Agu Apai Nandu Na Gupai Du Ti Kpotoho

Ya Mo Agi Apai Re Amangi Nzunzu?

Rogo Marungu watadu Zerekpe rogo gu garã nangia 33 Fuo Batikayo Kristo, i aimi Yesu boro Nazareta. I akitingbangako nga ko aasa aboro i samungu, i ki ta ko ni kerehe na ki kenge ko kuti ngua. Ko akpi kere iigirã kpio. Ono Mbori azingisiko, na tingbafuo arame 40 kusa, ko aga ku ngbangbaturũ yo.

Gi pangbanga re naye furani rogo agu aKitabu Wene Pangbanga biama du rogo gu papara Ziazia Kekeapai i akehe rogo pa-Giriki dungu aboro ayambaha nga Vovo Ndika. Ya mo agu apai re amangi nzunzu? Gu sanahe re rẽarẽ na si na nyanyakipaha. Ka agi apai re aamanganga ya, gure tie nga sunge ti gu idapase nga aKristano te, na gu maabangirise du yo na ni nga kungbo musumo gbua. (1 AKorindo 15:14) Ono ka si du nga agu apai re aima manga nzunzu, gure tie nga maabangirise kinaho tipa aboro ku mbata yo, nga gu rengbe mo kadu na ni. Sidu tie, ya mo agu apangbanga du rogo aKitabu Wene Pangbanga nga rengo watadu kungbo apaturẽ gbua?

GUPAI RENGO AYUGOHO

AKitabu Wene Pangbanga kia ti kungbo apaturẽ mbiko si ni ruruhe na si nafura tipa apai futufutu. Ni kpiapai, si na rimo arago rogoho, nga gu aboro naima rengba ka ndu koyo ka bihe areme. Si nafura tipa ndikidi aboro, abakeke kuru apangbanga naima nafura tipa yo nga i aima raka.—Ruka 3:1, 2, 23.

Zavura agu abakeke apangbanga naadu rogo bambata sa kama agarã na uehe aima fura tipa Yesu a.a Wai fura yo tipa pa imoko rogo Kitabu Wene Pangbanga kina sa na wai aRomo anaaimo aboro ti gu regbo re. Kurigure, agu apangbanga re fura tipa wai sino aboro adu na ki fura a tipa gu kura bete gbegberẽ apai naadu ti gu kura ga Yesu abawiriki. (Matayo 26:56; Ruka 22:24-26; Yoane 18:10, 11) Agi apai re dunduko nayugo gupai nga agu aboro naake Kitabu Wene Pangbanga ape kina rengo na agu apai i akehe adu ni ruruhe tipa Yesu.

GINIPAI DU TIGAHA TIPA GA YESU ZINGABEKPIO?

Wa vura duhe nga dungu aboro ima ida kuti gupai nga Yesu araki na ki kpi, kura aguyo na tikango ati na pa zingako be kpio. Zavura gako amokedi aaidanga kuti pa zingako be kpio ti tonatonaha ho i agihe ni te. (Ruka 24:11) Ono tie, gayo kapa ago kusayo ho i gbiati gu kura abawiriki abi ko ni ti aregbo ni bakiakia. Nirengo, ti gu kura regbo sa, adezire binibangirise bangeyo naima susa 500 abi ko.—1 AKorindo 15:6.

Wa si avura du nga i aima rengba ka zio ga Yesu abawiriki na ki imi yo tipa tungusapa Yesu, i atungusipa zingako be kpio fu aboro dũ zavura fu agu aboro naimiko. (Amokedi 4:1-3, 10, 19, 20; 5:27-32) Ya mo ka gu dungu abawiriki re adu na gu wingbaduse re ka i ainongo ho nzunzu nga Yesu aima zingabekpio ya? Nirengo, pa zinga Yesu be kpio naasa gu pambori nga ga aKristano si du na ome kurii zegino ti gu regbo re na awere a.

Gu pangbanga du tipa pakpio Yesu na pa zingako be kpio du rogo Kitabu Wene Pangbanga na agu ago apai rogoyo dunduko nayugoho nga si nga ndikidi apangbanga namangi amanga. Ka mo gedihe wenengai si nika sa ro mo idi kuti gupai nga agi apai re aima manga nzunzu. Pa ino mo ndu gupai agi apai re amangi ti ni nika nyakasa gamo ida kina kumbatayo. Gu kekepai ngbefuo gere nika sakapai tipa gipai re.

a Tisito, i avunguko bara rogo 55 Tingbafuo Batika yo Kristo, ake gupai nga “Christus nga gu boro i adi gu rimo nga ga [aKristano] tini, i ambusi ko ni kerehe ti regbo gu zogarago nangia ga Tiberia vurube gu gbia nangia Pondio Pirato.” Suetonius (rogo bambata sa kama agarã); bakeke kuru apangbanga nangia Yozefasi (bambata kama agarã) na Pliny gu Paranga ko, nangia banyaki Bitunia (ti tonatona ue kama agarã) afuraha tipa Yesu a.

Tipagine Kura Awaraga Afuranga ti ni Tipaha Ya?

Wa duhe nga dungu aboro ima inopai tipa Yesu rogo zegino, ya mo si naida ani berẽhe nga si naida kura waraga kia fura tipa Yesu nga ko aima raka na ki kpi na ki zingi be kpio? Anga wo nzunzu te. Mbiko ndupai sa nga, i ake Kitabu Wene Pangbanga agarã wa 2,000 kusayo. Kina bete agu awaraga naadu ti gu regbo re du awere. (1 Petero 1:24, 25) Gu kurapai berewe nga, asogo Yesu aarengbanga ka ke gupai ka sa aboro i idi kutiko te.

Nibipa ga Yesu zingabekpio, Petero nangia boro sa dagba gako amokedi yo asakipai nga: ‘Ko rame adu ue Mbori ki zingisi ko, ki yugu ko ayugo gbayaga, fu aboro dunduko te, fu kina agu adezire Mbori asia yo mbata, fu kina rani, nga agu aboro nari riahe ki mbiri he na ko fuo zinga ko be kpio.’ (Amokedi 10:40, 41) Tipagine ko ayugongo tiko ti ni fu aboro dunduko ya? Gu Kitabu Wene Pangbanga nga ga Matayo nape gupai furani nga ho agu aboro pambori nangia avura Yesu agi pa zingako ni be kpio, i agbatagene tipa ka oka gu pangbanga re ka si gbandaka nga ya.—Matayo 28:11-15.

Ya mo gere nayugo gupai nga Yesu aaida pa zingako be kpio du ni okõokõho? Oó, bambiko Petero agumba kurapai nga: “Ko ki ya fu rani ani nitungusi he fu aboro, ki nigumba gu pai nga, ko du re nga gu ko ya Mbori ko du ni basapungbanga unga aboro na kangba aboro.” Ndikidi aKristano aima mangaha na i namanga kinaha awere.—Amokedi 10:42.