Yesu Kristo Si Naida Ani Tingidi Pako Wai?

Rogo Banduru, dungu aboro rogo zegino dunduko nika bi kpia Yesu wa fogogude. Ko nika du rogo ga anya sanduki riahe. Ya mo si naida ani naatingidapa Yesu gbua ni fogogude?—a Ani furanga a were tipa gu nyanyakipa gene rengbe ani ka tingida pako ngbaha. Ani rengbe ka wirikapai tipa ko nibi gupai namangi yuru fu agu ababanda akandoro naadu Betereme yo nvuoyo.

Maraika yugu tiko fu agu ababanda akandoro re. Ko ya fuyo wẽ: ‘I vungu Batasi fu roni areme nga Kristo Gbia.’ Gu maraika re pe gupai fuyo berewe nga i nika bi Yesu “ukadi yo ko ni gbanga remu pi rogo ga anya sanduki riahe yo.” Ni basa fuo gure, dungu amaraika ki kuru ki tona ka “taasa rimo Mbori.”

Ka mo gi fugo amaraika i nitaasirimo Mbori, mo du wai?— Ababanda akandoro adu na ngbarago! I aya: “Ani ndú kina ku Betereme yo awere, ki bi nga gi pai mangi re.” I agbia “aMaria na Yosefa, fogo gude ki pi rogo ga anya sanduki riahe.”

Kura aboro aye ku Betereme yo yo aMaria na Yosefa adu ni. Ho ababanda akandoro ape agu apai ni fuyo namangi, si ki iriwo airiwo tiyo. Ya mo mo na ngbarago tipa ka ino gu iiriwoapai namangi re?— Agurani dunduko nakpinyemu Mbori na ngbarago. Awere tie, ani bingo ndu gupai pabatika Yesu afu bakere ngbarago ti ni. Si naida ani furanga awere tipa agu apai namangi mbata fu Maria di kumba.

Rogo uru sa, maraika du rimoko nga Gaburere aye fuo Maria. Ko akido ri nga ri nika batika gude, “ko adú ni bahe, i ayá ti ko Wiri Mbori nga Bahe.” Gaburere aya: ‘Ko nika zogarago ni bakindo na gako kindo adiganga te.’—New World Translation.

Maria naida ka ino wai rengbe gipai re ka manga mbiko wa ri akodanga ba na kumba ya. Gaburere nasakapai furi niya: “Gu tandu nga ga gu ko zogo aboro dũ nikadada ro; si du i ka ya ti ni ti gu gude mo ka vunga ko, Ziazia ko, nga Wiri Mbori.” Si adu nga Mbori nika dia Wiriko ngbangbaturũ yo na ki moiko ku rukumbu Maria yo ni tooni gude, nairiwo gupai re!

Ya mo mo bi gu sura “airatatamana” du biata na ababanda akandoro ye ka bi gu fogogude nga Yesu?— Ti regbo Batika Yesu, ngbatunga agu asura re niidu ni dunguhe. Ono si naadunga ni ruruhe te. Agu “airatatamana” re angia abinza akerekuru, nga gu mangapai Mbori aidanga na ni ya. Ani bingo gupai namangi ho i ada ni. Ziazia Kekeapai naya: ‘I ki rimi ku dimo yo ki bi toni gude be Maria nga nako; i ki ti sande ki irisi ko.’ Yesu aadunga ni fogo ko na ni pigipigi ko rogo ga anya sanduki riahe te; ko adu ni tooni ko na kini raki na Yosefa na Maria kporo!

Agu abinza akerekuru re aru wai ka gbia Yesu?— “Kerekuru” nangbe fuyo mbatayo, u aandunga nayo nibasa ku Betereme yo te, ono koyo Bakindo Erode adu ni Yerusarema yo. Ziazia Kekeapai naya Erode aaida ka ino bara Yesu tipa ka imoko. Mo berẽnga kurii gipai re awere. Da mo aberãha nga ní naasa kerekuru u ndu na agu abinza akerekuru re koyo Erode adu ni?— Anga ndikidi Mbori naadu nga Yekova te, vurako nga Satana Bakitingbanga naadu!

Areme, Satana naida aboro naabi Yesu gbua wa fogogude. Ono gu maraika nga Gaburere aya fu Maria wẽ: ‘Ko nika zogarago ni bakindo na gako kindo adiganga te!’ (NW) Yesu nazogarago awere ni Bakindo ngbangbaturũ yo, na ko nika gbarasa avura Mbori dunduko barambeda. Gere nga gupai si aida ani nitingidihe tipa Yesu, na si naida ani pehe fu kura aboro a.