Agene Bisue Tipa ka Gbia Boro ka Wisigo Ziazia Kekeapai na Ní

1. Ka si du nga si nikpakarakpakaraha tipa ani gbia boro rogo gaani dagbarago ka wisigo Ziazia Kekeapai na ní, ginipai si aida ani mangihe na tipagine?

¹ Ya mo oni mangingo nyanyaki asadatise tipa ka gbia boro ka wisigo Ziazia Kekeapai na ní ka oni agbianga ní ya? Ka oni mbunga manga asadatise ya. Yekova nafu maku afu fu agu aboro ambunga manga asadatise tipa ka manga gupai ko akpinyemuhe ya. (Gara. 6:9) Aberãpai bisue gu du kusende re tipa ka undo roni.

2. Wai gu rengbe ani ka gumba pa wisigo Ziazia Kekeapai fu aboro?

² Gumba Paha fu Aboro: Badungu aboro ini gupai nga ani naafu Ngbaõbambu Sinziri gbiati Awake! fu aboro, ono i ainongo gupai nga ani naawisigo Ziazia Kekeapai na aboro te. Si rengbe kadu niwenepai ka ani gumba pa wisigo Ziazia Kekeapai fuyo ho ani atungusapai ni kini tanga nani ti akporo. Ani rengbe a ka sana agu aboro du na nyemupai tiyo ho ani akaraga tirani ni berewe fuoyo singia i naida ka wisigo Ziazia Kekeapai. Ka i aidanga ha ya, ani rengbe kaa fu awaraga kindi fuyo kini ru nyemupai kpotoyo yo. Kura wirina sa nikumba adogodi fuo kura arogotise sa tipa dungu agarã kaa fu amagazini fuyo. Ni kura uru sa, fuo fuko amagazini fuyo, ko asatiko ka ndu ono mbata fu ko ndu, ko asana yó nga: “Ya mo oni naida ka wisigo Ziazia Kekeapai?” Kina ngbako nazere ka gia gu gayo karagapai nangia ii. I awere ni agu awirina naima zio bapatiza.

3. Ya mo si naida ani bere gupai nga agu aboro dunduko naye tipa adunguratise nawisigo Ziazia Kekeapai? Oni sakinga rogoyo.

³ Agu Aboro Naye Tipa Adunguratise: Ka oni berẽnga gupai nga agu aboro oni abi yó ba adunguratise yo dunduko nga agu aboro naima tona wisigo Ziazia Kekeapai ya. Wirina nikumba sa ape gupai nga: “Badungu agu aboro mi nawisigi Ziazia Kekeapai naayo nga agu aboro mi atona fugo naayo tifuo ye yó tipa dunguratise.” Wirina sa nidee adiberã ka fura na kura dee sa were niboro zee agu awiri nga adegude aima zio bapatiza kidu rogo dungurati. Gu dee re aye tipa adunguratise tipa agarã wa 15, ri anirimi ku Bambu Kindo yo ho dunguratise ani tona ni na ki kuru tifuo si nyasi nibasa. Gu dee re aidi ka wisigo Ziazia Kekeapai na ri ki gi rengo. Gu wirina nawisigi Ziazia Kekeapai na ri re ayaa: “Gupai sa nagberã tire nga mi adi agarã 15 mbata mi niru ka sana ri tipa ka wisigo Ziazia Kekeapai na ri!”

4. Wai gu rengbe oni ka gbia boro tipa ka wisigo Ziazia Kekeapai na ní mbiko sanahe?

⁴ Sanahe: Gu kura wirina sa nidee ninaandu na kura awirina ho i andu ni fuo agu aboro i awisigo Ziazia Kekeapai naayo. Tifuo agu awirina ri agasa yó re nyasi wisigo Ziazia Kekeapai, ri nihopai beyo ka sana gu boro i awisigo Ziazia Kekeapai na ní singia boro ho ní naini pani nga gu ní naida ka wirika Ziazia Kekeapai. Ho oni afu gu buku ni nga Ziazia Kekeapai Ayugoho fu gu boro oni aima digo nindu fuoni, oni rengbe ka sana ní nga: “Ya mo oni ini kura boro nga gu ní rengbe ka ida na gi buku re?” Ti kura aregbo, si arengbanga kadu taata fu abatungusipai na abazakigene i tona wisigo Ziazia Kekeapai na gu boro i nagbia ní rogo dagbarago te. Sidu, oni gumbaha fu kura aboro nga oni naida aida ka wisigo Ziazia Kekeapai na boro.

5. Tipagine si aida ti ni ani sana agu abadiarogatise nga ga agu aidipase du rogo dungurati angianga ndikidi aidipase ya singia i naida ka wisigo Ziazia Kekeapai?

⁵ Agu Abadiarogatise Angianga Ndikidi Aidipase Ya: Ya mo abatungusipai ho rogo gaoni dungurati nga aguyo adunga gayo abadiarogatise ni ndikidi aidipase ya? Agu akurayo kinaho naka aka ka fura riipa Ziazia Kekeapai na gu gayo badiarogatise nga idipase ono i rengbe arengba ka ida ka fura riihe na gu boro adunga naayo kporo ya. Dedede, si niwenepai ka fura mbata na gu gani badiarogatise nga idipase tipa ka ino gu regbo ngbaangba gbe tipa ka fura nani.

6. Wai gu nyanyakipa kparakpee ho ani amanga asadatise ni ka gbia boro tipa ka wisigo Ziazia Kekeapai na ní?

⁶ Kparakpee: Ka oni bingo kparakpee na umba paha ya. (Yak. 5:16) Yekova kidohe nga ko nika degatuko adega kuti gaani akparakpee ka si du nga si na ngbanya na gupai ko akpinyemuhe. (1 Yo. 5:14) Wirina sa nikumba nga gu ko naadunga na regbo beko ya atona ka kpara tipa boro ka wisigo Ziazia Kekeapai na ní. Diako atona ka baka kina bangiri singia ko agbia regbo ka ngerafuo gu boro re ka ko gbia ní, gbe ka si du nga ní na dungu akpakarapai tiní. Sidu, ri agumba agu apai re fu Yekova rogo gari kparakpee yo ho ri akpara ni fu Yekova tipa ko undo kumbaari ko gbia boro ka wisigo Ziazia Kekeapai na ní. Yekova akaragapai kuti gayo kparakpee tifuo aposo ue ho kura nazakigene sa rogo dungurati agbia kumba ni naaida ka wirika Ziazia Kekeapai na ki fuko fu gu wirina re tipa i wirikipai naako. Dia gu wirina re akepai ki yaa: “Gu boro naberã gupai nga gene arengbanga kadu beni wa ka ní wisigi Ziazia Kekeapai na boro te, mi nagumba gupai funi nga: Mo gumba kina boro gupai namanga ro fu Yekova rogo kparakpee yo, na ka mo mbunga manga kparakpee tipaha ya. Ani gbia bakere ngbarago susi gu ka ani aberẽ paha.” Ka oni mangi bakere asadatise gbe, oni rengbe arengba ka gbia boro ka wisigo Ziazia Kekeapai na ní na ki gbia gu ngbarago naye fu gu boro naundo boro ní da ngba “gu gene nangbe koyo du unga ni.”—Mt. 7:13, 14.