Kere Raka Atona

HO I akusi aAdamu na Eva ni ati Edene yo kusayo, i agbiatiyo na badungu fudifudiapai. Si aidi i mangisunge amanga nyanyaki gbe tipa ka gbia riahe. Kuba gu wene angua i anaabihe ati Edene yo, i atona kaa bi kina akiwe na asakokoso si nikuru pati yo. Gere nga gupai namangi tingbafuo aAdamu na Eva basasangba Mbori na ka i adunga berewe ni abakureako ya.

Ono gu nagberẽ kisusi gure nga, aAdamu na Eva atona ka gbinza na ki kpiki. Mo tingidi gupai nga, Mbori aima zayo nga ka i ri zuzu kura ngua sa nga gu naadu bebere ati yo, i kpi akpi. Ni gu uru i ari zuzu gu ngua re, i atona ka gbinza na ki kpiki ni yangaraha. Nga gu pamungo i amangihe nga ka zanga giasangba Mbori!

Agu agude aAdamu na Eva avungura dunduko i avungura Mbori naima kusa yo ati Edene yo. Gure nayugu gupai nga awiriyo dunduko nikaa sona kini gbinza na kini kpiki a.

Kinagu ka aAdamu na Eva agisangba Yekova, si ka raka adu ti ni fuyo na awiriyo ni wenehe. I dunduko ka raki nyeanye kindi na ngbarago auru kpotosende ane. Boro ho ka kaza ki gbinza na ki kpi te.

Mbori naida aboro raki nyeanye kindi na ngbarago, na Ko nakidohe nga ku mbatayo aboro nika raka araka nyeanye kindi. Anga kina kpotosende sa nika du ni bawenehe te, ono aboro dunduko nika du na wene kpotoyo. Aboro dunduko auru kpotosende nika ngia wene abakure dagbatiyo gbiati dagbayo na Mbori.

Ono Eva aadunga berewe ni bakurea Mbori te. Sidu, ho ri aavunga agude ni, si aadunga furi taata te. Ri aavunga ni kina igirã. Zanga giasangba Yekova aye na dungu arungo furi, ya mo ziree?

AAdamu na Eva avungu dungu agude nga akumbagude na adegude. Ho i avungu bambata wiriyo ni, i ayambu rimoko nga Kaina. I ki yambu rimo gu ue wiriyo nga Ebere. Ginipai namangi tipa yo? Ya mo mo inihe?