Wisigo Ziazia Kekeapai na Aboro Ngba Wene Gene

1. Gini tindiro du agu abatungusipai nawisigo Ziazia Kekeapai na aboro na ni?

¹ Boro ho sa rengbe ka iriso Yekova te kinagu ka ko “gbe” ni koyo du ko ni. (Yo. 6:44) Wa vura duhe wo, agu abatungusipai nawisigo Ziazia Kekeapai na aboro, si naida i naamanga ome gbe tipa kaa undo aboro i mbedi koyo du gu Bayo ni du ngbangbaturũ yo. (Yak. 4:⁠8) Tipa i mangi gipai re, si naida i naambakada tiyo ambakada wenengai. Kungbo geda agenewaraga na kini sana agu asanahe du yo arengbanga ka undo agu aboro ani awisigo Ziazia Kekeapai na yo i girogo gu pangbanga yo ani atungusaha na ki mangi sonakumbatayo te.

2. Ginipai rengbe ka manga ka ani wisigi Ziazia Kekeapai na boro ngba wene gene?

² Tipa ka wisigo Ziazia Kekeapai na aboro wenengai, si naida abatungusipai undo agu aboro i awisigopai na yo tipa (1) i girogo gupai yo Ziazia Kekeapai ayugoho, (2) i idi kuti gupai Ziazia Kekeapai ayugoho, na (3) ki mangipai kuti gupai Ziazia Kekeapai ayugoho. (Yo. 3:16; 17:3; Yak. 2:26) Si nadia adiwi adia tipa batungusipai undo boro ni mangi agi apai re. Ono agu apai re nibasasa dunduko naundo ni tipa ni sonosi pagume dagba ni na Yekova na ki kpara tiní fuko.

3. Tipagine wene abayugupai ninaasana asanahe ti ni?

³ Ginipai Du Berã gu Boro Yo Oni Awisigo Ziazia Kekeapai Na Ni?: Ka ani aida ka inoho singia gu boro ani awisigo Ziazia Kekeapai na ni nagia rogo gupai yo ani ayugoho funi na kini idi kutini, si naida ani mbu bakere fugo na kini sana ni tipa ni naagumba gupai du berani yo. (Yak. 1:19) Ya mo ni gi tiní wenengai na gupai Ziazia Kekeapai agumbaha tipa gupai oni awisigoho re? Ya mo ni rengbe ka sakapai tipa gupai re rogo afugo ni yo? Ni nabi gupai ni awirikaha re wai? Ya mo ni idi kuti gupai nga gupai Ziazia Kekeapai agumbaha daha ada? (1 Tesa. 2:13) Ya mo ni ini gupai nga gupai ni awirikaha re si naida si mangi ariapai amanga rogo gu gene yo ni araka gani raka ngbaha? (Koro. 3:10) Tipa ka gbia karagapai kuti ngbatunga agu asanahe re, si naida ani sanahe rogo birĩ yo na ki degeturani ka kia karagapai.​—⁠Mt. 16:​13-16.

4. Ginipai si aida ani mangihe ka ani kparia gupai nga gu boro ani awisigo Ziazia Kekeapai na ni apai kinaho kpakara akpakara funi ni girogo yo na ki mangipai kutini?

⁴ Si nadia regbo adia tipa boro mangi ariapai rogo gu gene yo ni naamangapai ngbaha watadu rogo gani berãpai yo. (2 Kor. 10:⁠5) Ono na ka gu boro ani awisigo Ziazia Kekeapai na ni aidanga kuti gupai ni awirikaha na ki mangipai kutini ya? Si naida ani du na zerangbaduse tipa ka mbu regbo fu Fugo Mbori gbiati ziazia toro si mangisunge ngbadu gu boro re yo. (1 Kor. 3:​6, 7; Eb. 4:12) Ka ani kparia gupai nga gupai ani awisigoho na boro mbu ambu funi tipa ni girogo yo watadu ni mangipai kutini, ka ani mangingo ni ngbaome ya, ono ani rengbe ka gu kuti gu kurapai kia. Wa ani kaa yugopai funi na zerangbaduse gbiati nyemuse rogo Ziazia Kekeapai yo, ni nika tona atona kaa manga ariapai kuti agu apai ni awirikaha.