Ka Mo Kanga Kina Kuti Bangisapai Ya—Ho Du Badungu Apai Ni
1. Tipagine kura abatungusipai naamanga ndundu ti ni ka sana boro tipa wisigo Ziazia Kekeapai?
1 Kura aboro naamanga ndundu ka sana boro tipa wisigo Ziazia Kekeapai na ní mbiko gupai nga apai ima nge kutiyo. Ngerafuo bawiriki Ziazia Kekeapai nadia regbo adia. Si naida regbo aida tipa ka mbakadatise tipa wisigopai na boro, na tipa ka wisigopai na boro, na ka undo bawiriki Ziazia Kekeapai nidibe agu akpakarapai rengbe ka sa ní ka ní sononga kumbatayo ya. Gu mokedi nangia Pauro ayawee ko afu mbisimoko ka undo agu aboro naadu Tesaronika yo i ini Yekova. (1 Tesa. 2:7, 8) Wai rengbe ani kaa wisigo Ziazia Kekeapai na boro ka si vura du nga apai ima nge kutirani?
2. Nyemu Yekova nasa rani ani mangisunge wai na gaani regbo?
2 Irisombori Nadia Regbo Adia: Gu rengo duho nga irisombori naida regbo aida. Nikpiapai, ani naadia regbo dedede kuti nduge tipa adunguratise, kuti tungusapai, ka geda Ziazia Kekeapai, na ka kpara. Gu boro naima manga rogatise, ní nadia regbo adia na ngbarago ka sungo na gani badiarogatise, ka ní vura du na badungu asunge beni vurũ. Ka si du nga wo duhe, angbatika gu tie nga ka ‘banda’ regbo tipa ka iriso Yekova mbiko gupai nga ani nakpinyemuko. (Ef. 5:15-17; 1 Yo. 5:3) Nibi gupai Yesu apehe, sunge sa aboro ni abawiriki nga nyanyakipa papara gaani irisombori. (Mt. 28:19, 20) Berãkurii gipai re rengbe ka undo rani ka ani oronga be gu sunge du kurirani nga ga wisigo Ziazia Kekeapai na aboro ya.
3. Wai rengbe ani ka ngerafuo gaani bawiriki Ziazia Kekeapai zavura ho du badungu apai ni tirani?
3 Na ka si du nga sunge, bangabanga kaza, watadu agu asunge nga ga siokrasia nadia bakere regbo berani? Gu kura abatungusipai ninaata kurogo kura aba ti kura aregbo, i naawisigo Ziazia Kekeapai na gayo abawiriki Ziazia Kekeapai rogo terefuni watadu rogo Internet. Agu aboro duna bangabanga akaza tiyo, i naamanga mbakadapai amanga na gayo abawiriki Ziazia Kekeapai i niye fuoyo ku kporoyo tipa wirikapai. Kura aboro naamanga mbakadapai na kura abatungusipai tipa i niwirikipai na gayo abawiriki Ziazia Kekeapai ho adunga yó ni ho ya.
4. Gini amaku naye mbiko manga ani sunge wisigo Ziazia Kekeapai na aboro?
4 Pauro agbia bakere ngbarago mbiko fuko gako regbo na ome tipa ka undo aboro i wiriki rengo. (Amo. 20:35) Ho ko aberẽ ni kuriipa gu sunge ko amangihe Tesaronika yo, ngbadukoyo afõ ko ko fu tambuahe fu Yekova. (1 Tesa. 1:2) Gaani ngbarago rengbe ka kio tingba sunge tungusapai ka ani ambunga agu apai du tirani si sarani ani he wisigo Ziazia Kekeapai na aboro ya.