Bambata Wangu

MO INI gu bambata pai Noa amangihe ho ko akuru ni na gako aborokporo kurungba yo? Ko azo anya na azire ni gamahe fu Mbori. Mo bingo ko wa ko amanga gipai re rogo gu sura du kusende re. Noa afu gu gamahe re tipa ka tambua Mbori tipa wai ko abandako na gako aborokporo be Ime Akangbii.

Mo naberãha nga rago angba ti Yekova na gu gamahe re? Ii rago aima ngba tiko. Si du ko akido Noa ti ni nga ko agbarasa nga zegino berewe na ime akangbii te.

Tifuo bete regbo kpotosende ki ugu, na Noa na awiriko ki tona vovo raka berewe. Mbori afu maku fuyo ki ya: ‘Oni vungu agude ni dunguyo. Oni zugo ki ngeange aboro ki nge ki hiisi kpotosende dunduko.’

Ono Mbori abihe nga ho aboro kaa gia pa gu ime akangbii ni namangi, i ima rengba ka gunde nga gu nika manga amanga berewe. Si du Mbori afu gu kura he ti ni nga gu nikaa tingida aboro na pa gu gako kidohe nga ko agbarasanga kpotosende berewe na ime akangbii te. Mo ini gu he ko afuhe tipa si nitingidi yo? Wangu du naadu.

Ani naabi wangu dedede ngbangbaturũ yo fuo na mai. Wangu na wene dungu azeru ti ni. Ya mo mo abingo wangu? Mo bi gu ru du rogo gi sura re?

Gere nga gupai Mbori agumbaha: ‘Mi kidohe nga mi agbarasanga aboro na anya berewe na ime akangbii te. Mi namaa gimi wangu ku rogo rungbutorungbuto mai yo. Na ho gu wangu re kaa nikuru ni, mi anibi ru ki tingidi pa gi gimi kidohe re.’

Sidu, ho mo kaa nibi wangu ni, ginipai si aida mo tingidihe? Ga Mbori kidohe nga ko agbarasanga kpotosende berewe na ime akangbii te.