nagbia undo ti padu ko niruruko. Rogo gini gene? Ho ani amanga ome ni ka raka ringbisihe kuti ga Yekova arugute, ani rengbe kadu naa kido nga ani nika gbia undo agbia ti gako kidohe.—Yes. 48:17, 18.

ONI WIRIKI PADU YEKOVA NIRURUKO

7. Gini gene rengbe ani ngbaha ka wirika padu Mbori niruruko?

⁷ Wai rengbe ani ka wirika padu Yekova niruruko? Gene sa nga ka undo agu aboro nagbiatiyo na kpakaraapai. (Snz. 3:27) Nikpiapai, ya mo oni iningo pa gu wirina duna gberarago, isoke mbiko kaza, agumeni nasoga ní, watadu ní mangipai ka ní adunga na diabese ya? Tipagine ka oni apenga “wene apai na wasawasa apai” ti ni funi ya? (Zek. 1:13)a Manga oni he wo nika yugo gupai nga oni nga gu ndikidi bakure du niruru ní ‘kakuti ní kisusi wirinani.’—Snz. 18:24.

8. Wai rengbe ani ka wirika padu Yekova niruruko rogo rogatise yo?

⁸ Ani rengbe ka wirika ga Yekova du niruruse ninye ani niruru rani fu agu aboro ani akpinyemuyo. Nikpiapai, kangia arogotise du nga ani, ani ima inoho nga si naida ani nye niruru rani fu gaani abadiarogatise. (Snz. 5:15-18) Si aidanga ani di kandara gu diandue rengbe ka ndu na ani sa bäri te. (Mt. 5:28) Kurigure, ani nayugo padu ani niruru rani fu awirinarani aidipase nizanga pe ani rimoyo watadu ka pe ziree tipa yó na ka zanga degaturani fu agu aboro nagbataka ngbatunga apai wagu re.—Snz. 12:18.

9, 10. (a) Da si aida ani nye niruru rani funi? (b) Tipagine adunga ha ti ni taata ti aregbo dunduko ani nigisangba Yekova ya?

⁹ Kurii agi apai re dunduko, ani naida ka nye niruru rani fu Yekova. Wai rengbe ani ka manga gipai re? Nimanga ani ome kaa bi apai kina wai ko abihe, kaa kpinyemu agu apai ko akpinyemuhe na kaa soga agu ko asogaha na kini raki ringbisihe kuti gako arugute. (Oni gedi Atambuahe 97:10.) Ka ani aaberã na kini bi apai kina wai Yekova abihe, kinawo a si nika sarani ani gisangbako nibakerehe.—Tam. 119:104.

¹⁰ Nirengo, taatapai ngaha furani ti aregbo dunduko ani nigisangba Yekova te. Si rengbe kadu nga si naida ani sota asota tipa ka nye niruru rani fuko. Nikpiapai, kura paranga aboro nga aKristano na nyemu ka manga rogatise, ono i ata bingo gu boro rẽ dagba airisi Yekova yo tipa i rogatiyo nani te. (1 Kor. 7:39) Paranga dee ni Kristano rengbe ka bi gupai nga akurari basunge yo nasosoda ri sa gu boro i abihe nga ní ima rẽ nigari badiarogatise. Si rengbe kadu nga gu wirinarani re nasovura na gu gberarago naye be sungo nisase. Ono si ki vura du wo, ri namanga ome ka nye niruru ri fu Yekova. Ya mo ani abingo ngbatunga agu akpiapai nga ga du niruruse re na nyanyakipaha te? Nirengo, Yekova nika tumo agu aboro dunduko nye niruruyo fuko zavura ti regbo akpakarapai.—Eb. 11:6.

YEKOVA NGA BORO MBUPAI

11. Ginihe nga mbupai?

¹¹ Dagba asino Yekova yo dunduko, gu ngba gbe nga ko na nyemu ka mbupai fu aboro. Ginihe nga mbupai? Si nga mbupai fu boro ho ní naingipai ni kutiro. Gure ayugongo gupai nga gu boro nambupai ní naida na gbegberẽpai watadu ní natikango naapa mangaha te. Kuba gure, ní nasia ka zanga kpipai kuti kurani. Ziazia Kekeapai nayaa Yekova “zaza tipa vu” agu aboro namanga ndikidi saberã.—Tam. 86:5.

12. (a) Waigu Yekova ayugo mbupai? (b) Ginihe nga i “gbandaka” ingapai ti boro?

¹² Waigu Yekova ayugo mbupai? Ho Yekova ambupai ni fu boro, ko ‘navu ní avu kpaima’; ko nambupai funi na kpotokoyo dunduko na nyeanye kindi. (Yes. 55:7) Waigu ani ainoho nga Yekova nambupai na kpotokoyo dunduko? Ani abingo gu kidohe du rogo Amokedi 3:19. (Oni gedihe.) Gu mokedi nangia Petero azungodi agu aboro naadegatuyo fuko i ‘zúngadi tiyo na ki sa tiyo berewe.’ Ho boro ingapai amanga ndikidi saberã ni, ní nabira tiní nyanyaki ti gani gbegberẽ mangapai. Ní namanga ome ka zanga manga gu ingapai re berewe. (2 Kor. 7:10, 11) Kurigure, ndikidi saberã nasa gu boro ingipai ní ‘sa tiní’ ti gani ingapai na ki tona ka manga gupai ngba ti Mbori. Agu aboro naadegatuyo fu Petero ka i amangi ndikidi saberã wagu re, gine kangia sangbanaha? Ko aya ka i ‘gbandaka’ gayo ingapai agbandaka. Gu pa-Giriki nga ka gbandaka re, rogoyo nga ka “wega he kusayo watadu ka gbarasaha.” Ho Yekova ambupai ni, ko nagiriso rani gigiri. Ko nambupai furani na kpotokoyo dunduko.—Eb. 10:22; 1 Yo. 1:7.

13. Gu fugo nga “mi atíngida nga pa gayo ingapai berewe” te nakido rani na gine?

¹³ Waigu ini ani he nga Yekova nambupai nyeanye kindi? Ani bingo gu ga Yeremaya sangbanebi du tipa gu vovo mokido Mbori amangihe na mbedimbedi aKristano nga gu nasa agu aboro duna idapase kuti motumo tumorii i agbia ndikidi mbupai. (Oni gedi Yeremaya 31:34.) Yekova ayaa: “Mi avú yo ti gayo irairaapai, ka mi atíngida nga pa gayo ingapai berewe ya.” Yekova natingida rani na gupai nga bara sa kindi ko nambupai furani, ko ambusanga rani berewe kumbatayo tipa gu ingapai re te. Ko anyenga anye kindi kaa berãkurii gu gaani ingapai re tipa ka ru ho ka kitangbaanga rani watadu ka fu mbusa furani te. Kuba gure, Yekova nambupai fu agu aboro ingipai na kini sa gayo ingapai nigiiko.—Rom. 4:7, 8.

14. Wai rengbe ani ka gbia wasa ti berã ani kurii ga Yekova mbupai? Oni funga ha na kpiapai.

¹⁴ Ani ima rengbe a ka gbia wasa ti berã ani kurii ga Yekova mbupai. Ani bingo kpiapai. Dungu agarã kusayo, i akusi wirinarani kusayo rogo rengo yo nga Elaine. Fuo dungu agarã kusa, ri akaraga tiri berewe kurogo rengo. Ri ayaa: “Wa si avura du nga mi aya fu tire na kura aboro wee Yekova ima mbupai fere, dedede, mi anaabi tire nga ko ima turo nami watadu kura aboro ima mbeda naako kisusi re.” Ono tie, Elaine agbia wasa be geda Ziazia Kekeapai na kini berẽkurii agu afugo nafura tipa ga Yekova mbupai. Ri ape kurapai nga, “Mi abi gupai nga Yekova ima kpinyemu re na nunga re tiko kisusi gu mi aaberãha.” Gupai re aima ngba tiri gbe na ki sari ri yaa: “Ho Yekova ambupai ni ti gaani aingapai, si aidanga ani bi tirani nga gupai re aguaringa berewe tirani ya te.b Mi abi tire nga mi aidanga kuti gupai nga Yekova rengbe ka mbupai fere te, na mi aberẽhe nga mi nika tinda gi tindiro re daho mi akpi ni. Mi aima inoho a nga si nika dia regbo adia, ono mi ima tona ka bi tire nga mi nambeda na Yekova na si wa ka i ya gu tindiro re rire berewe te.” Nairiwo gu wene sino Mbori mbupai ani airisoko re!—Tam. 103:9.

ONI WIRIKI GA YEKOVA MBUPAI

15. Wai rengbe ani ka wirika ga Yekova mbupai?

¹⁵ Ani rengbe ka wirika ga Yekova mbupai ka ani ambupai fu akuarani ho i naingi ni kutirani. (Oni gedi Ruka 17:3, 4.) Ani tingidi gupai nga, ho Yekova ambupai ni, bangiriko nago ti gaani ingapai ka ko aziongo ho kutirani ya. Ho ani ambupai ni fu akurani, si naida bangirani go ti ni ka ani atingidangaha berewe kumbatayo ya.

16. (a) Ya mo pa mbu ani pai fu boro nayugo gupai nga ani naida na gbegberẽpai watadu ani nambugene fuhe? Oni sakingo rogoho yo. (b) Ka ani aida Mbori mbupai furani, ginipai si aida ani mangihe?

¹⁶ Anga pa mbu ani pai nayugo gupai nga ani naida na gbegberẽpai watadu ani nambugene fu aboro i nimangi rani nani te. Oó, wo duhe te. Si nga ani nasia ka zanga kpipai kuti boro. Ono wa vura duhe wo, ka ani aida Mbori mbupai furani, ani duwa ka ani wiriki gu sinoko nga ga mbupai fu kura aboro. (Mt. 6:14, 15) Nirengo, nunga nasa Yekova ko nitingidi gupai nga “nvutu sende nga ani.” (Tam. 103:14) Ya mo si aidanga nunga fõngbaduraniyo ani mbupai fu akuarani na kpotoraniyo dunduko tigayo aingahe te?—Ef. 4:32; Koro. 3:13.

17. Gine rengbe ka undo rani ka si du nga kuarani idipase imisi rani?

¹⁷ Kina rengo ngaha nga, si taata boro naambupai ti aregbo dunduko te. Zavura gu bete mbedimbedi aKristano naadu rogo bambata sa kama agarã, si adu fuyo nikpakarapai ka ruga azanga giatise dagbayo. (Frp. 4:2) Kangia kuarani idipase imisi rani, ginipai rengbe ani ka mangaha? Ani bingo gupai naadu tipa Eyobo. Agu abakureako nangia Erifaza, Biridada, Sofara aima imisa ngbaduko nikerehe. (Eyo. 10:1; 19:2) Niyangaraha, Yekova aruga agu aba kitingbaanga ko re. Mbori aruguyo i ndu fuo Eyobo ko fu motumo tipa gayo aingapai. (Eyo. 42:7-9) Ono Yekova aida Eyobo mangipai a. Gine nangiaha? Yekova arugu Eyobo ko kpari tipa yó. Eyobo amangi gupai Yekova apehe fuko na Yekova ki fu maku fuko tipa gu sino nga ga mbupai. (Oni gedi Eyobo 42:10, 12, 16, 17.) Ginipai ani wirikaha ti ni? Ka ani kpari tipa gu boro imisi rani, si rengbe ka sa rani ka ani kpingo pai kutini ya.

ANI BI ASINO YEKOVA NA NYANYAKIPAHA

18, 19. Wai rengbe ani ka kiiso gaani tambuahe tipa wenewene asino Yekova?

¹⁸ Rago ima ngba tirani ka wisigo asino Yekova du niwenehe. Ani bi gupai nga ko zaaza, ko akparakanga aboro te, ko nagamahe, ko na rugatinapai, ko niruruko, na kini mbupai. Nirengo, ani wiriki kina betehe. Ani nikadu na ngbarago tipa kaa wirikapai tipa ko nyeanye kindi. (Batu. 3:11) Ani ima ida kuti afugo Pauro nayaa: “Ako gu dungura nga ga gu ũkumuko nga ga Mbori tatamana na inahe,” na bangirani arengbanga ka gonga ti gu sinoko nga nyemuse gbiati agu asino sita wisigi ani pai tipaha re te.—Rom. 11:33.

¹⁹ Ani dunduko, ani kiisinga gaani tambuahe akiiso tipa gu wenewene asino Yekova re. Ani rengbe ka manga gipai re ni inido ani tirani na asinoko, niberã ani kuriihe, na kini wiriki mangaha rogo gani raka yo. (Ef. 5:1) Ka ani mangihe wo, zanga kapa ani idi aida kuti afugo bake papara Atambuahe nayaa: “Si ni wene he fere ka mbeda na Mbori.”—Tam. 73:28.