Mo Ndusunge Yekova, Angianga Satana Ya

Ani dunduko du na siapai berani ka mangaha, singia ani naida ka ndusunge Yekova watadu ka ndusunge Satana na gako adaimona. Ani arengbanga ka mangaha ue dunduko te. Si ni patatamana ani ndusunge Yekova.

Yekova Ni Wene Ko

A wa ani nabihe, adaimona nagbia ngbarago mbiko mangayo aboro gbegberẽ na kini biriki yo. Yekova wo te. Ko nakpinyemu aboro wa wene baagude. Ko nga bagamu “wene gamahe dunduko, na ziazia ũgamahe dunduko.” (Yakoba 1:17) Ko akanga na wenehe be aboro te, zavura gu paha naima nyaka fuko gbe.​—AEfeso 2:​4-7.

Mo berẽnga pa agu apai wiri Mbori nga Yesu amangihe auru kpotosende. Ko asa airabubo i niifura, na ki zaki bangiri airavurari. Ko ahusi aboro ngbataka na gbarĩgbarĩ aboro. Ko adandi adaimona ti aboro na ki husi ngbatunga akaza dũ. Ko azingisi aboro a be kpio ni gu ome nga ga Mbori.​—Matayo 9:​32-35; 15:​30, 31; Ruka 7:​11-15.

Mbori agumbanga ziree ka nanga rani te, ono ko nagumba kina rengo ti aregbo dũ. Ko ananganga boro wagusa te.​—Pa Geda Aboro 23:19.

Mo Ne Gbegberẽ Mangaapai

A wa pioturẽ naazio agbiro nyanyaki, dungu amirioni aboro du ni zizi yo fu sangbaatoro na ziree. I nagunde be kpikpi aboro. I nagunde be adaimona. I nabakabangiriyo nga ome motiwa nika du kuriyo, watadu boro nika mangayo na ngua. I ni zizi yo fu agu aida na asino du mburuhe rii agu aziree nga ga Satana. Ga Mbori amoyambu ni zizi yo fu agi apai re te.

Yekova na ome ki susi Satana gbe. Ka mo airiso Yekova, ko banda ro abanda be adaimona. (Yakoba 4:7) Boro amanganga ro na ngua si ki zi ro te. Ni kpiapai, Nigeria yo, kere aborongua biata amangi ngua tipa ka imo Dezire Yekova sa nga guko naaidanga ka guari rogo gu gbata i adu rogoho ya. Ho gu ngua re aamanganga sunge ni ya, kumba sa dagba agu aborongua re atona ka gunde gbe, ko ki ndu fuo gu Dezire Yekova re, ki zungodi ko ko mbupai fuko.

Ka adaimona afuda ro, mo kpari fu Yekova ti rimoko na ko nika banda ro abanda. (Asanza 18:10) Ono tipa Mbori banda ro, mo duwa ka mo kusi goro kusayo ti agu apai nabipa sangbaatoro na iriso adaimona. Si nga gupai agu airisimbori naadu Efesa amangihe. I adungura gayo akitabu soroka dunduko ki zokodihe. (Amokedi 19:​19, 20) Si naida agu airisimbori du areme mangi kinawo a. Mo nyasiriipa agu ahe duwa akura, agbau, aruma, na agu ahe dunduko nabipa sangbaatoro.

Mo Mangi Ndikidi Irisombori

Ka mo aida ka sa ngbarago ti Mbori, anga gupai si aidaha gbua nga mo mbu zire pambori ki mbu gbegberẽ mangaapai te. Si naida aida a mo nimangi ndikidi irisombori kakaka. Ziazia Kekeapai nayugo gupai si aidaha tipa ndikdi irisombori:

Mo Nikoditiro na ADezire Yekova

Satana na adaimona na aboro beyo auru kpotosende nayugo gbegberẽ apai fu aboro na kini mangihe. Ono Yekova na kina aboro beko a. I nga aDezire Yekova. (Yesaya 43:10) Bange aDezire Yekova rogo zegino dunduko ima susa amirioni muambe. I dunduko naˈasadatiyo nyanyaki kaa manga weneapai na kini yugu rengo fu aboro. Rogo dungu aringara, mo rengbe ka gbiayo Bambu Kindo yo, nga gu ba i airisombori rogoho. Aboro dunduko i adiayo kugume koyo.

Gayo sunge nga ka undo aboro i ndusunge Mbori. I nika yugo Baibiri ayugo foro kpuro yo watadu rogo kura ba ka ngba tiro, tipa ka undoro mo ini wai ka iriso Yekova ngba ruru gene. Mo atumongo marã tipa gipai re te. ADezire Yekova na ngbarago ka yugo rengo bambiko i nakpinyemu aboro na kini kpinyemu Yekova Mbori.