Bambata Paparaha: Agu Aida Nga ga Akristano

Gamo wisigo Baibiri na aDezire Yekova ima saro mo iniditiro na rengo. Zanga kapa, gupai mo nawirikihe ima undo ro mo du na wene pagume na Mbori na si ima fu gu maabangirise nga ga raka kumbatayo foro na amaku rogo paradizo auru kpotosende ane tii ga Mbori Kindo. Si ima nyakasa gamo idapase kuti Fugo Mbori, na vurube kodatise na gu dungurati nga ga aKristano, mo ima gbia dungu amaku. Mo ima rugatiro na wai Yekova amangapai na gako aboro areme.​—Zek. 8:23.

Wa mo ambakadatiro awere tipa bapatiza, mo nika gbia undo agbia ti fugö gu bangua aida nga ga aKristano abaakumba nika mangaha na mo. (Eb. 6:1-3) Yekova nifunga maku afu kurii gu ome mo amangaha tipa ka ye ka inoko, na ki fu gu mosoro a foro ko nakido paha.​—Yo. 17:3.

1. Tipagine mo aida ka zio bapatiza ti ni?

2. Da nga Yekova?

• “Yekova ko nga Mbori ngbangbaturũ ari yo na auru kpotosende no; gu ni ho berewe wa sa te.”​—Pa Rug. 4:39.

• “Kina ro sa, du rimoro nga Yekova, nga gu Ko nga Bahe ki susi auru kpotosende dunduko.”​—Tam. 83:18.

3. Tipagine duhe ti ni ni nyanyakipa pai foro mo mangisunge na rimo Mbori?

• “Oni kpári wa gere tie: Barani du ngbangbaturũ yo, Ani írisi rimoro airisa.”​—Mt. 6:9.

• “Gu ni ka kpari ni rimo Gbia [Yekova] ni bati abata.”​—Rom. 10:13.

4. Gini arimo i namangisunge na ni rogo Baibiri yo tipa ka fura tipa Yekova?

• ‘Ya Yekova wẽ, nga gu ko namangi angbangbaturũ (ko nga Mbori!), nambakadi kpotosende ki mangi he (ko anyakasi he).’​—Yes. 45:18.

• ‘Barani du ngbangbaturũ yo.’​—Mt. 6:9.

• ‘Mbori nga nyemuse.’​—1 Yo. 4:8.

5. Ginihe rengbe mo ka fuhe fu Yekova Mbori?

• “Mo kpi nyemu Gbia [Yekova] nga ga Mbori kpotoro yo dunduko, na mbisimoro dũ, na ga berã dũ, na omero dũ.”​—Mk. 12:30.

• “Si ni keke he ya, ‘Mo irisi Gbia [Yekova] nga gamo Mbori, mo ra fu kina ko sa.’”​—Rk. 4:8.

6. Tipagine mo aida ti ni kadu ni ruru ro fu Yekova?

• “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.”​—Snz. 27:11.

7. Da si aida mo kpari funi, na ni rimo da?

• “Mi [Yesu] nagumba ha fu roni, ni rengo, ni rengo, gu he oni ka nikpari pa ha fu Buba, ko afu he afu fu roni ni rimore.”​—Yo. 16:23.

8. Gini bete apai rengbe mo ka manga kparakpee tipaha?

• “Oni kpári wa gere tie: Barani du ngbangbaturũ yo, Ani írisi rimoro airisa. Ga ngbi yé, Ani mángi rogo kpotosende wa mo akpi nyemu he, wa du he ngbangbaturũ yo. Mo fú gaani riahe fu rani areme; Mo vú rani ti gaani bape, Wa ani navu gaani aboro bape a; Ka mo ngbé nga fu rani ku mbata yo sa asada ya, Ono mo túka rani ti gbegberẽpai.”​—Mt. 6:9-13.

• “Mbiko gere ani rengbe ka du zukazuka fu ko, nga, ani ini ka ani ho gu he ku sangba gako nyemuhe yo, ko gi pa rani agia.”​—1 Yo. 5:14.

9. Tipagine rengbe Yekova ti ni ka zanga gia ga boro kparakpee?

• “Si du i akpára ti ni fu Yekova, ono ko akáraga nga pai fu yo te; . . . bambiko i mangi gayo mangaapai ni gbigbita ha.”​—Mika 3:4.

• “Bangiri Gbia du fuo ruru aboro, na tuko ni haha ha tipa gayo akpe. Kpakpu Gbia du kuti amangi gbegberẽpai.”​—1 Pet. 3:12.

10. Da nga Yesu Kristo?

• “Simona Petero ki ta karaga ha niya, ‘Kristo nga mo, nga Wiri gu Mbori du ni ungako.’”​—Mt. 16:16.

11. Tipagine Yesu aye ti ni ku auru kpotosende no?

• “Wiri boro aye nga i nimangi pa ko te, ko naye ka manga pa aboro, ka tumo dungu yo ni ungako.”​—Mt. 20:28.

• “Mi [Yesu] nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.”​—Rk. 4:43.

12. Wai du rengbe mo ka yugo gamo tambuahe tipa ga Yesu motumo?

• “Ko akpi tipa yo dunduko, ya agu yo du ni ungayo ka i du nga ni ungayo fu tiyo ya, ono fu gu ko nakpi tipa yo ki zingi berewe.”​—2 Kor. 5:15.

13. Gini pagbia du be Yesu?

• “I asia pa ahe fere dunduko ku ngbangbaturũ yo na ku sende no.”​—Mt. 28:18.

• “Mbori akiisi pako ti ni a gbe, ki fu gu rimo fu ko zogo arimo dũ.”​—Frp. 2:9.

14. Ya mo mo idi kuti gupai nga gu Riigbu Bipasunge nga ga aDezire Yekova nga “gu [ruru] kangara moyambu tie du na tatamana” Yesu nasia ni?

• “Da nga gu kangara moyambu tie du na tatamana, gani gbia amoi ni ri gako aboro kporo ni fu gayo riahe fu yo ti ragoho”​—Mt. 24:45.

15. Ya mo ziazia toro nga boro?

• “Maraika ki karaga ha fu ri ki ya, ‘Ziazia Toro nikaye sa ro, gu tandu nga ga gu ko zogo aboro dũ nikadada ro; si du i ka ya ti ni ti gu gude mo ka vunga ko, Ziazia ko, nga Wiri Mbori.’”​—Rk. 1:35.

• “Wa du oni tigaoni nga gbegberẽ aboro ki ini pa gama wene ahe fu awironi, Baroni du ngbangbaturũ yo ko susi na gama Ziazia Toro fu agu yo nasana ko, te?”​—Rk. 11:13.

16. Wai du Yekova namangisunge na gako ziazia toro?

• “Angbangbaturũ adu ni mangimangi he mbiko gu pai naakuru ngba Yekova yo, na rimbasa gaha ahe dunduko be gu ome onga naakuru ngbako yo.”​—Tam. 33:6.

• “Oni adía tandu ho Ziazia Toro ka ye ni ku ri roni. Oni adu ni adezirere, . . . na digida sende yo.”​—Amo. 1:8.

• “A nga gu tungusitungusi pai sa nga ga Ziazia Kekeapai naye be boro ni gani berã te. Bambiko a nga tungusitungusi pai sa naye mbiko sangba boro te, ono aboro agumba pai be Mbori, wa Ziazia Toro arugu yo.”​—2 Pet. 1:20, 21.

17. Ga Mbori Kindo nga gine?

• “Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.”​—Dan. 2:44.

18. Wai du ga Mbori Kindo nika fu undo foro?

• “Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”​—Yugo. 21:4.

19. Wai du ini mo ho nga agu amaku nga ga Kindo nika da barambeda?

• “Abawiriki ki ye koyo du ko ni ni rondo, ki ya, ‘Mo gúmba nga ha fu rani, ni gini rago agi apai ka manga re? gine i ka ina pa ga ye ti ni, na pa digida rago?’ Yesu ki karaga ha ki ya fu yo, . . . rika aboro azínga kuti gu rika aboro, ngbi ki zingi kuti gu ngbi; angbongi nikadu na abazigizo rogo agu arago. Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”​—Mt. 24:3, 4, 7, 14.

• “Mo ini gere a, ya rogo kusa rago gbegberẽ rago aye. Bambiko aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai, airasakparakpa, aguaurundika, airasoapai, airazanga rugatise, airaerã, akpi nga nyemu wene pai ya, airabiriki, airanyakari, airaabiatise, i akpí nyemu sangba borose susi nyemu Mbori; ki nika kuti kpia sinombori, ono i ati kangu tandu he.”​—2 Tim. 3:1-5.

20. Wai du rengbe mo ka yugo ho nga Kindo na nyanyakipaha foro?

• “Ono oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni.”​—Mt. 6:33.

• “Yesu ki ya fu gako abawiriki, ‘Gu ni ka akpi nyemu peka re, ni mbú gani apai, ki di gani wagiwagi ngua, ki nipeke re.’”​—Mt. 16:24.

21. Da nga Satana na adaimona?

• “Awiri Bakitingbanga nga oni nga baroni, . . . Ko adu ni baimiaboro ho rago ainge ni.”​—Yo. 8:44.

• “I ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a.”​—Yugo. 12:9.

22. Ginipai Satana akitingbanga Yekova na ni gbiati agu aboro nairisoko?

• “De ki ya fu wo, ‘Gu zuzu angua du ati yo ka ani ri he ari; ono zuzu gu ngua du bebere ati yo, Mbori aya, “Ka oni rí nga zuzuhe ya, ka oni zádi nga ha wa sa ya, oni ka kpi.”’ Wo ki ya fu de, ‘Oni akpí nga wa sa te. Bambiko Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.’”​—Bam. P. 3:2-5.

• “Satana ki karaga ha fu Yekova ki ya, ‘Kpoto tipa kpoto! Agu ahe dunduko du be boro ni afu kina ha tipa ungani.’”​—Eyo. 2:4.

23. Wai du rengbe mo ka yugo na ni nga ga Satana kitangbangase nga ziree?

• “[Mo] nimangi pa ko [Mbori] na kpotoro yo ni ziazia [ha].”​—1 Peka 28:9.

• “Daho mi ka kpi ni mi ambu nga pa gi du ni irarengo te.”​—Eyo. 27:5.

24. Tipagine aboro akpi ti ni?

• “Wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”​—Rom. 5:12.

25. Ginipai ninaamanga ho boro akpi ni?

• “Agu yo du ni ungayo i ini he ya i akpí akpi, ono kpikpi aboro aina nga pai te.”​—Batu. 9:5.

26. Gini maabangirise du ho tipa agu aboro kpiki?

• “Ruru aboro azinga be kpio na iraira yo a.”​—Amo. 24:15.

27. Bange aboro wai naga ku ngbangbaturũ yo ka zogarago na Yesu?

• “Oni ngére, mi ki bi Wiri Kandoro, ko ru ri gu bagangara nga Siona, agu yo ki du na ko 144,000, nga agu yo du na rimoko ni keke he ti ngbanda kpakpuyo, na rimo Bako a.”​—Yugo 14:1.