Yakobo na Dungu Awiriko

MO BINGO gi dungu aborokporo re. Agiyo re nga agu awiri Yakobo nga akumba naadu 12. Ko aima vunga adegude a. Ya mo mo iningo rimo boro sa dagba agu awiriko re? Ani asadi ka inongo arimoyo.

Rea avungu Rubena, Simona, Revi na Yuda. Ho Raere abi gupai ni nga ri avunganga te, ri adu na bakere gberarago. Ri afu gari kanga nga Bira fu Yakobo, Bira ki batika agude ue fuko rimoyo angia Dana na Nafatari. Rea ki fu gari kanga rimori angia Zirepa fu Yakobo, Zirepa ki batika Gada na Asera. Rea ki vungu kura agude berewe ue nga Yesasakara na Zeburuna.

Ono regbo aye ki da fu Raere ri batika kumbagude. Ri ayambu rimoko nga Yosefa. Ani nika wirika dungu apai kusa tipa Yosefa, bambiko ko adani nyanyakipa boro. Agiyo re nga agu awiri Yakobo naadu 11 i avunguyo fuko ho ko aaraka ni kua ba Raere yo nangia Rabana.

Yakobo avungu adegude a, ono Ziazia Kekeapai fura tipa guri gbua sa. Rimo ri nga Dina.

Regbo ada tipa Yakobo diberã ka guari kua Rabana yo ka ga ku Kanana yo. Si du ko adungura gako aborokporo ti ni dunduko na gako rimbasa akandoro na abagara ki tona gako gbanga nduge.

Fuo da Yakobo na gako aborokporo Kanana yo ki di bete regbo koyo, Raere avungu kura kumbagude. Gipai re amangi ho i aandu gayo gbanga nduge ni kindi. Ho Raere aavunga ni, gude amangiri ni kerehe ri ki kpi. Ono gu gude re adu wenengai. Yakobo ki yambu rimoko nga Benyamina.

Si naida ani tingidi rimo awiri Yakobo atingida bambiko i du nga angbatunga Yisaraere. Na gu ngbatunga awiri aYisaraere naadu 12 i ayambuhe tifuo agu awiri Yakobo naadu bawe, na awiri Yosefa ue. Yisaka araki araka ni gbangaha fuo batika yo agu agude re, na rago aima ngba tiko tipa kadu na dungu atitako. Ono ani bingo gupai namangi tipa gu titako nangia Dina.