Sanduki Sanahe

◼ Ginipai rengbe aboro dunduko ka mangaha tipa ka sa agu adunguratise nga ga dungurati niwene ba wirikapai? (Pa Rug. 31:12)

Tipa ka yugo irisa tipa Yekova na gu momu fuko ho furani nga ga agu adunguratise nga dungurati, si naida aboro dunduko da mbata fu regbo tipa ka wirikapai be Yekova. Si niwenepai ka sungo rii agu abasungo du kumbatayo ki mbu agu du kusayo fu agu aboro du na agude beyo gbiati aguyo ninaaye ti kura aregbo kusa. Mbata fu tona dunguratise, si naida aboro dunduko mbakadi bara agu aũsunge duwa terefuni tipa ka si fudinga aboro ya. Ka aboro dunduko du na irisa ti regbo dunguratise, apai dunga ho ka fudi aboro te.​—Batu. 5:1; Frp. 2:4.

Ho vovo aboro atona ye ni tipa adunguratise, si angba angba ka gu boro inidiyo sungu pati yó. Sungo pati yó rengbe kadu na bakere undo fuyó, gbe, ka si du nga i na agude beyo nga aguyo si aida i raba yó. Ye kupati adunguratise rengbe kadu fuyó nivovopai. Ka si duwo, i rengbe ka bi gupai nga sungo yó rii agu abasungo du kusayo ngba gbe tipa kaa ngerafuo awiriyo zanga fuda aboro. (Snz. 22:6, 15) Si adanga agu aboro duna rukutu agude beyo sungu rogo gu kura ba kia nga gu nika fu momu fu agude i naataka ngbayo te. Ka si du nga nagude watadu bagude naida ka fu rugute fu gude ti regbo dunguratise, si adu niwenepai ka ní kuru akura ku zagiyo na wirini, fuoho, ní ki karaga tiní ku dimoyo.

Agu aboro nambakada ba aboro namangasunge tipa ka sa ba dunguratise niwene ba irisombori. I nambakada ba aborokporo na agu aboro ninaaye kusa ti kura aregbo tipa i gbia agu abasungo ngbaangba tipa yó. Si naida i duna rugatinapai nibipa wai i asunguso aboro tipa ka i fudinga agu aboro niima susungo ya. Si naida a i mangisunge na rugatinapai ho gupai amanga ni nagbeberã aboro. Ka si du nga gude namanga gupai nagbeberã aboro agbe ti giapai, si naida agu aboro nambakada ba aboro fu undo rogo wene gene.

Agu aboro dunduko du pati dunguratise tipa irisombori rengbe arengba ka sa gu ba re niwene ba wirikapai tipa Yekova na tipa gu gako ringbisapai du tipa gu vovo zegino nikadu na zereda rogoho gbiati rurupai.​—Eb. 10:24, 25.