Yesu Ati Yo

FUO guari Yesu na gako amokedi rogo gu vurubambu naadu kuari yo, i andu ku ati Getesemane yo. I aima ndu ku rogo gu ba re mbata bara dunguhe. Yesu ki ya fuyo i ningere angera na kini kpari fu Mbori. Ko ki gbisi tiyo tooni, ki dua riko kini kpari fu Bako.

Kusa, Yesu ki ye koyo ko ambu gako amokedi ni. Mo naberãha nga ko abiyo i nimangi wai? Ko abiyo i nira ara! Yesu ki ya fuyo i ningere angera. Ko ki ndu ki ye berewe bara ue kini biyo i nira ara, na ko ki gumba kina gupai ko agumba fuyo mbata nga i ningere angera. Yesu aya fuyo ti gu yangara regbo ko aye fuoyo wẽ: ‘Oni naru wai ka ra ti regbo wa gere? Regbo ima da i fu re fu avurare.’

Ti kina gu regbo re, i ki gi woro rimbasa aboro i niye. Akumba kini ye na abaso beyo na angbondo! I adu na zigizigi awe beyo. Ho i ada ni, kumba agu dagbayo ki ye koyo du Yesu ni. Ko ki nyoro pangba Yesu, a wa mo abihe re. Gu kumba re angia Yuda Keriota! Tipagine ko anyoro pangba Yesu ti ni?

Yesu asanako ki ya: ‘Yuda, mo nakusa re fu avurare ni nyora pangba re?’ Ii, Yuda anyoro pangba Yesu tipa avurako iniko ka zioko. Avura Yesu aye nibasa ka zioko. Ono Petero abihe nga si aidanga ko sungu asungo kini bi Yesu i niziko te. Ko amo gako basape ka de rii gu kumba nambedi na ko na ni. Basape agusi rii gu ­kumba re ki kati kina tuko. Ono Yesu azadi tu gu kumba re ko ki hu.

Yesu ki ya fu Petero: ‘Mo karaga gamo basape kubaha yo. Mo ainongo nga mi rengbe arengba ka sana Buba ko kedi badungu akutu amaraika i ye ka batasa re te?’ Yesu arengbe arengba ka sana Bako ko kedi amaraika! Ono ko aamanganga ha wo te, bambiko ko abihe nga regbo ima da avurako ziko. Ko ambu tiko fuyo i ndu na ko. Ani bingo gupai namangi tipa Yesu fuo gure.