Yakobo Andu ku Arana Yo

YA MO mo ini agu akumba Yakobo afura na yo re? Fuo ndu Yakobo gbanga nduge tipa dungu arame, ko agbia agi akumba re pati guga. I aangerafuo gayo akandoro. Yakobo asanayo ki ya: ‘Aboro gini rago nga oni?’

I ki karagaha fuko ki ya: ‘Aboro Arana nga ani.’

Yakobo ki sanayo ki ya: ‘Ya mo oni ini Rabana?’

I ki karagaha ki ya: ‘Ii. Mo bi, wiriko nga Raere naye re na gako rimbasa akandoro.’ Ya mo mo bi Raere wa ri aye tuturũ?

Ho Yakobo abi Raere ni ri niye na ga andoko akandoro, ko andu ki tumba mbia rii guga tipa ami mbiri ime. Yakobo ki nyoro pangbari na ki pepa gu boro furi nga ko. Ri adu na bakere ngbarago. Ri ki ndu ka pe pako fu bari nga Rabana.

Rabana adu na bakere ngbarago tipa Yakobo ye ka sungo fuoko. Ho Yakobo asana Rabana ni tipa ka dia Raere ni diako, Rabana adu na ngbarago. Ono tie, Rabana aya fu Yakobo ko mangisunge rogo gako ati tipa agarã saba ko kini ru ka dia Raere. Wa Yakobo akpinyemu Raere gbe, ko aima mangasunge tipa agarã saba tipa ri. Ono ho regbo adani tipa i fu Raere fuko, mo ini gupai namangi?

Rabana afu gu wiriko nga unvuru nangia Rea fuko kuba Raere. Rabana aya fu Yakobo wẽ ka ko idi ka dia Raere, ko mangisunge fuko tipa agarã saba berewe. Ho Yakobo aidi pa mangasunge ni berewe tipa agarã saba, Rabana afu Raere fuko a ni diako. Ti agu aregbo re, Mbori aidihe aida akumba nirogo adee susi sa. Ono awere, a wa Ziazia Kekeapai ­ayugoho, si ­naida kumba du na dee beni kina sa gbua.