Mo Mangipai Kuti ga Yekova Arugute du Tipa Ruru Mangaapai

Yekova Mbori ima fu arugute fu aboro tipa ruru mangaapai. Ni kpiapai, ko ru ndiko nga rogatise nga gu kodatise si aida si nyeanye kindi dagba kumba na dee. (Mt. 19:4-6, 9) Ko ima soga ngbatunga wasiwasi akodaba nabaha dunduko. (1 Kor. 6:9, 10) Ko ima fu arugute a tipa vo roko na mbakadatise nga gu nasa gako aboro i du kia.—Pa Rug. 22:5; 1 Tim. 2:9, 10.

Rogo gi zegino du areme re, badungu aboro naka ga Yekova arugute. (Rom. 1:18-32) I nambu gu bipai du dungu aboro na ni si du na ome kurii gayo voda roko, mbakadatise, na mangaapai. Badungu aboro naba pa gu gbegberẽ apai i amangaha na kini bisirapa agu aboro naraka kuti agu arugute nga ga Mbori.—1 Pet. 4:3, 4.

Wa ngia ani aDezire Yekova, ani du wa ka ani mangipai na wingbaduse tipa ka kakuti Mbori arugute du tipa ruru mangaapai. (Rom. 12:9) Ngba gini gene? Si naida ani mangipai na tatamana tipa ka manga gupai ko aidaha. Ono si naida ani banda gako nyanyaki andiko nga ga ruru mangaapai. Ni kpiapai, ho ani asia gu ngbatunga vo roko ni na mbakadatise ani aidaha, ani rengbe ka sana tirani nga: ‘Ya mo gimi siapai nandu kuti ga Yekova arugute watadu si nandu kuti gu bipai nga ga zegino? Ya mo gimi vo roko na mbakadatise nayugo re ni gu Kristano nagunde ti Mbori?’ Watadu ho mi asia gu vidio ni mi aida ka bihe, mi rengbe ka sana tire nga: ‘Ya mo Yekova naida na gi vidio re? Gada arugute du nga ga mangaapai si asongodaha? Ya mo gimi asiapai nga ga aũngbarago narungburasi gimi ruru mangaapai? (Tam. 101:3) Si rengbe kadu ni mbia kota fu gimi aborokporo watadu kura aboro?’—1 Kor. 10:31-33.

Tipagine duhe ti ni ni nyanyakipa pai tipa ka kakuti ga Yekova arugute du tipa ruru mangaapai? Bara mbeda, Kristo Yesu nika gbarasa zegino gbiati gbegberẽ apai dunduko. (Yeze. 9:4-7) Kina agu aboro namanga gupai Mbori akpinyemuhe nika nye. (1 Yo. 2:15-17) Sidu tie, si naida ani sonosi manga ga Yekova arugute du tipa ruru mangaapai tipa wa ka agu aboro nabi gaani wene mangaapai rengbe kafu taarimo fu Mbori.—1 Pet. 2:11, 12.

ONI BI GU VIDIO NGA, BECOME JEHOVAH’S FRIEND—ONE MAN, ONE WOMAN, NA KI SAKIPAI TIPA AGI ASANAHE DU KU SENDE RE:

• Tipagine duhe ti ni ni pa tatamana kaa raka kuti ga Yekova arugute?

• Tipagine si aida avunguagude tona yugo ga Yekova arugute du tipa ruru mangaapai ti ni fu awiriyo mbuyo kindi rukutu?

• Wai gu rengbe paranga aboro na sosono aboro ka undo aboro tipa i gbia undo ti ga Mbori wene sino?