Be Boro Akepai Ti Vurobambu

GINIPAI du namanga ane? Aboro namanga bakere pumbo. Bakindo Babera ayambu dungu akutu gako kikindigipa aboro sa gi pumbo re. I nambira gayo abuda rogo agu ainga dahabu na feda i adihe rogo ga Yekova yekaru Yerusarema yo. Ono i ngere ki bi be boro ngbawege si nikepai ti vurobambu. Aboro dunduko zezere be gunde.

Beresasara, nangia wiri wiri Nebukadenesara, ko du nga bakindo ti gi regbo re. Ko ta ngbako i ye na gako airatatamana. Ko ya: ‘Gu boro ka gedi gi kekeapai re ki gumba rogoyo fere, mi nika fu badungu agamahe funi na ki moi ní ni biata bazogo rogo gi ngbii re dunduko.’ Ono boro ho rengbe ka geda gipai re dagba agu airatatamana re te.

Na bakindo gi fugoko ri ki ye koyo du ko ni. Ri ki ya fu bakindo: ‘Mi nazungadi ro ka mo gundenga gbe ya. Kumba kinaho rogo gamo kindo ini ziazia ambori. Ho titaro nga Nebukadenesara adu ni ni bakindo, ko amoiko ni baira airatatamana dunduko. Rimoko nga Daniere. Mo kedi sunge fuoko na ko nika yugo rogo gu kekeapai yo re ayugo foro.’

I ki ye na Daniere nibasa. Fuo ya Daniere ka ko dinga gamahe be bakindo te, ko tona ka gumba gupai nasa Yekova ko di tita Beresasara nangia Nebukadenesara kusayo ti du ni bakindo. Sangba Daniere nga: ‘Ko adu na bakere rukö. Si du Yekova adi ko ti ni kusayo.’

Ono Daniere ya fu Beresasara: ‘Mo ima ino agu apai dunduko namangi Nebukadenesara, ono mo na rukö kindi wakina ko. Mo yego na agu ainga na akora naadu rogo ga Yekova yekaru yo kaa mbirahe rogoho. Mo nasambuo agu ambori i ambakadiyo rogo ngua na mbia, ono mo airisongo Bakere Bamangiro te. Si du Mbori nakedi be boro ti ni si ke agi apai re foro.

‘Gupai du ni kekehe re nga: “MENE, MENE, TEKERE, UPARUSINA.”

‘MENE wa ka i ya Mbori ima geda arame gamo kindo na ki digisihe. TEKERE wa ka i ya Mbori ima ringbisa ro rogo ũringbisaahe na ki bi gupai nga sunge tiro te. UPARUSINA wa ka i ya i ima fu gamo kindo fu aMadaio na aParaso.’

Mbu Daniere ko nifura kindi, aMadaio na aParaso ima tona ka zio Babera. I zi Babera ki imi Beresasara. Sangba gu kekeapai du ti vurobambu re mangi ni kina gu yuru re! Ono ginipai nika manga tipa aYisaraere? Ani nika ino gure kusa, ono ani bingo gupai mangi tipa Daniere mbata.