Wai Du Apai ni Mbakadimbakadihe Rogo Dungurati

ROGO gu bambata waraga gu mokedi nangia Pauro akehe fu aKorindo, ko ape nyanyakipa rengo yo tipa Mbori nga: “Anga Mbori ni Mbori ruguzuruguzu apai te.” Fuani, ko afura berewe tipa adunguratise ki ya: “I mángi apai dunduko nzunzu ni tangaratangara ha.”​—1 Kor. 14:33, 40.

² Ti tonatona gu waraga re, gu mokedi re afu arugute tipa gu zangagiatise naadu rogo gu dungurati nangia ga Korinda. Ko azungodi awirina yo nga i “gumba pai sa” na i “mongo du teketeke [na kodatise] na berã sa na rugatinapai sa.” (1 Kor. 1:10, 11) Fuo gure, ko afu arugute fuyo nibipa agu apai ni bakiakia naafuda gu kodatise nga ga dungurati. Ni manga ko sunge na gu kpiapai nga ga kpotoboro, ko ayugu pa gu kodatise gbiati mangapai sa si aaidaha. Ko azungodi aKristano dunduko rogo dungurati nga ka i vura du na kina gini asunge beyo, i ngerefuo akurayo rogo nyemuse yo. (1 Kor. 12:12-26) Tipa agu aboro du rogo dungurati du na kodatise na kini mangiapai kina kubani sa, si naida dungurati du na wene mbakadapai.

³ Ono wai du si aaida gu dungurati nga ga aKristano du ni mbakadimbakadihe? Da si adu nga ni nika mbakadaha? Gini ngbatunga mbakadapai du si aaidaha? Ada nikaa ngbembatayo? Si naida ani mbu Baibiri si ngbe furani kumbatayo ani gbia wene akaragapai sa agi asanahe re.​—1 Kor. 4:6.

MBORI NASIGIRA GU DUNGURATI NGA GA AKRISTANO NGBA GAKO GENE

⁴ I asigira gu dungurati nangia ga aKristano ti rago Pendekote rogo gu garã nangia 33 Fuo Batikayo Kristo. Ginipai rengbe ani ka wirikaha tipa gu dungurati naadu rogo bambata sa kama agarã? Mbori du nasigira gu dungurati re na ki mbakadihe si nimangisunge kina wai ko aaidaha. Gu pangbanga ga Mbori toro adu kugii pa kehe Yerusarema yo agarã wa 2,000 kusayo re nasarani ani idi kuti gupai nga gu dungurati nangia ga mbedimbedi aKristano re, Mbori du nasigiraha. (Amo. 2:1-47) Si angia gako bambu na ni gako kporo. (1 Kor. 3:9; Ef. 2:19) Kina wai i ambakadi apai rogo dungurati rogo bambata sa kama agarã na kini nungusihe, kinawo a gu dungurati nga ga aKristano amangaha areme.

⁵ Bambata dungurati atona na abawiriki rogoho wa 120. Ziazia toro auka ni bambataha kuriyo ka digiso gu sangbanebi du rogo Yoere 2:28, 29. (Amo. 2:16-18) Ono rogo kina gu bangisa uru re, kura aboro wa 3,000 azi bapatiza na ki ye ku rogo dungurati nga ga mbedimbedi aKristano. I aima idapa Kristo na “i ki nye anye rogo ga amokedi yugopai yo.” Ti ngbafuo gure, “Gbia [Yekova] ki nifu agu aboro nanabata ku dagba yo yo na uru” dũ.​—Amo. 2:41, 42, 47.

⁶ Gu sonakumbatayo naadu rogo gu dungurati naadu Yerusarema yo aima kio gbe si ki sa ga aYudo gbiamotumo ko kpakanahe nga abawiriki ima hiiso Yerusarema na gayo yugopai. Gu vovo abawiriki naadu Yerusarema yo aakoda gu dungu ga aYudo agbiamotumo naada ni aKristano.​—Amo. 5:27, 28; 6:7.

⁷ Yesu aya: “Oni adu ni adezirere, Yerusarema yo na Yuda yo a Somorona yo, na digida sende yo.” (Amo. 1:8) Na si amangi wo nirengo nga fuo rungosiro tona Yerusarema yo ti gu regbo i aimi Setefano, agu abawiriki naaraka yo agbandaka ku rogo ringara Yuda na Somorona. Ono agu aba dunduko i aandu ku rogoho, i aatungusa wene pangbanga kindi na kini sa dungu aboro ni abawiriki, kodihe na aboro Somorona a. (Amo. 8:1-13) Kusa, i atungusi wene pangbanga na diabese fu azanga yeratise, nga gu kungbo aboro naangianga aYudo ya. (Amo. 10:1-48) Gi tungusapai re asa gupai nga dungu aboro da ni abawiriki na dungu vovo adungurati ki tona ka kura rogo gu kura aba kia ti Yerusarema.​—Amo. 11:19-21; 14:21-23.

⁸ Gini mbakadapai i amangihe tipa si niyugu gupai nga Yekova du sigira gi vovo adungurati re dunduko na si namanga apai ni mbakadimbakadihe kina wai Mbori aidaha? Vuru gu mangapai nga ga ga Mbori ziazia toro, mbakadapai adu fu agu ababanda akandoro du kutiibe Yesu i ningerefuo avusende. Rogo agu adungurati aPauro na Barunaba andu gayo bambata nunguro nga ga amokedi ku rogoho, i asia abaakumba yo. (Amo. 14:23) Gu bake Baibiri nangia Ruka napepai furani tipa gu dunguratise Pauro amangihe na abaakumba rogo gu dungurati naadu Efesa yo. Pauro aya fuyo: “Oni bánda tironi na agu akandoro Ziazia Toro asa roni ni ababandara, oni rígi ga Mbori kanisa nga gu ko angbe ni kure [Wiriko].” (Amo. 20:17, 28) I arẽ kada ni abaakumba mbiko gayo mangaapai aima ringbisatihe na agu apai Ziazia Kekeapai aidaha. (1 Tim. 3:1-7) Ga Pauro badiasunge nangia Tito, i afu pagbia fuko ko sia abaakumba rogo gu dungurati naadu Kurete yo.​—Tito 1:5.

⁹ Wa dungu vovo adungurati atona kaa kura, amokedi na abaakumba Yerusarema yo nangia gu bambata aboro naangerafuo agu adungurati nga ga aKristano natona ka kura rogo dungu aringara rogo bambata sa kama agarã. I aamangasunge wa riigbu bipasunge.

¹⁰ Ho gu mokedi nangia Pauro ake waraga ni fu gu dungurati naadu Efesa yo, ko asakipai fuyo nga ka i amangapai ringbisihe na ga Mbori ziazia toro, gu dungurati nga ga aKristano nika du na kodatise mbiko mangapai kuti ga Yesu Kristo ngbembatayo. Gu mokedi re azungodi aKristano i du na umbasitise na ki banda “gu du sa nga ga Toro” ni koditiyo rogo pa zereda na agu aboro du rogo dungurati. (Ef. 4:1-6) Fuani, ko adipai rogo Atambuahe 68:18 na ki mangisunge na ni tipa gu ga Yekova gamunihe nga abaakumba nga i ningerefuo agu azingo nga ga dungurati wakina amokedi, anebi, abatungusi wene pangbanga, ababanda akandoro, na ni abayugupai. Si adu nga ngbatunga agu akumba du nga agamahe be Yekova re, i nika sonosa dungurati si da nyanyaki rogo toro yo na si ki fu ngbarago fu Mbori.​—Ef. 4:7-16.

ADUNGURATI AREME NAPEKAFUO GA AMOKEDI KPIAPAI

¹¹ Areme, agu ambakadapai du rogo agu adungurati dunduko nga ga aDezire Yekova si napeka kina fuo gu kpiapai re. Agu adunguratise dunduko du ro rogo zegino kina sa, na i duaha rii agu aKristano i nambediyo ni ziazia toro. (Zek. 8:23) Yesu Kristo du nasa gipa re si mangi. Ko ima kakuti gako mbedimbedi abawiriki “ti arago dũ, ki da ti digida zegino” kina wai ko akidohe. Agu aboro naye ku rogo dungurati nadia wene pangbanga kugume, ki kpara gayo raka nitiyo fu Yekova, na ki zi bapatiza ki da ni ga Yesu abawiriki. (Mt. 28:19, 20; Mk. 1:14; Amo. 2:41) I ima idaha nga Yesu Kristo nga “wene babanda akandoro,” ko nangerakurii gu rimbasa avusende sa re, ami nakoda mbedimbedi aKristano gbiati “kura akandoro.” (Yo. 10:14, 16; Ef. 1:22, 23) Gu ‘rimbasa du sa’ re nabanda kodatise ni ida yo na gupai nga Kristo du nga barii gu rimbasa re na i na ra ni goyo fu agu aboro ko amangasunge na yo nga, “[ruru] kangara moyambu tie du na tatamana” Kristo asia yo. Ani kidongo akido kindi kuti gu kangara moyambu Kristo namoi ni tigi gaani regbo re.​—Mt. 24:45.

NDU MANGASUNGE NA AGU ARIMO I AKEKAHA KUTI ANDIKO

¹² Tipa kaa fu gu riahe nga ga toro ti kina regbo ho na tipa ka tungusa gu wene pangbanga nga ga Kindo mbata fu digido rago da, i ima sigira agu arimo basunge du kuti andiko. Agi arimo re, dungu andiko nga ga aringara ima inopai tipaha, na si atagbaganga tihe te. Agi arimo re nasa gupai nga sunge tungusapai nimangi rogo zegino dunduko.

WAI DU APAI NI MBAKADIMBAKADIHE ROGO BE-BASUNGE

¹³ Ho i asigira be-basunge ni rogo ringara, i nasia gu Rondo Nga ga Be-Basunge nibasa du na abaakumba biata watadu susi gure tipa i ningerefuo gu sunge namanga rogo ringara watadu agu aringara du rogo gu dagbarago nga ga gayo be-basunge. Boro sa dagbayo yo nadu ni Barii gu Rondo Nga ga Be-basunge.

¹⁴ Agu adungurati du tiibe be-basunge, si ni mbakadimbakadihe ku rogo badona adungurati. Gu badona adungurati re rengbe kadu na dungu adungurati watadu ni betehe ringbisihe kuti gu ba duhe rogoho, agu afugo si agumbaha na bange agu adungurati du rogo gu dagbarago du kutiibe gu be-basunge re. I nasia babi rimbasa ko niundo agu adungurati nibasasa du rogo gu badona adungurati re. Be-basunge nafu arugapai fu babi rimbasa nibipa wai rengbe ko ka manga agu asunge i nafuhe fuko.

¹⁵ Adungurati nadia agu ambakadapai re kugume mbiko si nafu undo fu agu aboro dunduko du rogoho. Agu aboro du rogo dungurati nadia gu mbakadapai kugume nga abaakumba ni ngerafuo apai rogo be-basunge, ababi rimbasa, na aguyo du rogo adungurati. I nangera ku be ruru kangara moyambu a tipa gu riahe nga ga toro ti regbo ho. Ruru kangara moyambu tigayo nara ni goyo fu gu pagbia nga ga Kristo, gu bangua arengo nga ga Baibiri, gbiati gu ngbembatayo nga ga ziazia toro. Ka ani amangapai dunduko rogo kodatise, ani rengbe ka gbia kina gu bangisa ngbarago agu aKristano naadu rogo bambata sa kama agarã agbiaha: “Were akanisa ki nyaki rogo idapase yo, ki nge ange na uru.”​—Amo. 16:5.