Rurupai na Irairapai: Mo du wa ka mo Mangi Siapai
Gu gene raka ani asia ka raka ngbaha nika du na bakere maapai kurii wai apai nika du furani kumbatayo singia ani adu na ngbarago watadu gberãrago. Yekova Mbori ima ino gupai re. Si nga ndu gupai ko aida ani raki ti ni kuti gako arugute.
Yekova naida ani du na zereda na ngbarago rogo raka yo.
“Mi nga Yekova ga Mbori, nayugo pai foro sa u, nga gu ko nangbe ku mbata yo foro ngba gu gene mo ka ndu ngba ha. Akõ! ka mo adege turo sa gimi arugute! Si du ka ga zereda adu ti ni wa di, na ga rurupai wa ngiri baime.”—Yesaya 48:17, 18.
Wa ngia Mbori Bakusirani, ko ima ino gu bawene gene raka si aida ani raki he. Ko naida ani pekefuo gako arugute bambiko si tipa gaani wenepai. Ho ani amangapai ni kuti agu azinahe nga ga Yekova, ani abakanga bangirani te singia gaani diaberã aye na wene sangbanaha. Ani nika manga kina agu adiaberã nika du ni ruruhe, nga gu nika sa rani ani du zeredi na ngbarago.
Yekova asananga rani ani mangi gupai ka ani amanganga ha ya te.
“Gi rugute mi aruga roni na ni ni gi uru re, si ni kpakarakpakara ha fu roni ki susi te, turũ nga ha a te.”—Pa Fu Rugute ni Ue he 30:11.
Raka ringbisihe kuti ga Mbori arugute naida ani mangi ariapai rogo wai yo ani aberã na kini mangipai. Ono tie, Yekova asananga rani ani mangi gupai susi omerani te. Na kurigure, ko nga Bakusirani ko ima ino gupai rengbe ani ka mangaha. Na wa ani ka ye ka ino Yekova, ani nika bi gupai nga “gako rugute asusa nga omerani te.”—1 Yoane 5:3.
Yekova nakidohe ka undo agu aboro naraka kuti gako arugute.
“Mi nga Yekova nga ga Mbori, nazada kumba bero; mi du naya foro, ‘Ka mo gúnde nga ya, mi aúnda ro.’”—Yesaya 41:13.
Ani ima rengba ka raka kuti ga Yekova arugute bambiko ko nika undo rani aundo. Ko ima rengba ka undo rani vuru Fugoko nga Baibiri, nga gu nafu ngarasaro na maabangirise furani.
Dungu amirioni aboro rogo zegino ima bi gupai nga raka kuti agu arugute nga ga Baibiri ima mbakada gayo raka. Mo wiriki kura apai tipa gu wene arugute du rogo Baibiri yo. Mo ima rengba ka tonaha ni wisigo mo gu burosua du mburuhe rii Baibiri nga Mo Raki Nyeanye Kindi na Ngbarago! i atumongo tipaha te rogo gaani bangiriba nga jw.org. Si na agi awirikapai re rogoyo:
Waigu Rengbe Baibiri ka Undo Ro?
Baibiri Nafu Maabangirise
Ya mo Mo Rengbe ka Ida Kuti Gupai Baibiri Apehe?
Wa mo nika Wisigo Fugo Mbori nga Baibiri, mo nika bi gupai nga agu api du rogoyo si naundo furani ti aregbo dũ “si nadu ku baha nye anye kindi.” (Atambuahe 111:8) Mangapai kuti agu arugute nga ga Baibiri nga wene gene tipa ka raka ngbaha. Ono tie, Mbori asanga ro ngbaome tipa mo mangihe te. (Pa Fu Rugute ni Ue he 30:19, 20; Yosua 24:15) Si nga gu siapai rengbe ani dunduko ka mangaha.