Bangiri Yekova Aagonga ti Yosefa Te

Baraho Yosefa adu ni bambukiso yo, Faro, bakindo Ezipeta arari musumo ka boro adu nga ho ka sakarogoyo ya. Gako moyambu sa ape gupai fuko nga Yosefa ima rengba ka sakarogo gako musumo re fuko. Faro akedi sunge fuo Yosefa nibasa.

Faro asanako nga: ‘Mo rengbe ka sakarogo gimi musumo?’ Yosefa ki ya fu Faro: ‘Riahe nika ida rogo Ezipeta tipa agarã saba, na angbongi ki du agarã saba fuoho. Mo sia gu boro du na tatamana ni igi riahe tipa ka gamo aboro rungongo be gomoro ya.’ Faro akaragapai nga: ‘Mi sia ro! Mo nika ngia ue nyanyakipa boro rogo Ezipeta!’ Wai du Yosefa aini gupai ga Faro musumo aayugoho? Yekova naundo Yosefa.

Vuru agu agarã saba nangbefuo ho, Yosefa aigi riahe. Fuani, ngbongi amangi rogo kpotosende dunduko, a wa Yosefa agumbaha. Aboro aye rogo aringara dunduko ka ngbe riahe be Yosefa. Bako nangia Yakobo agihe nga riahe gudu Ezipeta yo, sidu, ko akedi awiriko bawe i ndu ka ngbe riahe.

Awiri Yakobo andu fuo Yosefa, ko ki ini yo nibasa. Ono awiriba Yosefa ainongo ko te. I anugodi fuko, kina wai ko arari musumo mbuko ni tooni gude. Yosefa aida ka ino singia awiribako kindi na gbegberẽ sino tiyo. Sidu ko ki ya fuyo: ‘Oni nga abamoirago. Oni naida ka ino agu abangiriaba du gaani ringara rogoho na rungbura.’ I ki ya: ‘Oó! Ani nga awirina 12 rogo ringara Kanana. Gu kura wirinarani aima kpi, gu ko nga kiaro du kporo yo na barani.’ Yosefa ki ya: ‘Oni ye na tooni tameroni fere, mi kini ru ka ida kuti gupai oni apehe.’ Sidu, i ki ga ku kporo yo fuo bayo.

Ho riahe anyasi ni beyo, Yakobo akedi awiriko ku Ezipeta yo berewe. Bara gere, i adi Benyamina na yo sa nangia gayo kiaro. Tipa ka asada awiribako, Yosefa aigi gako inga nga ga feda ku rogo ga Benyamina mangu na ki kitingbanga awiribako nga i dĩ he. Ho ga Yosefa amoyambu abi gako inga ni rogo ga Benyamina mangu, gunde aima zio awiribako. I azungadi Yosefa ko mbusi yo kuba Benyamina.

Awere Yosefa aima inoho nga awiribako ima aria sino yo. Gene aadunga berewe be Yosefa ko igi gako nunga te. Ko asu na kpe niya: ‘Mi nga wiribaroni Yosefa. Buba kindi kina ti unga?’ Kina ngba awiribako naazere. Ko aya fuyo: ‘Ka rago gberẽnga tironi tipa gupai oni amangi re na ni ya. Mbori akedi re kono tipa ka batasa unga roni. Awere, oni ndu ni ipo ka ye na buba.’

I andu ku kporo yo ka pe gu wene pangbanga re fu bayo na ki ye na ko ku Ezipeta yo. Yosefa na bako agbiatiyo berewe fuo dungu agarã.