Iradi̇̃ Yisaraere Yo

MO BINGO gu he gu kumba re aigoho ku sende yo tii gako bamburoko yo! Bawene roko, na kpakawa dahabu gbiati feda. Ko adi agu ahe re rogo gu bakporo nangia Yereo. Ono ginipai ka i amangihe na agu ahe naadu Yereo yo? Mo natingidaha?

Si aidi i zoho kusayo, i ki di dahabu na feda ku rogo gu baigoahe naadu tii ga Yekova bamburoko yo. Sidu agi aboro re aima basasangba Mbori. I adĩ agu ahe nangia ga Mbori. Rimo gu kumba re nga Akana, na agu aboro du na ko re nga bete gako aborokporo. Ani bingo gupai namangi.

Fuo dĩ Akana agi ahe re, Yosua akedi akumba i ndu ka sovura kuti gu bakporo nangia Ai. Ono avurayo aima diabeyo. I aimi aguyo, ono aguyo ki oro. Rago agberẽ ti Yosua ni kerehe. Ko avagadi ku sande ni kpakpuko ki kpari fu Yekova ki ya: ‘Tipagine mo nambu gipai re ti ni si mangi rani?’

Yekova ki karagaha ki ya: ‘Mo guari kuari! AYisaraere ingipai. I ima dia bete agu ahe si aidi i zoho kusayo na gu si aidi i ye na ni kutii gimi bamburoko yo. I dĩ bawene roko ki igihe. Mi afunga maku furoni te daho oni ka zoho ni, na ki imi gu boro dĩ agu ahe re.’ Yekova aya ko nika yugo gu boro fu Yosua nga iradĩ re.

Yosua ki dungura aboro dunduko ku rogo ba sa, na Yekova ki yugu gu boro nangia iradĩ, nangia Akana. Akana ki ya: ‘Mi ingipai. Mi abi gu bawene roko re, na gu kpakawa dahabu re gbiati feda. Nyemuhe aima zio re gbe, si du mi adihe ti ni. Si gu mi aigihe ku sende yo tii gimi bamburoko yo.’

Ho i abi agu ahe ni re ki ye na ni fu Yosua, ko aya fu Akana: ‘Tipagine ye mo ti ni na fudifudipai kurirani? Awere tie, Yekova nika ye na fudifudipai kuriro!’ Fuo gumbako gipai re, aboro ki guari dunduko ka sopa Akana na gako aborokporo ni ambia i ki kpiki. Ya mo gipai re ayugongo gupai furani nga ka ani dinga gu he angianga gaani ya te?

Fuo gure, aYisaraere andu ka sovura berewe kuti Ai. Bara gere, Yekova aundo gako aboro i ki dibe vura.