Dia Roto Angere ku Sayo

ROTO na gako aborokporo aaraka sa na Abarayama ringara Kanana yo. Rogo kura uru sa Abarayama aya fu Roto: ‘Gi rago re arengbanga tipa gaani anya te. Sidu, mi nazungadi ro ani kparaka. Ka mo ndu ku kumbabee yo mi ki ndu ku garebee yo.’

Roto ki ngererii gu ringara re. Ko abi wene rago rogo gu ringara re nga gu naadu na ime na bakere nvuo rogoho tipa gako anya. Gere nangia gu papara rago nga ga Yaradene. Si du Roto aga ti ni koyo na gako aborokporo na gako anya. Ni yangaraha i ki dua kpuyo rogo gu bagbata nangia Sodomo.

Agu aboro naaraka Sodomo yo angia kere gbegberẽ aboro. Gipai re aima ba gberarago ti Roto bambiko ko angia wene boro. Zavura Mbori a, rago aima gberã tiko. Ni yangaraha, Mbori akedi amaraika ue i gumba gupai fu Roto nga ko nika gbarasa Sodomo na gu kura gbata naadu pati ni nga Amora be gaha gbegberẽ mangaapai.

Amaraika ape gupai fu Roto nga: ‘Mo oro! Mo di diaro na agu awiro du ue nga adegude ki guari ane!’ Roto na gako aborokporo aakeesa akeesa, si du amaraika aziyo ti ni ti beyo ki kusiyo kusayo vuru gu bagbata re. Maraika sa dagba agu amaraika re ki zinahe fuyo ki ya: ‘Oni zubo tipa ka batasa ungaroni! Ka oni ngerenga kusayo ya. Oni oro kurii bagangara yo tipa ka bata.’

Roto na awiriko ue nga adegude agisangba Mbori ki zubo Sodomo yo. I aarunga gene kandara tooni te, na i aangeranga ku sayo a te. Ono dia Roto abasasangbaa. Fuo kura yo Sodomo yo, ri aru ka ngera ku sayo. Ri ki sa tiri ni mbia tikpo. Ya mo mo bi ri rogo gi sura re?

Ani ima rengba ka wirikapai be gipai re. Si nayugo gupai nga Mbori nabatasa agu aboro nagiasangbako, ono aguyo agianga sangbako ya i nika zanga gayo unga azanga.