Gini Apai I Aida Kuti Ni?

ADEZIRE YEKOVA naida kuti Mbori Tanduapai-dũ, nga Yekova, nga Bakusi angbangbaturũ na kpotosende. Padu gu kpakarakpakara iiriwo ahe ho i amangihe rogo gu haurago ke pati rani kirikiri nayugo gupai niruruhe nga boro gu duho duna tatamana kisusi nga gu Bakusiahe duna bakere ome tiko nakusi agi ahe dunduko re. A wa sabe akumba na adee naayugo asinoyo, kinawo a asabe Yekova Mbori ayugo sinoko. Baibiri nagumba gupai fu rani nga “gu gako apai ka i abi nga ya nga gako nyenye tandu na sino Mbori i nabi he abi ziazia, tona kina ho rago aenge ni. I nabi he kina rogo agu ahe yo ko amangi.” Berewe a, zanga gumbapai watadu fugo, “angbangbaturũ ninataka pande gu taarimo nga ga Mbori.”—ARomo 1:20; Atambuahe 19:1-4.

Aboro naamekanga aakoro watadu ka mbakada terevizioni na akompiuta zanga nduhe te. Kpotosende na gaha kusikusiahe nga unga kurukuru ahe na unga anyaa ni baiiriwoho gbe. Gu gene i ambakadi kpoto boro rogo na gaha zagino cells [misimisiahe], si ni gupai ka ani rugutirani nani te—zavura gu dudu ani naaberã nani, si ni gu iiriwo he ka ani aruganga tirani nani a ya! Kangia aboro na ndupai beyo tipa manga gayo vovo sangisangi ahe nga gu anyakanga paha ya, Yekova Mbori nirengo tie na ndupai beko tipa gako banarũ kusikusiahe! Asanza 16:4 nayaa: ‘Yekova amangi ahe dunduko tipa gaha sunge.’

Yekova ambakadi kpotosende tipa sunge, a wa ko agumbaha fu bambata aboro ue niyaa: “Oni zúga azuga, ki nge ange, ki hisi kpotosende . . . ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.” (Bambata Pai 1:28) Bambiko agi arogotise re ada ni abasasangbaa, i akpa ti hiiso kpotosende na ruru aborokporo nga aguyo kaa ngerafuo kpotosende ni nyemuse na gaha kurukuruahe na anyaa. Ono anga pa kpa yo ti manga gupai re nasa ga Yekova ringbisapai si ti ku ime yo te. Fuo dungu kutu agarã kusa, i ake gupai nga: “Mbori, nga Bamangi kpotosende . . . , [ko] akusangaha gbua te.” Ko “amangihe aboro niraki rogo.” I agbarasanga ha te, ono “kpotosende anye anye kindi.” (Yesaya 45:18; Batungusipai 1:4, The New English Bible) Ga Yekova ringbisapai tipa kpotosende amanga amanga: “Gi rugapai arú aru, mi amánga agu apai ngba ti re dũ.”—Yesaya 46:10.

Sidu, aDezire Yekova naida kuti gupai nga kpotosende anyeanye kindi, na aboro dunduko, gu ungayo na gu kpikpiyo, nga aguyo nika rẽ na ga Yekova ringbisapai tipa bawene kpotosende, nga gu kpotosende aboro nikaa raka auruhe, i rengbe arengba ka raka nyeanye kindi. Aboro dunduko adi ingapai ti Adamu na Eva, sidu, i nga airaingaapai. (ARomo 5:12) Baibiri nagumba gupai fu rani nga: “Mosoro ingapai nga kpio.” “Agu yo du ni ungayo i ini he ya i akpi akpi, ono kpikpi aboro aina nga pai te.” “Gu mbisimo ka ainga pai si akpí akpi.” (ARomo 6:23; Batungusipai 9:5; Yezekere 18:4, 20) Ono wai tie rengbe yo ka raka berewe tipa ka du rogo agu amaku nga ga kpotosende re? Mbiko kina gu motumo tumorii nga ga Kristo Yesu, mbiko ko ayaa: “Mi nga zingabekpio, nga unga. Gu ni ka idi pa re, ka ni vura kpi akpi ni du adu ni ungani.” ‘Aguyo du rogo amuro nga ga tingidapase agia fugoko, ki kuru.’—Yoane 5:28, 29; 11:25; Matayo 20:28.

Waigu gere nika manga? I nasakarogoyo rogo gu ‘wene pangbanga nga ga kindo,’ nga gu Yesu atona kaa takapandehe ho ko aduni auru kpotosende. (Matayo 4:17-23) Ono areme, aDezire Yekova natungusa wene pangbanga rogo gu gene du kia.

[Caption on page 12]

KPOTOSENDE . . . Yekova nakusihe . . . . . . aboro ningerefuoho . . . kini raki auruhe nyeanye kindi