Ga Mbori Kindo​—Gini Undo Rengbe Mo ka Gbiaha Behe?

Si nawira wa mo ima bi ndu gupai nyakipa ga Mbori Kindo ti ni fu aDezire Yekova rogo gu kekeapai ye mbata fu gere. Na si nawira wa rago aima ngba tiro ka ino agu apai ani nasakipai tipaha nga gu ga Mbori Kindo nika mangaha ku mbatayo. Ono tie, mo ima rengba ka bakabangiro singia agi apai re amanga nzunzu.

Gu bakabangirise re ni wenehe mbiko ngbanga ida kuti apai dunduko te. (Asanza 14:15) Ka pepai ngba kura gene, gu kapa du mo na ni re wakina gu naadu tipa aboro Beroya naadu mbata.a Ho i atungusi wene pangbanga nga ga Kindo ni fuyo, i adi gupai i agihe kugume, ono angianga mbiko gupai gbua nga i aidi kutini ni rengo ya. Kuba gure, i awisigi Ziazia Kekeapai sirisiri “si ngia agi apai wo re.” (Amokedi 17:11) Ka pepai ngba kura gene, aboro Beroya aʹasadi ka rigisa gu wene pangbanga i agihe na gu Ziazia Kekeapai agumbaha. Fuo bete regbo, i aidi kuti gupai nga mburu wene pangbanga rii Fugo Mbori.

ADezire Yekova nazungodi ro nga mo asadi ka manga kina gupai aboro Beroya amangihe. Ani nayugo Ziazia Kekeapai fu aboro gbua zanga i tumo tipaha, ani nafu momu foro mo asadi ka ringbisa gupai aDezire Yekova na idi kutini tipa ga Mbori Kindo na gu Ziazia Kekeapai ayugoho.

Kupati wirika mo pai tipa ga Mbori Kindo, wirika Ziazia Kekeapai rengbe ka undo ro mo gbia akaragapai kuti nyanyakipa asanahe nga ga raka.

• Wari ani aye ni ku auru kpotosende ane?

• Tipagine Mbori akusi aboro ti ni?

• Tipagine Mbori nambugene ti ni fu arungo?

• Gini ninaamanga rani ho ani akpiko ni?

• Ya mo i nika gbarasa gi kpotosende re?

• Gini banguapai rengbe ka ye na ngbarago fu aborokporo?

Kurigure, wirika Ziazia Kekeapai rengbe ka undo ro mo “mbédi na Mbori.” (Yakoba 4:8) A wa mo nika mbeda na Mbori ni bakerehe, kinawo mo nika bi ga Mbori Kindo na nyanyakipa ha bangiro angianga kina awere ya ono nyeanye kindi. Yesu aya rogo kparakpee wẽ: ‘Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.’​—Yoane 17:3.