Daniere Sima Abahu Yo

WOOWO, woowo! Si wa Daniere rogo kerepai be abahu. Ono ami amanganga ko na pai te! Mo ini nduhe? Da du naye na Daniere ku ane fuo agi abahu re? Ani bingo ho.

Gu bakindo naazoga Babera ti gu regbo re rimoko angia Darayawesa. Daniere aima ngba tiko gbe bambiko sino Daniere aima ngba na ko angia boro tatamana. Darayawesa asia Daniere ko du ni bakere bazogo rogo gako kindo. Gipai re asa gupai nga agu akumba naadu rogo gu kindo re tona ka kpi Daniere, na gere nga gupai i amangihe fuo gure.

I andu fuo Darayawesa ki ya fuko: ‘Ani ima dakuti gupai nga, mo gaani bakindo, mo rũ ndiko nga gu naya ka boro kparingo fu kura mbori watadu boro vuru arame 30 ya, ono i kpari fu kina ro sa. Ka boro basa gipai re, i ki ba ni nibasa ku sima abahu yo.’ Darayawesa aainongo gupai agi akumba re aya ti ni i rũ gi ndiko re te. Ono ko aberẽhe nga wenepai du i agumbaha re, si du ko ake gu ndiko re ti ni. Fuo ke ko gu ndiko re, boro ho narengbe ka ariaha te.

Ho Daniere agi pa gu ndiko ni re, ko andu ku kporo yo ki nikpari fu Yekova a wa ko anaamangaha mbata. Gu gbegberẽ akumba re aima ino gupai nga ka Daniere mbunga kpara fu Yekova te. Sidu, rago aima ngbatiyo ho i abi Daniere ni ko nikpari, bambiko i aberẽhe nga ko nika kpi nibasa wa i aidaha.

Ho Bakindo Darayawesa aini gupai ni agu akumba re aidi ti ni i rũ gu ndiko re, ko abira tiko ni kerehe. Ono zavura ko, ko aarengbanga ka aria gu ndiko re rogo gu baha te. Sidu, ko afu asiahe i ba Daniere ku sima abahu yo. Ono bakindo aya fu Daniere: ‘Mi namaabangire nga, gamo Mbori nga guko mo naairisoko, ko nika batasa ro abatasa.’

Rago agberẽ ti Darayawesa ni kerehe ka ko arengbanga ka ra yuru ya. Ho rago agiri ni, ko aoro koyo sima abahu adu ni. Mo bingo ko ko ningere ku sima abahu yo. Ko akpari kuari ki ya: ‘Daniere, ga unga Mbori moyambu! Ya mo gamo Mbori nga guko mo naairisoko batasi ro be abahu?’

Daniere ki karagaha fuko ki ya: ‘Mbori nikedi gako maraika ko ye ka kiso ngba abahu tipa ka ami mangingo re na pai ya.’

Rago angba ti bakindo ni bakerehe. Ko ki zinahe fu gako akumba i ndu ka kusa ko due yo. Fuoho, ko ki ya i bafu gu gbegberẽ akumba ku sima abahu yo nga aguyo naidi Daniere kpi. Mbata fu agu akumba re da mburu due yo, abahu agu ki sipi yo ki kuadi amemeyo futufutu.

Fuoho, Bakindo Darayawesa ki kepai fu avuruko dunduko ki ya: ‘Mi rũ ndiko ki ya rogo gi ngbii dunduko aboro nigunde agunde ti ga Daniere Mbori. Ko namanga bakere iiriwoapai. Ko batasi Daniere be abahu.’