“Oni Ngére, Mi Nambakada Ahe Dunduko ni Vovo Ho”

Ya mo mo naida kadu na wene kpotose na ka bi gamo aborokporo kinawo? Ya mo mo na nyemu ka raka rogo gu zegino ima, rungo, na kpio nika dunga rogoho ya? Anga kungbo musumo gbua du nga gi zegino re nika da wa gure te. Kuba gure, ruru zegino nika du adu ti ni nirengo, mbiko Yekova Mbori ima kido paha. Mo bingo wai i nasakipai tipa wai gi gako kidohe re ka manga rogo Yugoti 21:3-5.​—Oni gedihe.

“[Mbori] awéga aume ti bangiriyo ku sa yo dunduko.” (Yugoti 21:4) Gini ngbatunga aume ko nika wega ra kusayo? Anga ami nga aume ngbarago watadu agu ra nabanda bangirani te. Ga Mbori kidohe nafura tipa agu aume ninaakura be ima watadu rungo. Anga Mbori nika wega kina wegewege ra te; ko nika dia agu apai nasa gupai nga agu aume re nikuru nga rungo na aima.

“Kpio adú nga berewe te.” (Yugoti 21:4) Kpio nga gu bakere he ninaasa gupai nga aume nikuru bangiri aboro yo. Yekova nika batasa aboro giasangba be gu zio nga ga kpio. Rogo gini gene? Ko nika dia kpio kusayo: nga gu ingapai ani adihe ti Adamu. (ARomo 5:12) Yekova nika dia ingapai kusayo ti aboro giasangba riimburu gu motumo Yesu afuhe.a Fuani, “i nikagbarasa” gu yangara vurarani nga kpio. (1 AKorindo 15:26) Ruru aboro nika raka kina wai Mbori aidi i raki ti gu regbo re nyeanye kindi na wene kpotoyo.

‘Ima adu nga berewe te.’ (Yugoti 21:4) Gini ngbatunga ima nika dunga ti ni berewe ya? Agu apai nafuda rani berãraniyo, ngbadurani yo, na ti kpotorani naye ni surungba ingapai gbiati zangarengba nga gu sa raka ni mbumbuhe fu dungu amirioni aboro, si adu nga berewe te.

Raka nika da awere zanga aume na kpio. Mo rengbe ka sanahe nga, ‘Wari du?’ ‘Ya mo Mbori nakidohe nga aboro nika raka ngbangbaturũ yo?’ Oó. Mo bi ndu gupai adu ngaha ti ni wo ya. Bambata pai nga, gu kidohe re natona na agu afugo nga, ‘ga Mbori banye du na aboro,’ aboro naraka auru kpotosende ane. (Yugoti 21:3) Uehe nga, gu kidohe re nafura tipa zegino nga “kpio adú nga berewe” te, nga gu zegino kpio adu kina rogoho mbata ono si adu nga berewe te. Kpio aadunga ngbangbaturũ yo te, ono si aima dia gbanga regbo ku auru kpotosende. Nirengo, gu ga Mbori kidohe du tipa wene raka nika manga kina auru kpotosende ane.

Yekova naida ani idi kuti gu gako kidohe du tipa ruru vovo zegino. Nibasa fuo manga ko gi kidohe re, ko aya: “Oni ngére, mi nambakada ahe dunduko ni vovo ho.” Ko agbia kurapai kutini nga, ‘Agi apai re nga ruruhe nga rengo a.’ (Yugoti 21:5) Si adu ni wenepai ka si du nga mo gbiati gamo aborokporo adu dagba agu airisimbori du na ngbarago nga aguyo nika bi gi gako akidohe re si nida ti rengo.