Oni Wirikipai Rogo Fugo Mbori Yo

Gine nga ga Mbori Kindo?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Gine nga ga Mbori Kindo?

Gu Kindo nga ga Mbori nga zogarago du ngbangbaturũ yo. Si nika dia agu azogarago du awere re dunduko kusayo na ki sa gupai Mbori akpinyemuhe mangi ngbangbaturũ yo na auru kpotosende. Sidu, kina ga Mbori Kindo sa rengbe ka zogarago wenengai.​—Oni gedi Daniere 2:44; Matayo 6:9, 10.

Kindo duwa ka si du na bakindo ti ni. Yekova asia wiriko nga Yesu tipa ko du ni Bakindo gako Kindo.​—Oni gedi Ruka 1:30-33.

2. Tipagine rẽ Yesu arẽ ti ni kadu Nibazogo?

Kina wiri Mbori sa rẽ bambiko ko nga boro weneringise, ko naru nyanyaki tipa gupai du niruruhe, na ko na gu ome tiko si aidaha tipa ka undo aboro. (Matayo 11:28-30) Fuo i zingisi Yesu bekpio, ko aga ku ngbangbaturũ yo ki sungu pati kumbabe Yekova kaa pido pagbia. (AEbere 10:12, 13) Niyangaraha, Mbori afu pagbia fuko tipa ko tona zogarago ngbangbaturũ yo.​—Oni gedi Daniere 7:13, 14.

3. Ada berewe nika zogarago na Yesu?

Badona aboro Ziazia Kekeapai aya tiyo “ziazia yo” Mbori nasia yó i zogarago na Yesu ngbangbaturũ yo. (Daniere 7:27) Gu bambata aboro i asiayo i du dagba gi ziazia aboro re angia ga Yesu amokedi. Yekova aima digo nisia akumba na adee i du dagba gi ziazia aboro re da ku awere. Kina wai i azingisi Yesu bekpio, i nazingisa yó na gu kpoto tiyo nga ga toro.​—Oni gedi Yoane 14:1-3; 1 AKorindo 15:42-45.

Bange aboro wai naga ku ngbangbaturũ yo? Yesu ayambuyo nga “umba rika aboro.” (Ruka 12:32) Bangeyo dunduko nikadu nga 144,000, na i nika zogarago na Yesu ku auru kpotosende.​—Oni gedi Yugoti 5:9, 10; 14:1.

4. Ti gini regbo ga Mbori Kindo atona zogarago?

Yesu adani Bakindo rogo gu garã nangia 1914.a Ngbutuko fuo gure, ko aba Satana na gako adaimona kusende no. (Yugoti 12:7-10, 12) Natona ti gu regbo re ka da ku awere, gu fudifudiapai nagbia rikaaboro nasona kina kumbatayo. Avura, abazigizo, angbongi, riri akaza, gbiati gbegberẽ mangaapai nayugo gupai nga gi zegino ani araka rogoho re ima mbeda ka digo. (2 Timoteo3:1-5) Agu aboro dunduko naida ka gbia amaku be ga Mbori Kindo, i duwa ka wiriki wai ka pekafuo Bakindo gu Kindo re nga Yesu.​—Oni gedi Ruka 21:7, 10, 11, 31, 34, 35.

5. Ginipai ga Mbori Kindo amangaha?

Vurube gu sunge tungusapai namanga rogo zegino dunduko, ga Mbori Kindo ima undo amirioni aboro dagba rikaaboro dunduko i wirikipai tipa Mbori. (Matayo 24:14) Gu Kindo re nika banda gu “bakere rimbasa aboro” nga aguyo nika nye niruruyo fu Yesu ho ko nikaa gbarasa gi zegino re ni.​—Oni gedi Yugoti 7:9, 10, 13-17.

Vuru agarã yo nga 1,000, gu Kindo re nika sa kpotosende niparadizo yee. Niyangaraha, Yesu nika karaga gu Kindo re fu Bako. (1 AKorindo 15:24-26) Ya mo oni iningo gu boro si aida oni gumbapai funi tipa ga Mbori Kindo?​—Oni gedi Atambuahe 37:10, 11, 29.

Ka oni aida ka ino kura apai tipa gipai re, oni bi akapita 8 na 9 nga ga gi buku re Gini Apai Nzunzu Ziazia Kekeapai Ayugoho?, si nga gu buku aDezire Yekova akusaha.

[Gu rukutu kekeapai du bandu kpewaraga yo]