Gu Sangbanebi I Agumbaha Bakuru Kusayo Nga gu Du na Nyanyakipaha Foro

1. Ginipai Yekova amangihe ngbutuko tingbafuo aAdamu na Eva mangi ingapai? (Bambata Pai 3:15)

NGBUTUKO tifuo aAdamu na Eva mangi ingapai, Yekova afu maabangirise fu atitayo vurube nyanyakipa sangbanebi. Gupai ko agumbaha gu du ni kekehe rogo Bambata Pai 3:15.—Oni gedihe.

2. Tipagine du gi sangbanebi re ti ni na nyanyakipaha?

² Gu sangbanebi re gu du rogo gu bambata buku nga ga Ziazia Kekeapai. Ono gu kura abuku dunduko nga ga Baibiri na kina ngbanya dagbaha na ni ngba kura gene. A kina wai ngongo buku ninaakoda akpewaraga dunduko ku rogo ba sa, agu afugo du rogo Bambata Pai 3:15 nakoda apapara ai buku nga ga Baibiri ku rogo bangisa pangbanga, du nga, Mbori nika keda batasi nga gu ko nika gbarasa Satana na gu gbegberẽ aboro dunduko napekafuo ko.b Nairiwo gu pa maku nika ngiaha re fu agu aboro kpinyemu Yekova!

3. Ginipai ani nika sakapai tipaha rogo gi kekeapai re?

³ Rogo gi kekeapai re, ani nika karagapai kuti agi asanahe re nibipa gu sangbanebi du rogo Bambata Pai 3:15: Ada du i napepa yo rogoho? Wai du gu sangbanebi re adigiso tihe? Na wai du ani agbia undo ti ni?

ADA DU I NAPEPA YO ROGO GU SANGBANEBI RE?

4. Da du nga “wo,” na wai du ani aino gipai re?

⁴ Agu aboro du rogo gu pangbanga du ni kekehe rogo Bambata Pai 3:14, 15 nakoda “wo,” ‘atita’ wo, ‘dee,’ na ‘atita’ dee. Ziazia Kekeapai naundo rani ani ini agu aboro re nibasasa dunduko.c Ani tonanga ha na “wo.” Ka ndikidi wo arengbenga ka ruga tiru na gupai Yekova agumbaha ati Edene yo te. Sidu, gu he Yekova aasarangbanga kuriihe ane re angia kina boro ndikidi boro. Da du naadu? Yugoti 12:9 nasakapai ziazia tipa da nga gu boro re. Si nape gupai nga, gu “bakuru wo” re nga Satana Bakitingbanga. Ono ada du nga atita gu wo re?

5. Ada du nga atita wo?

⁵ Ti kura aregbo, Ziazia Kekeapai namangasunge na gu fugo nga atitase, tipa ka yugopa agu aboro nawirika boro wenengai gbe, si ki sa gupai nga i yambu ni nga awirini. Sidu, atita wo nga agu amaraika adunga ni ruruyo ya gbiati agu aboro nasoga Yekova Mbori gbiati gako aboro wakina gu Satana amangaha. Agu aboro re nakoda agu amaraika naambu gayo asunge ngbangbaturũ yo ti rago Noa, gbiati gu gbegberẽ aboro namangapai wakina bayo nga Bakitingbanga.—Bam. P. 6:1, 2; Yo. 8:44; 1 Yo. 5:19; Yuda 6.

6. Tipagine gu ‘dee’ re arengbanga kadu nga Eva ti ni ya?

⁶ Fuo gure, ani iningo pai tipa da du nga ‘dee.’ Ri arengbanga kadu nga Eva te. Tipagine ri arengbanga ti ni kadu nga Eva ya? Oni bingo ndupai sa. Gu sangbanebi re nape gupai nga, atita dee nika ‘mbura’ rii wo. A wa ani nasakipai tipaha, wo nga gu gbegberẽ maraika nga Satana na kpakpa boro ho rengbe kadu na rengba ka mbura riko te. Sidu, waigu ka i arengbe ka gbarasa Satana?

7. A wa i nayuguhe rogo Yugoti 12:1, 2, 5, 10, da du nga gu dee i napepa ri rogo Bambata Pai 3:15?

⁷ Gu yangara buku nga ga Ziazia Kekeapai nayugo pa da nga gu dee i nagumba pari rogo Bambata Pai 3:15. (Oni gedi Yugoti 12:1, 2, 5, 10.) Anga kungbo dee du nga gu dee re te! Ri na diwi tii nduri yo na gari kpakpari nga akerekuru bawe na ue. Ri avungu gu gude du kia gbe: du nga gu Kindo nga ga Mbori. Gu Kindo re gu du ngbangbaturũ yo, sidu, gu dee re a kina ngbangbaturũ yo. Ri narukuba gu papara ga Yekova riigbu du ngbangbaturũ yo, nga gu nakoda gako ruru amaraika.—Gara. 4:26.

8. Da nga bambata papara atita dee, na ti gini regbo ni ada wo? (Bambata Pai 22:15-18)

⁸ Fugo Mbori naundo rani a ani ini da nga bambata tita dee. Si adu nga gi tita dee re nika du nga tita Abarayama. (Oni gedi Bambata Pai 22:15-18.) A wa sangbanebi agumbaha kumbatayo, Yesu angia ndikidi tita gu ruru kumba re. (Rk. 3:23, 34) Ono si aaida gu tita dee re du na ome tiko kisusi boro, bambiko si adu nga ko nika gbarasa Satana Bakitingbanga kusayo. Sidu, ho Yesu adu ni na garã wa 30, i ambedi ko na ziazia toro ni bangisa Wiri Mbori. Ho i ambedi Yesu ni, ko ada ni bambata papara tita dee. (Gara. 3:16) Tingbafuo Yesu kpi na ki zingi be kpio, Mbori “amoi kpakpari irisa na taarimo ku riko yo” na ki ‘asia pa ahe fuko dunduko ku ngbangbaturũ yo na ku sende no,’ kodihe na gu pagbia nga ga ‘gbarasa ga bakitingbanga mangaapai.’—Eb. 2:7; Mt. 28:18; 1 Yo. 3:8.

9-10. (a) Gini kura aboro berewe nga papara atita dee, na ti gini regbo i ada wo? (b) Ginipai ani nika wirikapai tipaha fuo gure?

⁹ Ono kupati Yesu, si adu nga kura aboro nika da ada ni papara atita dee a. Gu mokedi nangia Pauro ayugu gi papara tita dee re ho ko ape gupai ni fu gu mbedimbedi aKristano nangia aYudo na aGendiria nga: “Si ngia ga Kristo yo nga oni, oni nga ngbatunga Abarayama tie, nga adikumbo mbiko mokido.” (Gara. 3:28, 29) Ho Yekova ambeda Kristano ni na ziazia toro, gu boro re nada ni papara atita dee. Sidu, atita dee nga Yesu Kristo, gbiati agu aboro du bangeyo nga 144,000, nga aguyo nika zogarago na ko. (Yugo. 14:1) Agi aboro re dunduko naˈasada kaa berã na kini mangipai wa Bayo nga Yekova Mbori.

¹⁰ Awere tie, wa ani naima ino ada nga agu aboro i napepa yo rogo Bambata Pai 3:15, ani nika wisigopai tipa gupai Yekova naima mangaha tipa ka digiso gi sangbanebi re na wai si aundo rani areme.

WAI DU GU SANGBANEBI RE ADIGISO TIHE?

11. Rogo gini gene i amburu “gido” tita dee?

¹¹ Ringbisihe kuti gu sangbanebi du rogo Bambata Pai 3:15, si adu nga wo nika ‘mbura’ gido tita dee. Gupai re aima digiso tihe ho Satana amangisunge ni na aYudo gbiati aRomo tipa i imi Wiri Mbori. (Rk. 23:13, 20-24) Kina wai rengbe boro ka hõ ti gido ni ka ni adunga na rengba ka ndu ya watadu si kidu ni mbumbuhe funi tipa gbanga regbo ka ndu, kinawo a Yesu aadunga na rengba ka mangapai ho ko akpi ni kidu murö yo tipa rame biata ya.—Mt. 16:21.

12. Waigu i nika mbura rii wo na ti gini regbo?

¹² Gu sangbanebi du rogo Bambata Pai 3:15 nayugo gupai nga si adu nga Yesu anyenga murö yo te. Tipagine si adu ti ni nga ko anyenga murö yo te? Bambiko ringbisihe kuti gu sangbanebi re, si adu nga atita dee nika mbura rii wo. Gure aayugo gupai nga si nika ida Yesu zingi azinga be kpio. Na nirengo, ko aima zinga be kpio! Rogo biata uru tingbafuo kpi Yesu, i azingisi ko na gu kpoto tiko nga ga toro kaa kpingo ya. Ti ga Mbori ringbisiringbisi regbo, Yesu nika gbarasa Satana kusayo nyeanye kindi. (Eb. 2:14) Kristo gbiati agu aboro nika zogarago na ko nika gbarasa avura Mbori du nga, atita wo.—Yugo. 17:14; 20:4, 10.d

WAI DU ANI AGBIA UNDO TI GI SANGBANEBI RE?

13. Waigu ani agbia undo ti digisidigisi gi sangbanebi re?

¹³ Ka si du nga mo nga ga Yekova moyambu, mo nagbia undo agbia ti digisidigisi gi sangbanebi re. Yesu aye ku auru kpotosende ni boro. Ko ima wirika asino Bako ngba rengberengbe gene. (Yo. 14:9) Sidu, ani ima ye ka ino Yekova Mbori na kini kpinyemu ko mbiko Yesu. Ani ima gbia undo a ti ga Yesu ayugopai na ti wai ko angbembatayo rogo apai rogo gu dungurati nga ga aKristano areme. Ko ima yugo wai furani ka raka ngba gu gene nga gu nika undo rani Yekova idi na ani. Na mbiko gupai nga i amburu gido Yesu watadu ko akpi, ani dunduko nagbia undo. Ngba gini gene? Tingbafuo Yesu kpi, na Yekova ki zingisi ko be kpio, Yekova adi ga Wiriko rengberengbe motumo kugume, nga gu ‘nagiriso rani ti ingapai dũ.’—1 Yo. 1:7.

14. Wai du ani aino gupai nga gu sangbanebi Yekova agumbaha ati Edene yo aadigisongo tihe ti gu regbo re te? Oni sakinga rogo yo.

¹⁴ Gupai Yekova agumbaha rogo gu sangbanebi ko agumbaha ati Edene yo ayugu gupai nga si aadigisongo tihe ti gu regbo re te. Si adu nga si nika dia regbo adia tipa dee vungu agu atitari i akido payo, tipa Bakitingbanga dungura apefuoko, na (watadu, tipa sogote) kuru dagba agu abadona ue re. Ani nagbia undo agbia ti inopa gi sangbanebi re bambiko si nafu zahe furani nga, gi zegino du Satana na maapai kuriihe re nika soga airisi Yekova asoga. Kusa, Yesu aima fu zahe wakina gure fu gako abawiriki. (Mk. 13:13; Yo. 17:14) Nirengo, ani ima bi digisidigisi papara gu sangbanebi re, gbe vuru agu agarã yo 100 susi kusayo re. Wai du duhe wo?

15. Tipagine zegino asoga ga Mbori aboro ti ni awere kisusi gu nidu mbata, ono tipagine si aidanga ti ni ani gunde be Satana ya?

¹⁵ Ngbutuko fuo maa yo Yesu ni gu Bakindo nga Masiya rogo 1914, i aba Satana kusayo ngbangbaturũ yo. Ko ni ziziko awere ku auru kpotosende no napido gbarasahe. (Yugo. 12:9, 12) Ono naatona kina ti gu regbo re, ko nidu ni gu boro asungongo asungo gbua ya. Satana ni zingizingi ko na ko nazubo ga Mbori aboro. (Yugo. 12:13, 17) Si nga ndu gupai ga Satana zegino asoga rani ti ni ni kerehe kisusi gu niidu mbata. Ono tie, ndupai ho tipa ani gunde be Satana na apefuoko te. Kuba gure, ani rengbe kadu na kina gu bangisa kido gu mokedi nangia Pauro adu na ni, nga guko nakepai ki ya: “Ka Mbori du fu rani, da ka du kuti rani?” (Rom. 8:31) Ani rengbe kadu na bakere kido kuti Yekova bambiko a wa ani nabihe, bakere papara gu sangbanebi du ni kekehe rogo Bambata Pai 3:15 ima digiso tihe.

16-18. Waigu Curtis, Ursula, na Jessica nagbia undo ti rugayo tiyo na gupai du rogo Bambata Pai 3:15?

¹⁶ Gu ga Yekova kidohe du rogo Bambata Pai 3:15 rengbe ka undo rani ani sovura kuti ai akpakarapai rogo gaani raka yo. Curtis, nga guko namangasunge ni mokedi Guam yo, aya: “Ti kura aregbo, mi aima gbia tire na aˈasada gbiati agberãrago nga gu naˈasadi pa gimi nye ni ruruse fu Yekova. Ono berãkuriipa gu sangbanebi du rogo Bambata Pai 3:15 ima undo re mi banda gimi kido kuti gu Buba du ngbangbaturũ yo.” Curtis nangera kumbatayo tipa gu regbo Yekova nika digiso gaani akpakarapai dunduko ti ni.

¹⁷ Wirina du Bavaria yo du rimori nga Ursula ape gupai nga pa ruga ri tiri na Bambata Pai 3:15 aundo ri ri idi kuti gupai nga Baibiri aye be Mbori. Ri abi wai du gu kura asangbanebi dunduko na ngbanya dagbaha na gi sangbanebi re na gupai re aima ngba tiri ni bakerehe. Ri ape gupai a nga: “Ho mi aini gupai ni nga Yekova amangipai ni kina boro ipo tipa ka fu maabangirise furani, si asa re mi kpinyemuko ni bakerehe gbe.”

¹⁸ Wirina nga Jessica, nga guri du Micronesia yo aya: “Mi natingidapa wai kindi mi adu ti gu bambata regbo mi aini gupai nga mi ima gbia rengo! Gu sangbanebi du ni kekehe rogo Bambata Pai 3:15 aadigiso tihe. Si ima undo re mi tingidi gupai nga, agu apai ani arungo behe areme, anga si nga agu apai Yekova aaidaha tipa rani te. Gi sangbanebi re ima nyakasa gimi ida a kuti gupai nga, iriso Yekova nasa re mi raki bawene raka awere wa rengbehe, na zavura bawene raka kisusi kumbatayo.”

19. Tipagine rengbe ani kadu ti ni na gu kido nga yangara papara gu sangbanebi re nika digiso tihe adigiso?

¹⁹ A wa ani nabihe, Bambata Pai 3:15 nadigiso tihe adigiso awere. I ima yugo atita dee na atita wo ziazia. Yesu, nga gu ko du ni bambata papara atita dee aima hu be oro naadu ti gidoko mbiko wa Satana amburuhe na ko awere nga gu Bakindo du na ome tiko kaa kpingo ya. Gu sunge nga ga siaka ue papara atita dee ima mbeda gbe ka digo. Mbiko gupai nga bambata papara gu sangbanebi re ima digiso tihe, ani na nduapai berani dunduko kadu na kido nga gu yangara paparaha nye koyo du nga ka mbura rii wo nika digiso tihe adigiso. Ga Mbori amoyambu nika du na bakere ngbarago ho i nika gbarasa Satana ni! Da kina kuti gu regbo re, ka omeroni batingo ya. Gaani Mbori ima rẽ ani kido kutiko. Vurube atita dee, ko nika fu badungu amaku ka i agedanga ha ya fu “arikaaboro zegino dunduko.”—Bam. P. 22:18.