Yoane Abapatiza Yesu

MO BINGO gu mbipo nazora kurii gu kumba yo re. Gu kumba re nga Yesu. Garãko ho wa 30. Gu kumba du na ko re nga Yoane. Ani aima gia wiripai tipa ko mbata. Ya mo mo natingidapa gu regbo Maria andu ka bi Erizabeta, gu gude naadu vuru Erizabeta yo ki gu kuari be ngbarago? Gu gude re gu nangia Yoane. Ono ginipai du aYoane na Yesu amangaha ane?

Yoane arindosi Yesu kutii gu ime yo nga Yaradene ki kusi ko yo. Wo du i abapatiza boro. I narindosi ní ku tii ime yo ki kusi ní yo. Ga Yoane sunge angia bapatiza aboro, si du i anaayamba ko ti ni nga Yoane Bafu Bapatiza. Ono tipagine Yoane abapatiza Yesu ti ni?

Yoane amangihe wo mbiko Yesu naye fuoko ki ya fuko ko bapatiza ko. Yoane anaabapatiza agu aboro nanaaida ka yugo gayo saberã ti gu gbegberẽ apai i amangihe. Ono ya mo gbegberẽpai ho Yesu amangihe? Oó, gbegberẽpai ho Yesu amangihe wa gu tooni te, bambiko ko angia ziazia Wiri Mbori naye ngbangbaturũ yo. Sidu tie, ko asana Yoane ko bapatiza ko na kura nduhe. Ani bingo gu nduhe re.

Mbata fu Yesu ye fuo Yoane tipa bapatiza, ko angia bakpengua. Bakpengua nga gu boro nambakada ahe rogo ngua yo, wa agu nga mbisa na kiti. Kumbaku Maria nangia Yosefa angia bakpengua, na ko aima yugo gu sunge re fu Yesu. Ono Yekova aakedanga Wiriko ku sende no ko du ni bakpengua te. Kparakpara sunge kinaho ko aye ka mangaha, na regbo ada tipa ko tonaha. Tipa ka yugo gupai nga ko naida ka manga gupai Bako akpinyemuhe awere, ko andu fuo Yoane ko bapatiza ko. Ya mo rago angba ti Mbori na gipai re?

Ii, bambiko ho Yesu akuru ni ime yo, fugo Yekova aye ngbangbaturũ yo niya: ‘Wire du re, ngba ko tire gbe.’ Na mo rengbe ka berãha nga ngbadimo ngbangbaturũ aza aza gi mbipo re kini ye yo kurii Yesu. Ono ndikidi mbipo ngaha te. Guhe re nangera angera gbua wa mbipo. Ga Mbori ziazia toro du.

Fuo zio Yesu bapatiza, ko adu na badungu apai beko ka berãkuriihe. Sidu, ko aguari ki ndu ku ngbakungba yo nisako tipa arame 40. Satana ki ndu fuoko koyo. Satana aˈasadi bara biata ka sa Yesu ko mangi agu apai ga Mbori andiko aidanga na ni ya, ono ka Yesu amanganga gu kandara sa ya.

Fuo gure, Yesu aga ki gbia kura akumba nga aguyo naada ni bambata apefuoko, watadu abawiriki. Bete arimoyo nga Andarea, Petero (kura rimoko angia Simona), Firipo na Natanaere (kura rimoko angia Barutoromayo). Yesu aguari na gi gako vovo abawiriki re ki ndu ku Gariraya yo. I andu ki da rogo gu wiri gbata nangia Kana, yo i avungu Natanaere ni. Yesu andu yo tipa bakere pumbo diadee, ki mangi gako bambata iiriwopai yo. Mo ini gini iiriwopai nangiaha? Ko asa ime ni imekakue.