‘I Atungusa gi Wene Pangbanga Re Atungusa!’
1. Wai gu ini ani he nga boro ho rengbe ka rugusa sunge tungusapai te?
1 He ho rengbe ka ká na Yekova ti manga ko gupai ko akpinyemuhe te. (Yes. 14:24) Wa si avura du nga gu basapungbanga nangia Gidiona na agu akumba nadu na ko 300 arengbanga ka diabe ga aMidiano abanzengere bangeyo adu nga 135,000 te, Yekova aya fu ko wee: ‘Mo abatasa aYisaraere be aMidiano; a nga mi nakeda ro, te?’ (Abasa. 6:14) Gini sunge Yekova asongodaha areme? Yesu ayaa: “Gi wene pangbanga nga ga ngbi re i atungusa ha rogo zegino dunduko.” (Mt. 24:14) Boro ho rengbe ka rugusa gi sunge re te!
2. Tipagine rengbe ani ka maabangirani ti ni nga Yekova rengba arengba ka undo rani nibasasa tingba sunge tungusapai?
2 Yekova Naundo Rani Nibasasa Dunduko: Wa vura duhe nga ani na gu kido nga Yekova naundo gako adezire aundo wa du yó nibadona, ya mo ani rengbe ka maabangirani nga ko undo rani aundo nibasasa? Ti gu regbo Pauro aida na undo, Yekova aima nyakasa ko rogo wiriko yo nga Yesu. (2 Tim. 4:17) Ani rengbe kadu naa kido a nga, Yekova nika fu maku afu kurii gu gaani asadatise ani amangaha tipa ka manga gupai ko kpinyemuhe.—1 Yo. 5:14.
3. Rogo gini agene Yekova aundo rani?
3 Ya mo pa baka oni bangironi tipa raka na auru dunduko na nabatasa omeroni abatasa ti sunge tungusapai? Ziazia Kekeapai nakidohe niyaa: “Ko nafu tandu fu gu ni he amaka ni.” (Yes. 40:29-31) Ya mo oni nagbia tironi na arungosi watadu sogote? ‘Oni bá gaoni tindiro ku auru Yekova, ko asóngoda roni asongoda.’ (Tam. 55:22) Ya mo kura aregbo kinaho oni naabi tironi nga oni arengbanga ka tungusapai te? Yekova naya oni ndu ka tungusaha, ko ‘aduadu na ngbaroni.’ (Gate 4:11, 12) Ya mo akakaza nasa gupai nga ka oni tungusinga pai gbe ya? Yekova nabi gu sunge tungusapai nga gu rẽ na ome roni re na nyanyakipaha ka si vura du niumbaha vurũ.—1 Kor. 3:6, 9.
4. Padu ani naa kido kuti Yekova naundo rani rogo gini gene?
4 Be Yekova “du ni taĩtaĩ he, da nikamina ha?” (Yes. 14:27) Wa du ani na gu kido nga Yekova nika fu maku afu kurii gaani sunge tungusapai, ani ndunga andu nani kindi kumbatayo zanga nyomoro kini tungusipai “gbayaga mbiko Gbia.”—Amo. 14:3.