Oni Raba Awironi I Da Ni Abamangisunge fu Mbori
1. Ginipai Atambuahe 148:12, 13 anyakasaha fu agu avunguagude nga aKristano i mangihe?
1 Yekova nayamba rukutu agude i ye ka tambuako. (Tam. 148:12, 13) Sidu tie, agu avunguagude nga aKristano namanga bakere ome tipa ka yugo Ziazia Kekeapai gbiati gu ga Mbori arugute du tipa ruru mangapai fu awiriyo. I naraba yó a i da ni abatungusi wene pangbanga. Wai rengbe avunguagude ka manga gipai re tipa awiriyo sono kumbatayo?
2. Wai rengbe gu wene kpiapai nga ga vunguagude kadu na ome kurii awirini?
2 Wene Kpiapai: Gu basapungbanga nangia Gidiona agumba gupai fu gu gako akumba nadu 300 nga: “Oni bi kina re, ki mangi a wa mi ka manga.” (Abasa. 7:17) Sino agude ningia bi gupai avunguyo amangaha na kini wirikihe. Kura vunguagude sa namangasunge yuru, ho ko niga ni ku kporoyo Rago Nzengu wiso, ko nidi awiriko ki ndu naayó ku gene tungusapai yo kuba gupai nga ko nara kina rame gbua mbiko gu mbugo du ko nani. Gi gako kpiapai re nayugo gupai fu awiriko nga tungusapai na nyanyakipaha. (Mt. 6:33) Ya mo awironi naabi roni dedede oni mangi agu apai nga ga toro na ngbarago, ngbatunga gu duwa kparakpee, geda Ziazia Kekeapai, karagapai ti regbo adunguratise, na tungusapai? Kina rengo du nga, oni arengbanga ka manga apai dunduko nirengberengbehe te. Ono awironi ima rengba ka degatuyo kuti gu ome oni mangaha ka yugopai fuyó i irisi Yekova ka i bi gupai nga oni namangasunge fuko zanga nyomoro.—Pa Rug. 6:6, 7; Rom. 2:21, 22.
3. Gini asásá nga ga toro si aida avunguagude undo awiriyo i moihe na ki da ti ni?
3 Agu Asásá Nasona Kumbatayo: Avunguagude naamanga ome kakaka ka yugopai fu awiriyo i ini wai ka ndu, ka fura, ka vo rokoo, na kuraapai. Ho agude atona ka nyaka ni na ariapai ki tona ka manga rogo gayó raka yo, i nagbiatiyo na kura vovo asásá. Ka avunguyo du ni aKristano, i rengbe ka undo awiriyo i moi agu asásá nga ga toro ringbisihe kina kuti agarãyo na gu tandu mangapai du yó nani. (1 Kor. 9:26) Ya mo oni nayugopai fu awironi i nikaragapai ti regbo adunguratise zanga gedaha ageda na kini undo yó i nimbakadi agu agumbapai i afuhe fuyó rogo Gu Sukuru Nga ga Siokrasia? (Tam. 35:18) Ya mo oni naraba yó i nimangi asunge tungusapai nibakiakia? Ya mo oni namaa agu asásá fuyó nga ga bapatiza na gu nga ga mangasunge tungusapai ti aregbo dũ? Ya mo oni naundo awironi i naakodatiyo dedede na agu abatungusipai natungusapai zaaza na ngbarago wa ka i angarasa yó?—Snz. 13:20.
4. Wai gu agude agbia undo be agu avunguyo naundo yó tipa i dani ga Mbori abamangisunge tona ti kina gu regbo du yó kindi rukutu?
4 Bake apapara Atambuahe ayaa: “Ako Mbori, mo atona yugo pai fere mi du ni parangare, mi nataka pande pa ga iiriwo mangaapai kindi.” (Tam. 71:17) Oni raba awironi mbuyo kindi rukutu i da ni ga Mbori abamangisunge. Agu asásá nga ga toro oni ka undo yó i moihe awere, si nika undoyo aundo nirengo ho i nika sona ni.—Snz. 22:6.