Oni Zungodi Aboro Kuti Gupai Oni Ayugoho Fuyó

1. Wene mangasunge na Ziazia Kekeapai gene sunge tungusapai yo nakoda gine?

¹ Wene abatungusipai wa gu ko nangia Pauro ima ino gupai nga, tipa boro niyugu agu afugo nga ga ‘rengo nzunzu,’ si nakoda kura dungu apai angianga kina dogoda agu afugo du rogo Ziazia Kekeapai gbua ya. (2 Tim. 2:15) Ho ani ayugopai ni fu aboro rogo Fugo Mbori, wai gu rengbe ani ka “zungodi” yó?​—Amo. 28:23.

2. Wai rengbe ani ka sa aboro i bi Ziazia Kekeapai na nyanyakipaha?

² Oni Gbeberãyo Kuti Fugo Mbori: Gu bambatapai si aida oni mangihe nani nga ka gbeberãyo kuti Fugo Mbori ngba gu gene nika sa yó i bi gupai nga, agu apai du rogoho nga gu tatamana naye ariyo. Gu kido du ani na ni kuti Ziazia Kekeapai rengbe arengba ka sa gu boro ani atungusapai funi ní degetuni wenengai kuti gu veresi ani agedaha. (Eb. 4:12) Ani rengbe ka tonaha na agu afugo nga: “Mi nabihe nga si ngba angba ka ani gedi gupai Fugo Mbori apehe tipa gi pai re. Ani gedinga gupai si agumbaha.” Ho daha adani, oni mbu Fugo Mbori si fura ni geda oni he.

3. Fuo geda oni veresi, ginipai rengbe oni ka mangaha tipa ka undo gu boro oni atungusapai funi re tipa ní gi rogoyo wenengai?

³ Gu uepai si aida oni mangihe nga ka saka rogo Ziazia Kekeapai yo. Si nidu nikpakarakpakaraha fu kura aboro i gi rogo veresi yo ho i agedaha ni fuyó ti bambata regbo. Ho duhe ni wo, si naida oni saki rogo yo asaka tipa i gi tiyo nani. (Ruka 24:26, 27) Oni gbeberãyo kuti gu banguapai du goro gu veresi re nga gu nasongoda gupai oni afura riipaha. Oni rengbe ka sana ní na sanahe tipa ka ino singia ní gi rogo gupai du rogo gu veresi re nzunzu wenengai.​—Snz. 20:5; Amo. 8:30.

4. Gini biatapai si aida ani mangihe?

⁴ Oni Sakipai Tipa Gu Veresi Re: Gu biatapai si aida oni mangihe nga ka asada tironi ka rimiso pai ku ngbaduniyo na ku berãniyo. Oni undo ní tipa ní ini wai gu veresi re narengbe ka undo ní. Sakapai na boro rogo Ziazia Kekeapai ima rengba ka undo ní ní sa gani berãpai. (Amo. 17:2-4; 19:8) Nikpiapai, fuo geda oni Atambuahe 83:18, oni rengbe ka sakapai na ní riipa wai du pa ino rimo boro ni banguapai rogo pagume. Fuani, oni rengbe ka sana ní nga: “Ya mo oni naberãha nga ino oni rimo Mbori nika sa gaoni kpe si duna rogoyo ti ni?” Ringbisa ga gu boro re raka kuti gupai du rogo Ziazia Kekeapai rengbe ka nasa ní nibi gupai du rogo Ziazia Kekeapai na nyanyakipaha. Ka oni yugu Fugo Mbori fu aboro ngba gi gene re, oni undo yó aundo i ye ka iriso gu ndikidi Mbori nga Yekova.​—Yere. 10:10.