Wene Gude na Gbegberẽ Gude

MO BINGO aKaina na Ebere awere. I dunduko naima sona. Kaina nga basopobino. Ko narũko dungu ahe.

Ebere nga babanda akandoro. Ko aima kpinyemu ngerafuo rukutu akandoro. Na ami ki sono ki da ni kikindigi akandoro, na fuo regbo tooni, Ebere kidu na dungu akandoro beko ka ngerafuo ra.

Rogo kura uru sa, aKaina na Ebere aye na gamahe fu Mbori. Kaina aye na bete gako aũati. Ebere ki ye na bawene kandoro dagba gako akandoro yo. Rago angba ti Yekova mbiko Ebere na gako gamahe. Ono rago aangbanga tiko na Kaina gbiati gako gamahe te. Mo ini nduhe?

Ga Ebere gamahe angba ti Yekova kisusi ga Kaina mbiko ­gupai nga Ebere angia wene boro. Ko anaakpinyemu Yekova gbiati ­unvurako a. Ono Kaina angia gbegberẽ boro; ko aakpingo nyemu tameko te.

Sidu, Mbori aya fu Kaina wẽ ko sa sinoko. Ono ka Kaina adeganga tuko ya. Rago aima gberã tiko tipa gupai nga Mbori akpinyemu kina Ebere gbe. Si du Kaina aya ti ni fu Ebere, ‘Ani ndu ku ati yo.’ Ho i adu ni ati yo, Kaina ki narĩ wirinako nga Ebere ki ba kina kangbako. Ya mo kere gbegberẽpai nga gupai Kaina amangihe re te?

Wa vura duhe nga Ebere aima kpi, Mbori natingida pako kindi. Ebere angia wene boro, na bangiri Yekova agonga ti agu aboro duwa Ebere te. Uru aduadu ho Yekova nika zingisa Ebere tipa ko raki berewe. Ti gu regbo re Ebere akpingo berewe te. Ko araka nyeanye kindi auru kpotosende ane. Ya mo si adunga ni wenepai ka ino boro wa Ebere te?

Ono tie, rago angbanga ti Mbori na agu aboro duwa Kaina te. Tingbafuo Kaina imi tameko, Mbori afu mbusa fuko ni keda ko tuturũ kusayo pati agumeko. Ho Kaina aguari ni pati agumeko ka ndu kaa raka rogo gu kura rago, ko adi dawiriko sa ki ndu na ri ni diako.

Fuoho, Kaina na diako atona ka vunga agude. Gu kura awiri aAdamu na Eva arogotiyo, na ki vungu agude a. Si aaimanga te aboro kidu ni dunguyo auru kpotosende. Ani wirikinga pai tipa bete agu aboro re.