Oni Mbakaditironi Awere Tipa ka Kiiso Gaoni Sunge Tungusapai

1. Gini amomu nidu berani rogo agu adiwi nga ga Tingida Pakpio Yesu, na wai rengbe ani ka mbakadatirani tipaha?

¹ Ti regbo Tingida Pakpio Yesu, ani nidu na amomu berani rogo agu adiwi nga Marungu, Zerekpe, na Merekoko tipa ka fu “bakere tambuahe fu Yekova.” (Tam. 109:30) Ya mo oni akiiso gaoni sunge tungusapai rogo gu diwi nga Marungu tipa ka yugo gaoni tambuahe fu Mbori tipa ga Yesu motumo tumori? Awere nga gu regbo si aida oni tona mbakadatironi.—Snz. 21:5.

2. Gaoni mangipai angia gine rogo gu garã nasusi kuti gu mbakadapai nangia ga mangasunge nimoundo abazakigene tipa bete asaa rogo Zerekpe?

² Sunge Tungusapai Nimoundo Bazakigene: Rogo gu garã nasusi, adungurati angbiko ningbarago tipa gu wene mbakadapai naadu tipa ka mangasunge nimoundo abazkigene tipa bete asaa rogo gu diwi nangia Zerekpe. Kura wirina sa nikumba akepai kiyaa: “Mi kindi sukuru yo, mi aagbianga regbo tipa ka mangasunge nibazakigene te. Mi nika hiiso fuomu nga ga moundo abazakigene tipa asaa 30 ono ki mangi asaditise tipa ka gbia asaa 50 rogo gu diwi nga Zerekpe.” Kura wirina sa nidee namangasunge marã ti aregbo dũ akepai kiyaa: “Si taata tipa boro gbia asaa biata bawe!” Ho i apepa gi mbakadapai ni re rogo dungurati, kuru nazakigene sa du garãri awere nga 80 ayaa: “Gere nga gu regbo mi naasungudo ho! Yekova ima ino gupai nga agu aregbo mi anaamangasunge abazakigene, si nangia wene aregbo rogo gi raka yo!” Gu kura aboro naarengbanga ka mangasunge nimoundo abazakigene ya, i amoi gu sásá nga ka kiiso gayo sunge tungusapai.

3. Gini nduapai duho tipa berãpa mangasunge nimoundo abazakigene rogo agu adiwi nga Marungu, Zerekpe, na Merekoko?

³ Marungu nikangia wene diwi tipa ka mangasunge moundo abazakigene bambiko aboro nikadu berewe na siapai beyo singia i naida ka tungusapai tipa asaa 30 watadu 50. Kurigure, tona Rago Nzengu rogo Marungu ti rameru 17, ani nikadu na kparakpara tua tipa ka yamba aboro i ye tipa Tingida Pakpio Kristo nga gu nikadu ti ramediwi 5 nga ga Zerekpe. Dungu aboro nikadu na ngbarago mbiko kiiso yó gayo sunge na si ki sayo i idi ka mangasunge ni amoundo abazakigene rogo agu adiwi nga Zerekpe na Merekoko tipa asaa 50.

4. Wai gu ani nikadu na rengbe berani ka kiiso gaani sunge tungusapai, na gini wene sangbanaha?

⁴ Ti regbo gaoni Irisombori Nga ga Aborokporo, si angba gbe ka oni sakipai tipa wai rengbe oni nibasasa dunduko ka kiiso gaoni sunge tungusapai rogo agu adiwi re. (Snz. 15:22) Oni sana Yekova tipa ko fu maku kurii gaoni asadtise. (1 Yo. 3:22) Wa oni ka kiiso gaoni sunge tungusapai, anga gupai gbua oni nika mangaha nga ka tambuahe Yekova te, ono oni nika kiiso gaoni ngbarago a.—2 Kor. 9:6.