12 Asásá

GUPAI SI AYUGOHO

Anga asásá gbua nga kungbo musumo—boro aberãha nga ka pai nimangi wo te. Ndikidi asásá nakoda mbakadapa pai, ruru bipai gbiati wene mangasunge kakaka.

Boro ima rengba ka manga guruguru asásá nga gu du tipa (auru, aposo), (adiwi), (garã watadu agarã tipa ka da tini). Boro ima rengba ka da ti gani gbanga gbanga asásá vurube gu guruguru asásá nga gu ni amaaha.

NDU GUPAI DUHE TINI NA NYANYAKIPAHA

Pa da mo ti gamo asásá ima rengba ka sa ro mo du na kido, ka nyakasa gamo pabakure na ki kiisi gamo ngbarago.

Du na kido kuti tise: Ho mo amaa guruguru asásá ni na ki da tini, mo nadu na kido tipa ka manga gu kura kikindigi asásá. Mo nika du a na bakere kido ho mo nikaa gbiatiro ni na akpakarapai na auru dunduko—wa gu nga ru nyanyaki sa sosodahe.

Pa abakure: Aboro nagbia ngbarago nidu yo dagba agu aboro du na wene asásá beyo, naida ka ya nga agu aboro naima ino gupai i aida ka mangaha na i na nyemu ka mangasunge tipaha. Kurigure, wene gene sa dagba agu agene yo nga gu rengbe ka nyakasa pabakure nga ho mo amangasunge ni na gu boro du na kina ngbatunga gu sásá re beni.

Ngbarago: Ho mo amaa asásá ni na ki da tini, mo nabihe nga mo ima du na diabese.

“Mi ima kpinyemu ka du na asásá. Si nasa re mi naamangapai amanga kindi na pai du ho si aida mi naamangapai ka da tini. Na ho mo ada ni ti sásá, mo nadu na bakere ngbarago na ki ngere kusayo ki ya, ‘Si ima ngba, mi ima mangaha! Mi ima nyasa gupai mi amoi sásá ka mangaha.’”—Christopher.

BANGUA RENGO NGA GA BAIBIRI: “Gu ni nakparia kina pa yuge arũ nga he te; gu ni naberã kina pa mai ake nga he a te.”

—Batungusipai 11:4.

GUPAI RENGBE MO KA MANGAHA

Mo mangi agi adiandue re tipa ka maa gamo asásá na ki da tini.

Gupai si aida mo mangihe. Mo moi agu asásá mo naima rengba ka da tini na ki peresipaha mbatayo, mo sia agu akuraha mo aida ka mangasunge tini ni bambataha, uehe, biataha, na agu akuraha tie.

• Mbakadapa pai. Tipa asásá nibasasa, mo mangi agi apai re:

• Mo moi gu ndikidi regbo mo aida ka digisoho tini.

• Mo mbakadi pa agu apai si akodaha.

◼ Mo berẽpa agu akpakarapai rengbe ka kura kumbatayo, na ki berẽpa wai mo narengbe ka du na diabese rogoyo.

Mangapai. Ka mo sungungo da kinaho apai nika ngba ni dunduko mo kini ru ka tonaha ya. Mo sana tiro nga, ‘Gini bambatapai rengbe mi mangaha tipa ka da ti gimi sásá?’ Tifuoho mo mangihe. Mo naabandapa agu apai mo amangaha wa mo nikaa manga sonakumbatayo tipa gamo asásá dunduko nibasasa.