I Aba Yosefa ku Bambukiso Yo

GARÃ Yosefa adu gbua 17 ho i aga na ko ni ku Ezipeta yo. Ho i ada na ko yo, i abagiko fu kumba rimoko angia Potifaro. Potifaro anaamangasunge fu Bakindo Ezipeta, nangia Faro. Faro nangia gu rimo i anaayamba abakindo Ezipeta na ni.

Yosefa anaamangasunge nyanyaki fu bairako, nangia Potifaro. Ho Yosefa angarã ni tooni, Potifaro amoiko ko ningere kurii gako kporo dunduko. Ono tipagine tie du Yosefa ti ni ane bambukiso yo? Dia Potifaro du nasa gupai nga i bako koyo.

Yosefa asono kidu ni bawene paranga ti kpotoko, na dia Potifaro kini idi ko pi na ri. Ono Yosefa aima inoho nga gbegberẽpai du, sidu, ko aká aká. Rago agberẽ ti dia Potifaro ni kerehe. Sidu, ho kumbari ayego ni ku kporo yo, ri ape ziree fuko ki ya: ‘Gu gbegberẽ boro nga Yosefa re niidi ka pi na mi ngbaome!’ Potifaro aidi kuti gupai diako apehe re, na ko kidu na bakere zinga kuti Yosefa. Ko ki diko ki bako ku bambukiso yo.

Gu kumba naangerakurii bambukiso abi gupai nga Yosefa angia wene boro. Sidu, ko ki moiko ko ningere kurii ziziaboro dunduko. Kusa, rago agberẽ ti Faro ni kerehe mbiko gako bafuinga na gako bagbindiriahe, ko ki bayo ku bambukiso yo. Rogo kura yuru sa, i dunduko ue arari musumo, ono ka i ainongo rogo gayo amusumo yo ya. Fuo giro rago, Yosefa ki ya fuyo: ‘Oni gumbanga gaoni amusumo fere.’ Fuo gumbayo ho fuko, ko akusi sangbaha nibasa ni gu undohe nga ga Mbori.

Yosefa aya fu bafuinga wẽ: ‘Arame koyo biata Faro ki kusi ro, ki karaga ro sa gamo sunge, mo kidu ni gako bafuinga berewe.’ Yosefa aya berewe fuko wẽ: ‘Ho mo nika kura ni ane, mo ki tingidi pare, mo ki gumba pare fu Faro, ki undo re tipa mi kuru rogo gi ba re.’ Ono Yosefa aya fu bagbindiriahe wẽ: ‘Arame koyo biata gbua Faro ki kusi ro ki hasi ro ti ngua.’

Fuo arame biata, apai amangi wakina gu Yosefa agumbaha. Faro ahasi bagbindiriahe ti ngua ko ki kpi. Ono i akusi bafuinga bambukiso yo ki karaga ko sa gako sunge berewe. Ono bangiri bafuinga aima go ti Yosefa zanga ko tingidi pako fu Faro! Yosefa ki nye kina bambukiso yo kindi.