Yesu Aga Ku Ngbangbaturũ Yo

WA AˈURU aasusa, Yesu ayugu tiko fu apefuoko bara dunguhe. Ti kura regbo, abawiriki wa 500 nabiko. Ho ko ayugu tiko ni fuyo, mo ini ginipai ko afura na yo tipaha? Ko afura na yo tipa ga Mbori Kindo. Yekova akedi Yesu ku sende no tipa ko yugupai fu aboro tipa ga Mbori Kindo. Yesu aka kindi kuti tungusapai zavura fuo zinga ko be kpio.

Ya mo mo natingidapa gine nga ga Mbori Kindo? Ii, gu Kindo re nga ndikidi zogarago nga ga Mbori du ngbangbaturũ yo, na Mbori sia Yesu ko du ni gaha bakindo. A wa ani awirikihe, Yesu aima yugo gupai gbaiga nga ko nika ngia wene bakindo ni riga ko aboro gomoro, ni husa ko aboro wokote, na ni zingisa ko aboro be kpio!

Ho Yesu nika zogarago ni ngbangbaturũ yo tipa agarã kutu, apai nika du wai auru kpotosende ane? Nirengo, i nika sa kpotosende naabaha ni paradizo. Vura, gbegberẽ mangaapai, wokote, na kpio adunga berewe te. Ani nainoho nga rengo du nga gipai re mbiko Mbori amangi kpotosende si du ni paradizo tipa aboro raki rogoho zezeredi. Si nga ndu gupai ko amangi ati Edene ti ni ti tonatonaha. Na gupai Mbori aidaha, Yesu nika mangaha dunduko.

Regbo ada tie tipa Yesu ga ku ngbangbaturũ yo. Yesu ayugu tiko fu gako abawiriki tipa aˈuru 40. I aima ye ka ino gupai nga ko ima zinga be kpio nirengo. Ono mbata fu Yesu mbu gako abawiriki, ko aya fuyo wẽ: ‘Oni sungu kina Yerusarema yo daho ziazia toro nika ye ni kurironi.’ Ziazia toro nga ga Mbori zaaza ome mangapai, si wakina gu wege naya. Si adu nga si nika undo ga Yesu abawiriki i mangi gupai Mbori akpinyemuhe. Ni yangaraha, Yesu aya: ‘Oni atungusapai tipa re ki da na ni ku digido sende yo.’

Fuo Yesu gumba gipai re, iiriwopai amangi. Ko atona ka gu ku ngbangbaturũ yo, a wa mo abihe ane re. Dubo ki igi ko ti bangiri aboro, ka gako abawiriki abingo ko berewe ya. Yesu aga ku ngbangbaturũ yo ki tona ka zogarago kurii gako abawiriki ku auru kpotosende no.