PAPARAHA 8

Oni Ta Soga Zire Pambori Kini Mangi Ndikidi Pambori

1. Nibipa irisombori, gini siapai du barabangiri aboro areme?

YESU ayaa: “Gu ni ka du nga na mi ya vurare nga ni.” (Matayo 12:30) Sidu, ani kubara Yekova yo watadu kubara Satana yo. Dungu aboro naberã gupai nga, i namangasunge fu Mbori ngba ruru gene, ono Ziazia Kekeapai nayaa Satana nga “banangi aboro kpotosende yo dunduko.” (Yugoti 12:9) Dungu aboro idi kuti gupai nga, Mbori i airiso ko, ono gu boro nzunzu i amangasunge funi nga Satana Bakitingbanga! Aboro areme na siapai barabangiri yo: Si naida i mangisunge fu Yekova, ‘nga Mbori rengo,’ watadu fu Satana nga, ‘irazire nga baha.’—Atambuahe 31:5; Yoane 8:44.

Oni Kuru Kusayo Rogo Zire Pambori

2. Gine nga gu kura gene sa Satana a’asada ka rugusa aboro rogoho ti iriso yo Yekova?

² Pa dia boro berã ka mangasunge fu Yekova nga gu siapai nga ga tatamana, na nigu siapai Mbori aidapaha. Ono ngbanga rago ti Satana na gu boro namangasunge fu Mbori te; ko naye na fudifudiapai fu agu aboro namangasunge fu Mbori. Gene sa dagba agu akuraha ko amangaha rogoho nga ka sa abakurea boro watadu gani aborokporo i naasawia ni watadu i naasoga ni. Yesu azahe ki yaa: “Avura boro angia kina gani aborokporo.”—Matayo 10:36.

3. Ka gaoni aborokporo watadu abakurea roni asogote roni tipa iriso Mbori, ginipai ka oni mangihe?

³ Kangia gupai re nika manga roni, wai oni ka mangapai sani? Dungu aboro ima ino gupai nga, gayo gene irisombori arunga te, wa vura ino yo gipai re, du yo adu dindikodindiko ka kura kusayo rogoho. I naberãha ya, si dunga nirurupai bangiri gayo aborokporo ka i mangihe wo te. Ya mo ru gupai re aru? Ka oni ini gupai nga gu kura aboro dagba gaoni aborokporo mbiri kerehe ku kpotoyo yo ya tipa si fu wasa fuyo, oni zanga yo ya gu ngua re nika fu kaza fuyo tee? Ya mo oni kodi tironi na yo kuti mbira gu kere ngua re?

4. Ginipai Yosua agumbaha fu aYisaraere tipa irisombori ti rago ko?

⁴ Yosua angarasi aYisaraere i mbu gu iraira mangaapai nangia ga pambori gbiati sino atitayo. Ko ayaa: “Awere tie, oni gúnde ti Yekova, ki nimangi pako ni ndikidi rengo na rurupai. Oni báfu agu ambori ku sa yo abaroni anairisa ha mbiti gu Di yo re, na Ezipeta yo a. Oni ki nimangi pa Yekova.” (Yosua 24:14) Yosua aduni ruru ko fu Mbori, sidu Yekova ki fu maku fuko. Ka ani du niruru rani fu Yekova, ko fu maku afu fu rani a.—2 Samuere 22:26.

Agu Apai Apambori Ayugoho—Gu Nga Rengo na gu Nga Zire

Tirinita: Dungu apambori nayugopai fu aboro ya Mbori nga Tirinita. I nayawee “Baa nga Mbori, Wiri [nga Yesu] nga Mbori, na Ziazia Toro nga Mbori, ono wa vura duhe were, anga aMbori biata te ono Mbori kina sa.”

Ziazia Kekeapai afuranga tipa kandara gu fugo nga “Tirinita” te, na si ayugonga gupai a nga, Yekova nga aboro biata rogo boro sa te. Kina Yekova sa nga Mbori. Bambata AKorindo 8:6 nayaa: “Mbori du ho sa, nga Ba.” Yekova nga Bakere Boro kisusi. Anga Yesu nga Mbori te, ono ko nga “Wiri Mbori.” (1 Yoane 4:15) Teketeke a, ziazia toro nga Mbori te. Anga ziazia toro nga kandara boro a te. Si nga ga Mbori zaza ome.—Amokedi 1:8; AEfeso 5:18.
Mbisimo: Dungu apambori nayugopai fu aboro ya mbisimo nga guhe du rogo boro yo arengbanga ka kpi ya. Ziazia Kekeapai nayugo gupai nga, mbisimo nga boro, na ki rengbe arengba ka kpi mbiko boro nakpi akpi.—Bambata Pai 2:7; Yezekere 18:4.
We-iferno: Zire apambori nayugopai fu aboro ya i narungosi mbisimo gbegbere aboro rogo we-iferno nyeanye kindi. Ono, Ziazia Kekeapai nayawee “kpikpi aboro aina nga pai te.” (Batungusipai 9:5) Ziazia Kekeapai nayugo gupai a nga, “Mbori nga nyemuse.” (1 Yoane 4:8) Yekova, nga Mbori nyemuse, arengbanga ka rungosi aboro rogo we yo te.

Sanduki: Ginipai Ziazia Kekeapai ayugoho tipa Tirinita, mbisimo, na we-iferno?

Oni Bafu agu Ahe Kusayo Aboro Amangasunge Nani Rogo Zire Irisombori

5. Tipagine si aida ani bafu agu ahe ti ni kusayo nga aũmanga ngua?

⁵ Pa kura ani kusayo rogo zire pambori naida gupai a nga, ani gbarasi agu ahe dunduko nga aũmanga ngua nga gu ka du berani, ngbatunga gu du wa gbäu, kura, zamba atongo na abenge, agu arangaa nga ga abinza, radiradi asaranga na ngbatunga ahe wa gure. Gipai re ninyanyakipa pai, mbiko si nayugo gupai nga, ani nakido kina kuti Yekova sa.

6. Gine bambata aKristano amangihe na gu gayo abuku nadu na pa manga ngua rogoho?

⁶ Oni wisiginga gupai bete bambata aKristano amangihe ho i adiberã ni ka manga ndikidi pambori. Ziazia Kekeapai nayaa: “Agu yo ni umba yo te nanasoroka i ki dungura gayo akitabu, ki zo ho azo ku bangiri aboro dũ.”—Amokedi 19:19.

7. Ginipai rengbe ani ka mangaha ka adaimona tona ka rungosi rani?

⁷ Adaimona rengbe arengba ka rungosi agu aboro nga gu beteyo tona ka mangasunge fu Yekova ono nga aguyo narimisi tiyo mbata kurogo sunge abinza, mangu, watadu manga ngua. Kangia gupai re nika manga roni, oni kparikpee fu Yekova na fugo roni kuari kini yambu rimoko. Ko aundo roni aundo.—Asanza 18:10; Yakoba 4:7.

8. Wai aKristano abi sekeseke kpiaahe, keke kpiaahe na dede kpiaahe nga gu aboro amangasunge nani rogo zire irisombori?

⁸ Agu aboro naida ka mangasunge fu Yekova, si aidanga i banda sekeseke kpiaahe, watadu keke kpiaahe watadu ka mangasunge nani te, nga gu kpiaahe aboro amangasunge nani rogo zire irisombori. Ndikidi aKristano “naata rogo idapase [ono,] rogo bipai te.” (2 AKorindo 5:7) I nairisa gu ga Mbori ndiko nazahe ti manga boro sunge na kpiaahe rogo irisombori.—Gate 20:4, 5.

Oni Kodi Tironi Kuti ga Yekova Aboro

Nagude na tooni wiiri ni degude napasa riahe wa sa

9. Gini rugute Ziazia Kekeapai afuhe tipa boro dani iratatamana?

⁹ Ziazia Kekeapai nayaa: “Gu boro nata na boro tatamana ni adú ni iratatamana a.” (Asanza 13:20) Ka ani aida kadu ni airatatamana, si naida ani naata na aDezire Yekova watadu ani naakoda tirani na yo. I nga agu aboro nandu ngba gu gene nandu na boro sa unga.—Matayo 7:14.

10. Wai rengbe aDezire Yekova ka undo roni oni mangisunge fu Mbori?

¹⁰ ADezire nangera angera nirengo fuo aboro. Gayo sunge nga ka undo agu aboro duna ruru ngbaduyo yo i girogo gu rengo nga ga Ziazia Kekeapai nga gu nandu na boro sa nyenye unga. I rengbe ka undo roni niwisigo yo Ziazia Kekeapai na oni gbua zanga oni tumo tipaha. I akaragapai sa gaoni asanahe na ki yugu wai fu roni rengbe oni ka manga gu inohe nga ga Ziazia Kekeapai rogo gaoni raka.—Yoane 17:3.

11. Wai rengbe agu adunguratise nga ga aKristano ka undo roni?

¹¹ Ba gayo dunguratise yo, nga gu i naamangaha dedede tii gayo Bambu Kindo yo, oni awirika dungu apai yo tipa ga Yekova agene. I angarasa roni kuti gu nyemupai du tironi nga ga manga ndikidi pambori. Na i ayugopai fu roni a tipa wai rengbe oni ka undo kura aboro i ini agu arengo nga ga Ziazia Kekeapai.—AEbere 10:24, 25.

Dunguratise nga ga dungurati Bambu Kindo yo

12. Wai rengbe kparakpee ka undo roni oni mangisunge fu Mbori?

¹² Wa oni awirikapai tipa gupai Yekova akpinyemuhe na tipa gako ringbisapai, zanga kapa, oni akiiso gaoni tambuahe akiiso tipa gu gako agene ko afuhe fu rani rogo nyemuse. Si naida oni sonosi gaoni nyemu fu ngbarago fuko na ki ne manga gupai nafu gberarago fuko. Oni tingidi gupai nga, oni rengbe arengba ka mbeda koyo du Yekova ni rogo kparakpee ka sana ko tipa ko undo roni oni mangi gupai du niruruhe na ki ne manga gupai arunga ya.—1 AKorindo 6:9, 10; AFiripoio 4:6.

Aborokporo nageda Baibiri kina sa — Wai rengbe oni ka manga ndikidi pambori?

13. Wai rengbe oni ka sa ngbadu Yekova si ngi?

¹³ Fuo bete regbo kusa, wa oni kaa sona rogo toroyo, zanga kapa oni abi gupai nga, si naida oni da nigu Dezire nga ga Yekova ni ima kpara tini fuko ki zi bapatiza. Nikoda oni tironi kuti ga Yekova aboro, oni asa ngbadu Yekova si ngi. (Asanza 27:11) Oni adu dagba agu aboro ngbarago Mbori aya tipa yo wee: “Mi anyé rogo yo yo, ki nita dagba yo yo; mi ki du ni gayo Mbori, i ki du ni gimi aboro.”—2 AKorindo 6:16.

Mi Abati be Adaimona

Rogo kura yuru sa wa mi aara rii barame pati kumbaami, mi agi fugo si niyambu re bara biata. Fuo gure, mi abi riibambuyo si nakparaka rogoho ue, he ni wiriwirihe naaki wa we ati ku auru vure. Rengo ngaha, kumbaami arengbanga ka bi agi apai re te. Wa si avura du wo, kpotore arungudi nikerehe tipa dungu adiwi.

Kusa, fuo susa adiwi sita, mi agi gu fugo re berewe si niyambu re. Nibasa, mi ki bi gupai nga si wa bambu naabaha rogo ngirimo ime. Bakikii gbara akuru ime yo ki kai tiru kuti bere. Mi a’asadi tire vurũ ka zugbuga ru kusayo. Bakere gunde azire. Fuo gure, gu ime re na gu woo re abirikpo bangire, he ki mere re kusande na kere ome. He amare tipa dungu asaa. Gu fugo re aya fere wee mi karaga tire kurogo gu bambu abinza du tipa husa akaza nga gu du rogo gu gbaria re. Ho mi asana gu toro re ni tipa rimoko, ko ayugu gu rimo fere du rogoyo nga, “irakumuko ono zanga gude.” Ko akido re ka sa re ni irakumuko be gu ome nga ga husa akaza.

Agu aboro kaza nadu mbembedii pakpurani na aguyo nadu tutuurũ anaye fuo re. Mbata fu i da kpure yo, mi aniima biyo rogo gimi kparakpara bitirobi nga ga ngua. Fuo gure, wa boro anida, mi aniyawa kpabere kpabeniyo na bere, fuo gure tie pa gu kaza namanga ni watadu gupai nafuda ni ki du niyuguyuguhe fere nibasa gbiati gu ziga du tipaha. Gu toro re apepa bakio gu marã a si aida aboro nitumoho fere.

Amarã gbiati agamahe anafuka ku kpure yo mbiko gu wene husa akaza mi anamangaha. Mi adani “irakumuko,” mi ki ini rogo gupai yo a gu toro re agumbaha fere nga, “zanga gude.” Ti agu aregbo dunduko mi anibatika gude, gu unvura ni ni angbe fuo ni kini kpi nibasa. Gipai re anafudare gbegberee. Vuru agu agarã 12 mi aamangasunge fu gi toro re, agude sita dagba awire akpiki.

Mi atona ka kpara fu Mbori tipa undo. Mi anakparakpee kakaka. Rogo kura uru sa, aDezire Yekova angoka ngbadimo kpure. Wa si avura du nga, dedede mi anado yo ado kusayo, mi adiberã rogo gu uru re ka degature koyo du yo ni. Rogo gu sakapai ani asakihe na yo, mi aini gupai nga, daimona du mi anamangasunge fuko! Mi adiberã ka mbu manga sangbaatoro.

Ho mi agumba gupai ni re fu gu toro re, ko aza re ya ka mi mbunga manga sangbaatoro ya. Wa si avura du wo, mi aya fuko: “Pai ho du dagba re na mo berewe te.”

Mi azokodi agu ahe dunduko mi anamangasunge nani rogo soroka. Mi awisigi Ziazia Kekeapai na aDezire, ki da niga Yekova moyambu, na ki zi bapatiza rogo 1973. Mi awere na agude bere bisue na kpotoyo niwenehe. Kumbaami ada a ni gu Dezire naima zio bapatiza.—Gu pangbangaa re, nga fugo Josephine Ikezu.

Sanduki: Wai dee sa abati be adaimona.