GU BA AWARAGA DU ROGO INTERNET nga ga Ngbaõbambu Sinziri
Ngbaõbambu Sinziri
GU BA AWARAGA DU ROGO INTERNET
Zande
ã
  • ã
  • ẽ
  • ũ
  • á
  • ö
  • ò
  • ĩ
  • ä
  • BAIBIRI
  • AWARAGA
  • ADUNGURATISE
  • w10 11/1 kpe. 20-24
  • Paranga Aboro —Ginipai Oni Ka Mangaha Na Gaoni Raka?

Vidio ho tipa gipai mo nasiaha re te.

Akoo, wiri ingahe ima manga ho gu vidio re naambakada tihe ka tona ni.

  • Paranga Aboro —Ginipai Oni Ka Mangaha Na Gaoni Raka?
  • Ngbaõbambu Sinziri Natakapande ga Yekova Kindo—2010
  • Umbariiapai
  • Awirinaha
  • Gini Asásá Rengbe Mo ka Maaha?
  • Mbakadatise ka Rẽ Tipa Bapatiza
  • Mo Rengbe Arengba Kada ti Gamo Asásá
  • 12 Asásá
    Awake!—2018
  • Paranga Aboro, ya mo Oni Namaa Berãroni Fuo Agu Asasa Nga ga Toro?
    Ngbaõbambu Sinziri Natakapande ga Yekova Kindo (Wisigoho)—2018
  • Aparangaa Oni Nasona Rogo Toroyo?
    Ngbaõbambu Sinziri Natakapande ga Yekova Kindo—2003
  • Wai ka Maa Agu Asasa Nga ga Toro na Ki da Ti Ni
    Ngbaõbambu Sinziri Natakapande ga Yekova Kindo (Wisigoho)—2022
Mo Bi Kuraapai
Ngbaõbambu Sinziri Natakapande ga Yekova Kindo—2010
w10 11/1 kpe. 20-24

Paranga Aboro ​—Ginipai Oni Ka Mangaha Na Gaoni Raka?

“Wo mi aora tie, wa ka mi awo rogo pai te; wo mi namaa ngbondo, wa ka mi ataka yuge te.”—1 KOR. 9:​26.

1, 2. Tipa gamo raka du wenengai, ginipai si aida mo mangihe?

KA SI du nga mo nandu ngba gu gene mo aandunga ngbaha mbata ya, si idi aida mo sana boro ní yugu gene foro kurogo gu ba mo andu kurogoho. Ono tipa i yugu gene wenengai foro, si naida aida mo ini gu ba mo andu kurogoho.

2 Ho mo asona ni, pai tipa ro wakina gure a. Ziazia Kekeapai nga guhe rengbe ka undo ro mo ini gu gene si aida mo ndu ngbaha. (Snz. 3:​5, 6) Ka mo raba sangbakpotoroyo wenengai, si undo ro aundo gbe mo ndu ngba wene gene. (Rom. 2:15) Ono tipa gamo raka du niwenehe, si naida mo ini wari aino mo andu kuhoni. Si naida mo moi gamo asásá wenengai, si kidu ziazia.

3. Gini aundo duti maa asásá Pauro afura tipaha rogo 1 AKorindo 9:​26?

3 Gu mokedi nangia Pauro agumbapa agu aundo duti maa asásá na ki asadi ka da ti ni. Ko ayaa: “Wo mi aora tie, wa ka mi awo rogo pai te; wo mi namaa ngbondo, wa ka mi ataka yuge te.” (1 Kor. 9:26) Ka mo duna asásá bero mo aida kada ti ni, si naida mo oro wa ka mo da ada ti ni. Fuo regbo ngbutuko, si nika ida mo mangi kikindigi adiaberã nibipa irisombori, pa gbia sunge marã, pa rogatise, pa aborokporo, na pa kura apai. Ti kura aregbo, mo ainongo gupai ka mo mangihe te. Ono ka mo moi gamo asásá kina awere mbu regbo koyo kindi, ki moi mburuhe rii gu rengo gbiati arugute du rogo Fugo Mbori, mo andunga ngba iraira gene ho mo nika ida ka manga diaberã ni te.—2 Tim. 4:4, 5.

4, 5. (a) Ginipai rengbe ka manga ka mo amaanga asásá tipa tiro ya? (b) Tipagine si aida ti ni mo moi pa sa ngbarago ti Mbori mbatayo rogo gamo raka?

4 Ka mo amaanga asásá tipa tiro ya, akuaro watadu gamo abayugupai rengbe arengba ka gberesa berãro mo mangi kina gupai i abihe nga si ru. Ono ka mo vura maa asásá a, aguyo rengbe arengba ka fu kura aberã foro. Ho mo agia agu aberãpai ni i afuhe, si naida mo sana tiro nga, ‘Ya mo agu asásá i apepaha re aundo re mi tingidipa Bamangire ho du mi ni kindi niparanga re watadu si nika gbe berãre kusayo tiko?’​—Oni gedi Batungusipai 12:1.

5 Tipagine si aida ti ni mo moi pa sa ngbarago ti Mbori mbatayo rogo gamo raka? Ndupai sa nga, Yekova afu badungu wene ahe furani. (Yak. 1:17) Aboro dunduko si aida i yugu gayó tambuahe fuko. (Yugo. 4:11) Gini kura wene gene duho rengbe mo ka yugo gamo tambuahe ngbaha susi gu nga ka berãpa Yekova ho mo amaa asásá ni? Ani bingo bete agu asásá rengbe mo ka maaha na gupai rengbe mo ka mangaha tipa ka da ti ni.

Gini Asásá Rengbe Mo ka Maaha?

6. Gini bangua sásá rengbe mo ka maaha, na tipagine?

6 A wa gumbayo ho rogo gu kekeapai ye mbata fu gere, gu bangua sásá rengbe mo ka maaha nga ka ino nitiro nga rengo du nga agu apai Ziazia Kekeapai agumbaha. (Rom. 12:2; 2 Kor. 13:5) Akuaro rengbe ka ida kuti gu yugopai nga ahe akuru nisaha watadu gu kura zire ayugopai bambiko aboro aya fuyó wee i idi kuti ni. Ono tie, si aidanga mo idi kutipai gbua mbiko aboro ya foro mo idi kuti ni te. Mo tingidi gupai nga, Yekova naida mo irisiko na berãro dũ. (Oni gedi Matayo 22:36, 37.) Gu Barani du ngbangbaturũ yo naida ani moimburu gaani idapase rii gopai.—Eb. 11:1.

7, 8. (a) Gini bete asásá rengbe mo kada ti ni fuo regbo ngbutuko si ki nyakasi gamo idapase? (b) Ginipai nika manga ka mo dati bete agu asásá mo amoihe?

7 Tipa ka nyakasa gamo idapase, si ngbaangba mo moi agu asásá rengbe mo kada ti ni fuo regbo ngbutuko. Mo rengbe ka maa gu sásá nga ga kparakpee na aʹuru dũ. Mo rengbe ka ke agu apai ti waraga mo aida ka maaha kurogo gamo kpee nigu uru re. Ka mo furanga sa tipa kina agu apai nafuda ro ya, ono tipa agu apai a mo agbia ngbarago mbikoho. (Frp. 4:6) Gu kura sásá nga kaa geda Ziazia Kekeapai na aʹuru dũ. Ya mo mo ini ya ka mo ageda akpewaraga wa biama rogo uru sa, mo nyasi geda Ziazia Kekeapai naabaha rogo garã sa? Atambuahe 1:1, 2 nayaa: “Boro maku nga gu boro . . . [du] gani ngbarago . . . rogo gu rugute nga ga Yekova, ni namakia pa gako rugute uru na yuru.”

8 Gu kura sásá rengbe mo ka maaha nga kaa mbakadatise tipa ka karagapai ti regbo adunguratise dunduko. Ti tonatonaha, mo rengbe ka geda karagapai ageda a wa duhe rogo waraga, watadu ka geda veresi. Fuo gure, mo rengbe ka maa sásá kaa karagapai rogo gamo afugo nitiro angianga ka gedaha ageda ya. Ai gu regbo mo akaragapai, gure nga mo nafu gamahe fu Yekova. (Eb. 13:15) Fuo da mo ti bete agi asásá re, mo adunga na gunde berewe gbe te, na mo nikadu na tambuahe fu Yekova, na kini berẽpa maa kura asásá mo nika da ti ni gizo kumbatayo.

9. Ka si du nga mo atadanga nibatungusipa Kindo te, gini asásá rengbe mo ka maaha?

9 Gini asásá rengbe mo ka maaha tipa kada ti ni gizo kumbatayo? Ka si du nga mo atatonanga tungusa wene pangbanga te, mo rengbe ka maa gu sásá nga ga da nibatungusipai. Fuo da mo ti gi sásá re, mo rengbe ka asada tiro tipa kaa tungusapai dedede na wenengai, zanga diwi susi ka mo atungusanga pai ya. Mo rengbe arengba a ka wirika mangasunge na Ziazia Kekeapai ba tungusapai yo. Ka mo amangaha wo, mo nika bi gupai nga sunge tungusapai nafu ngbarago afu foro. Mo rengbe ka kiiso gu regbo mo adiaha kutingba sunge tungusapai nitanga nani ti akporo watadu ka asada ka tona wisigo Ziazia Kekeapai na boro. Kada ku herẽ, gu nyanyakipa sásá rengbe mo ka maaha berewe nga ka asada tiro ka rẽ tipa bapatiza, ki kpara gamo raka fu Yekova ki zi bapatiza, ki da niboro sa dagba gako aDezire.

10, 11. Gini asásá rengbe gu paranga aboro naima zio bapatiza ka maaha?

10 Ka si du nga mo nga gu ga Yekova moyambu naima zio bapatiza, gere nga bete agu asásá rengbe mo ka maaha. Mo rengbe ka maa sásá tipa kaa undo dungurati ti tungusapai rogo agu arago i atungusanga pai rogoho dedede ya. Mo rengbe ka maa sásá kadu nimoundo abazakigene, watadu bazakigene. Badungu akutu abazakigene ka mo sana yó i ki ya foro wee sunge tungusapai ti aregbo dũ nga bawene gene rengbe mo ka tingidapa Bamangiro ngbaha ti rago parangaro. Gere nga agu asásá rengbe mo kada ti ni ho mo araka ni kua bamo kindi. Gu dungurati du mo rogoho nika gbia undo agbia a ka mo dati agu asásá re.

11 Mo rengbe arengba ka maa asásá a tipa ka ndu kurogo kura rago. Nikpiapai, mo rengbe ka maa sásá ka ndu ka mangasunge rogo kura rago kia watadu ringara nga gu duna bakere zingo rogoho. Mo rengbe ka fu tiro ka ndu ka undo sunge dudua aBambu Kindo watadu agu abambu nga ga be-basunge rogo kura aringara. Mo rengbe arengba ka rimo sunge Betere a watadu sunge amokedi. Ono gu bangua sásá si aida mo da ti ni mbataano fu agere nga, ka zio bapatiza. Ka si du nga mo ataziongo bapatiza te, si naida mo ini agu apai si aida mo mangihe tipa ka zioho.

Mbakadatise ka Rẽ Tipa Bapatiza

12. Gine nasa kura aboro i zi bapatiza, na tipagine si aidanga boro zi bapatiza ti ni mbiko kina gu nduapai re ya?

12 Mo naberãha nga tipagine si aida mo zi bapatiza ti ni? Gu kura aboro rengbe ka berãha nga si naida i zi bapatiza tipa si banda yó ti manga ingapai. Gu kurayo rengbe ka berãha nga si naida i zi bapatiza bambiko akurayó ima zioho dunduko. Gu kura paranga aboro rengbe ka ida ka zio bapatiza tipa ka sa ngbarago ti avunguyo. Ono tie, bapatiza arengbanga ka za ro ti manga gu gbegberẽpai mo aida aida ka mangaha nigbuko te. Na si aidanga mo zi bapatiza a mbiko aboro du naya foro mo zihe te. Si naida mo zi bapatiza kinaho mo naima ruga tiro ni na gupai padu boro nidezire Yekova ayugoho, na ho mo naima ino patiro ni nga mo nika manga agu apai amanga si aida mo niimangihe fuo zio mo bapatiza.—Batu. 5:4, 5.

13. Tipagine si aida mo zi bapatiza ti ni?

13 Ndupai sa si aida boro zi bapatiza ti ni nga, Yesu aya fu apefuoko wee i ndu ki “sa arikaaboro dunduko ni abawiriki, ki nibapatizi yo.” Zavura Yesu, ko aima zio bapatiza. (Oni gedi Matayo 28:19, 20; Marako 1:9.) Kurigure, zio bapatiza nga gupai si aida aboro mangihe dunduko ka i aida ka bata. Fuo fura Petero tipa pa mbakada Noa bakurungba nga gu ko abati kurogoho na gako aborokporo, ko ayaa: “Rogo ndikidi kpiahe yo ime nga gu he nabatasa roni, nga bapatiza, mbiko gu zingabekpio nga ga Yesu Kristo.” (1 Pet. 3:20, 21) Ono anga si nga boro nazio bapatiza gbua tipa ka bata te. Si naida boro zi bapatiza mbiko ní nakpinyemu Yekova na kini idi ka mangasunge fuko na ngbaduniyo dũ, na mbisimoni dũ, na berãni dũ, na gani ome dũ.—Mk. 12:29, 30.

14. Gine rengbe ka sa kura aboro i naagunde agunde ti zio bapatiza, ono gine rengbe ka undoyo?

14 Gu kura aboro rengbe ka manga ndundu ti zio bapatiza mbiko gupai nga i nagunde nga i nika kusayo rogo dungurati ka i mangi gbegberẽpai. Ya mo gu gunde re rogoroyo? Ka si duho, gberẽnga ha agberã ki nyasi koyo te. Si rengbe ka yugo gupai nga mo ima ruga tiro nzunzu na agu apai si aida mo mangihe na gu si aidanga mo mangihe ya wa mo nika da nidezire Yekova. Ono ya mo kura ndupai a kinaho mo agunde ti ni? Isoke mo naberãha nga ngbanga ha angba gbe tipa boro naaraka ringbisihe kuti ga Yekova arugute te. Ka si duwo, si naida mo berẽkurii agu apai ninaamanga tipa agu aboro ninaabasa ga Mbori arugute. Watadu si rengbe kadu nga mo nakpinyemu ga Mbori arugute akpi ono mo kini bi tiro nga omero arengbanga nani te. Ka mo abi tiro wo, si nayugo gupai nga mo na umbasitise. Na zavura Ziazia Kekeapai, si nayawee kpotoboroyo nga irabiriki. (Yere. 17:9) Ono ka mo ‘amakia apai kuti fugo Mbori,’ kpotoroyo nangingo ro te. (Oni gedi Atambuahe 119:9.) Ka ngia gini ndupai duho nasa ro mo duna ndundu, si naida mo dihe kusayo.a

15, 16. Wai rengbe mo ka ino ya mo ima rẽ tipa bapatiza?

15 Ono wai rengbe mo ka ino ya mo ima rẽ tipa bapatiza? Gene sa rengbe mo ka inoho ngbaha nga ka sana tiro na agi asanahe re: ‘Ya mo mi rengbe ka sakarogo gu bangua ayugopai yo nga ga Ziazia Kekeapai fu aboro? Ya mo mi naatungusapai zavura ho avungure atungusanga ha te? Ya mo mi naaʹasada tire kaa du pati adunguratise dunduko? Ya mo mi rengbe ka tingidapa gu regbo mi adibe gu soapai nga ga akurase? Ya mo mi anye kindi kaa iriso Yekova ka avungure watadu abakureami vura mbuhe? Ya mo mi akparingo fu Yekova tipa gimi pagume naako? Ya mo mi mangi kparatise fu Yekova rogo kpee yo, nga gu kparatise ka mi akaraganga ha berewe kusayo ya?’

16 Bapatiza nga guhe naʹaria ga boro raka naabaha, sidu, si aidanga boro bihe taata te. Ya mo mo ima nyaka tipa ka diaberã tipa gipai re wenengai? Anga nyaka nga ka ino manga gumbapai rii tambara yo watadu kaa fu karagapai nibawenehe ba adunguratise yo te. Nyaka nga ka ino manga diaberã mburuhe kidu rii sangba Ziazia Kekeapai. (Oni gedi AEbere 5:​14.) Ka si du nga mo ima rẽ ka manga gipai re, mo inihe nga bakere momu du foro kumbatayo nga ga mangasunge fu Yekova na ngbaduroyo dunduko na kini raki ngba gu gene nika yugoho ayugo nga mo aima kpara tiro fuko.

17. Gine nika undo ro mo dibe agu aʹasada rengbe ka ye sa ro fuo zio mo bapatiza?

17 Ho mo nika zio bapatiza ni, mo nikadu na bakere nyemu mangasunge fu Mbori. Ono fuo bete regbo, mo rengbe ka gbia tiro na dungu aʹasada. (2 Tim. 3:12) Si naida aida mo sana avunguro tipa undo tipa ka diabe asada. Mo sana gu nyanyaki aboro du rogo dungurati tipa undo. Mo zi bakure na agu aboro nika undo ro. Na ka bangiro gonga ti gupai nga Yekova naberãpa ro aberã ya, na ko nika fu ome afu foro mo dibe gu asada ka ye sa ro.—1 Pet. 5:6, 7.

Mo Rengbe Arengba Kada ti Gamo Asásá

18, 19. Wai rengbe mo ka gbia undo ka mo wisigi agu apai mo naperesi paha mbatayo?

18 Ya mo mo naida aida ka mangapai nibakerehe ono mo ki bihe nga regbo bero tipa ka mangaha te? Ka si duwo, mo wisigo agu apai mo naperesipaha mbatayo. Mo bingo gi kpiapai re: Mo dinga baketi ki moi undu ambia kurogoho. Fuoho, mo ki uka ngume fuo agu ambia re, gu baketi re ki hi na mbia gbiati ngume. Awere tie, mo kusuko gu mbia na ngume re rogo gu baketi re. Fuo kusuko mo ho, mo uka kina gu bangisa ngume re kurogo gu baketi re berewe, ki ru ka maa agu ambia re fuoho. Ya mo agu ambia re rengbe rogoho dũ wa gu si nidumbata? Oó, si arengbanga rogoho te bambiko mo niuka ngume mbataano kurogo baketi mo kini ru ka maa ambia fuoho.

19 Kina gu bangisapai re du tipa wai mo amangasunge na gamo regbo. Ka mo moi kina pa agu apai duwa aũwasa mbatayo, regbo adunga bero tipa kikindigi apai te, nga agu apai nga ga toro. Ka mo irisi sangba Ziazia Kekeapai ki ‘niberẽpa agu apai duna nyanyakipaha gbe,’ mo nika bihe nga regbo kina bero tipa agu apai nga ga Kindo na tipa bete agu apai nga ga wasa.—Frp. 1:10, NW.

20. Ka mo abakabangiro wa mo aʹasada tiro kada ti gamo asásá, ginipai si aida mo mangihe?

20 Ho boro aʹasada tiní ni kada ti gani asásá kodihe na gu nga ga zio bapatiza, nirengbe arengba kaa bakabangirini. Ka mo abakabangiro, “mo bá ga tindiro ku auru Yekova, ko asóngoda ro [asongoda].” (Tam. 55:22) Mo na momu awere ka manga bawene sunge kisusi, nga gu sunge tungusapai i amangaha rogo zegino dunduko. (Amo. 1:8) Kina ro du rengbe ka siapai tipa ka manga gi sunge re watadu ka zanga mangaha. Ka mo henga mangasunge na gu inohe du mo nani ka kiiso sunge Kindo ya. Mo abiranga tiro ti mangasunge fu ‘Bamangiro ti rago parangaro’ te.—Batu. 12:1.

[Gu rukutu kekeapai du bandu kpewaraga yo]

a Ka oni aida ka gbia undo rogo gi bangiriba re, oni bi gu buku nga Questions Young People Ask​—Answers That Work, Volume 2, kapita 34.

[Gu kpiahe du ti kpewaraga 23]

Ya mo mo na sásá nga ga geda Ziazia Kekeapai na aʹuru dũ?

[Gu kpiahe du ti kpewaraga 24]

Ginipai mo awirikaha ti gi kpiapai re?

[Gu kpiahe du ti kpewaraga 24]

Gaoni Karagapai Nga Gine?

• Tipagine si aida mo moi asásá ti ni?

• Gini bete asásá rengbe mo ka maaha?

• Ginipai si aida boro mangihe tipa kada ti gu sásá nga ga zio bapatiza?

• Wai rengbe mo kada ti gamo asásá ka mo wisigi agu apai mo naperesi paha mbatayo?

    Agu Awaraga Nga ga Zande (2000-2025)
    Mo Kuru
    Mo Rimi
    • Zande
    • Mokedihe
    • Wai mo aida apai du
    • Copyright © 2025 Watch Tower Bible and Tract Society of Pennsylvania
    • Agu Andiko du Tipa Mangasunge na Ni
    • Pa Banda Agu Apai du Tipa Boro
    • Privacy Settings
    • JW.ORG
    • Mo Rimi
    Mokedihe