Yesu Ada ni Masiya

Yoane aima digo ni tungusi gupai nga: ‘Gu ko kii kisusi re naye.’ Ho garã Yesu ada ni 30, ko aguari Gariraya yo ka ndu ku rogo gu Di Nga Yaradene, yo Yoane anaabapatizi aboro ni. Yesu aaida Yoane bapatizi ko ono Yoane aya: ‘Si arẽnga mi bapatizi ro te. Mo du si aida mo bapatizi re.’ Yesu ki ya fu Yoane: ‘Yekova naida mo bapatizi re.’ Sidu, i andu ku rogo gu di nga Yaradene, fuoho, Yoane ki rindosi Yesu dunduko ku ime yo.

Tingbafuo Yesu kuru ime yo, ko akparikpee. Tigu regbo re ngbangbaturũ azaki, ga Mbori toro ki ye kuriko wa mbipo. Fuoho, Yekova afura ngbangbaturũ yo ki ya: “Wire du re, nyemuko namanga re, ngba ko ti re gbe.”

Ho ga Mbori toro aye ni kurii Yesu, ko ada ni Kristo watadu Masiya. Awere tie ko arengbe ka tona manga gu sunge i akedi ko ku auru kpotosende no ko mangihe.

Nibasa tingbafuo Yesu zi bapatiza, ko andu ku ngbakungba yo ki mangi arame koyo 40. Ho ko akaraga tiko ni, ko andu ka bi Yoane. Ho Yesu aambeda ni na Yoane, ko aya: ‘Ga Mbori wiri kandoro du re nga guko nika dia gu ingapai nga ga zegino kusayo.’ Nipe Yoane gipai re, ko asa aboro i ini gupai nga Yesu angia Masiya. Ya mo mo iningo gupai naamangi Yesu ho ko adu ni ngbakungba yo? Ani bingo gupai naamangi.