Tipagine Du Mbori Ti Ni na Riigbu Beko?

1. Tipagine Mbori ambakadi agu aYisaraere nadumbata ti ni kurogo riigbu?

Mbori ambakadi atita gu bakumba nangia Abarayama kurogo riigbu sa na ki fu andiko fuyo. Ko ayambuyo nga “Yisaraere,” watadu “aYisaraere,” na ki sayo i du ni ababanda ndikidi irisombori na sangbako nga Ziazia Kekeapai. (Atambuahe 147:19, 20) Sidu, aboro dagba arikaaboro dunduko narengbe ka gbia undo be aYisaraere.​—Mo gedi Bambata Pai 22:18.

Mbori asia aYisaraere i du nigako adezire. Agu apangbanga du tipa yó nayugokpia wai furani aboro agbia undo ho i airisa ga Mbori andiko ni. (Pa Fu Rugute ni Ue he 4:6) Sidu tie, kura aboro arengbe ka ino ndikidi Mbori mbiko kpariayo gu raka nga ga aYisaraere na kini wirikipai beyo.​—Mo gedi Yesaya 43:10, 12.

2. Tipagine du ndikidi aKristano ti ni nimbakadimbakadiyo kurogo riigbu?

Fuo dungu agarã kusa, aYisaraere agberesipa gayo bakure na Mbori, na Mbori ki moi gu dungurati nga ga aKristano kuba gu rikaaboro re. (Matayo 21:43; 23:37, 38) Awere, ndikidi aKristano du namangasunge ni adezire Yekova, angianga aYisaraere ya.​—Mo gedi Amokedi 15:14, 17.

Yesu ambakadi apefuoko i nitungusipai na kini sa aboro nigako abawiriki dagba arikaaboro dunduko. (Matayo 10:7, 11; 24:14; 28:19, 20) Gi sunge re namanga awere nibakerehe gbe ti gi yangara regbo re. Bambata regbo gere tipa Yekova dungura amirioni aboro dagba arikaaboro dunduko i ye ka irisoko sa. (Yugoti 7:9, 10) Ndikidi aKristano rogo riigbu tipa kaa ngarasa tiyo na kini undo tiyo dagbatiyo. Rogo zegino dunduko, i nagbia kina bangisa arugute nga ga Ziazia Kekeapai ti regbo gayo adunguratise.​—Mo gedi AEbere 10:24, 25.

3. Wai gu riigbu nga ga agu aDezire Yekova du ti gi gaani regbo re atona?

Bara rogo gu garã nangia 1870, tooni badona nga ga abawiriki Ziazia Kekeapai atona ka kura bara agu arengo du rogo Ziazia Kekeapai nga gu naima inga bakuruyo. I aini gupai nga Yesu ambakadi gu dungurati nga ga aKristano tipa si naatungusapai, sidu, i atona ka tungusapa ga Mbori Kindo rogo zegino dunduko. Rogo 1931, i adi gu rimo kuriyo du rogo Ziazia Kekeapai nga aDezire Yekova.​—Mo gedi Amokedi 1:8; 2:1, 4; 5:42.

4. Wai apai amanga rogo gu pambori nga ga aDezire Yekova?

Rogo bambata sa kama agarã, agu adungurati nangia ga aKristano rogo dungu aringara anaagbia undo be riigbu bipasunge nga gu nanaandu kuti gu rugapai nga ga Yesu. (Amokedi 16:4, 5) Wakina gure areme a, aDezire Yekova nagbia undo be gu Riigbu Bipasunge duna abaakumba rogoho nga aguyo duna inohe. Gu Riigbu Bipasunge re nangerakurii agu abe-basunge nga ga aDezire Yekova nga gu nasa agu awaraga du tipa wirika Ziazia Kekeapai kurogo afugo susi 600 na kini kekedihe kurogo arago. Riigbu Bipasunge nafu gu riahe na arugute nga ga toro fu adungurati susi 100,000 rogo zegino dunduko. Rogo agu adungurati re dunduko nibasasa, akumba kina yo namangasunge ni abaakumba, watadu ababiapai. Agi akumba re nangerafuo ga Mbori rimbasa akandoro ninyemuse.​—Mo gedi 1 Petero 5:2, 3.

ADezire Yekova nimbakadimbakadiyo tipa ka tungusa wene pangbanga na ka sa aboro ni abawiriki. Wakina agu amokedi nadumbata, ani natungusapai nitanga nani ti akporo. (Amokedi 20:20) Ani nasana agu aboro nakpinyemu rengo a tipa ka wisigo Ziazia Kekeapai naayo. Ono anga gu pambori nga ga aDezire Yekova nga kungbo riigbu te. Ani nga aborokporo sa, na Barani du ngbangbaturũ yo nga boro nyemuse. Ani nga agu awirina naberãpa akurayo nyanyakii. (2 ATesaroniko 1:3) Wadu he nga ga Yekova aboro nikpamiakpamiayo ka manga gupai nangba ti Yekova na ka undo akurayo, i nga agu aborokporo duna ngbarago kisusi auru kpotosende.​—Mo gedi Atambuahe 33:12; Amokedi 20:35.