I Avungu Yesu Bambu Anya Yo

YA MO mo ini da nga gi fogogude re? Yesu du. Gere nga i vunguko bambu anya yo. Maria namaa Yesu ku barigo anya yo, nga guhe adongi na kura anya anaari he rogoho. Ono tipagine du aMaria na Yosefa ti ni ane bambu anya yo? Ati wene ba ngaha i vungu gude rogoho te?

Wene ba ngaha te. Gupai naye na yo ku ane nga: Bazogo Roma rimoko angia Kaisara Auguseto arũ ndiko ki ya aboro dunduko ndu ku rogo agu agbata i avunguyo rogoho tipa ka ke rimoyo yo ku rogo buku. Tipa aMaria na Yosefa, i avunguyo Betereme yo, nga gi ba du yo rogoho re. Ono ho i ada ni Betereme yo, bambu aadunga ho ka i ara rogoho te. Si du i andu ti ni kina ku bambu anya yo. Ni kina gu yuru re du i avungu Yesu! Ono a wa mo abihe, kpotoko adu wenengai ko ki vura du vurũ bambu anya yo.

Ya mo mo nabi agu ababanda akandoro naye ka bi Yesu re? I adu nvuoyo ni gu yuru re naangerafuo gayo akandoro. Bakere imarago ki ye ku patiyo. Maraika du naye! Agu akumba re agunde ni kerehe. Ono maraika ki ya fuyo: ‘Ka oni gundenga ya! Mi naye na wene pangbanga furoni. I vungu Kristo nga Baira areme Betereme yo. Ko nika batasa aboro! Oni ka ndu ki biko i nakaĩ ko na roko ki pigi ko barigo anya yo.’ Badungu amaraika ki ye nibasa kini sambuo Mbori. Agu ababanda akandoro re ki guari ka ora ni ipo ka gbata Yesu, na i ki biko.

Mo ini gupai nyakipa Yesu ti ni? Mo ini da nga ko nzunzu? Mo tingidi gupai nga, rogo gu bambata pangbanga nga ga gi kitabu re, i apepa bambata Wiri Mbori. Gi Wiri Mbori re amangisunge sa na ko ka kusa angbangbaturũ na kpotosende gbiati gu kura ahe. Yesu du nga gi boro re!

Yekova adi ga Yesu unga ngbangbaturũ yo ki moihe ku vuru Maria yo. Gude kini tona ka sona vuru Maria yo a wa agude naasona vuru anara yo. Ono gi gude re angia Wiri Mbori. Ho regbo vunga Yesu ada ni, i avunguko Betereme yo a wa mo abihe re. Ya mo mo ini gupai awere amaraika adu ti ni na bakere ngbarago ka gumbapa vunga Yesu fu aboro?