Ya Mo Rungo Atingidi Nyasi?

GUPAI BAIBIRI APEHE

“Mbori . . . awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.”​—Yugoti 21:3, 4, Ziazia Kekeapai, 1978.

WAI RENGBE GUPAI RE KA UNDO RO

Si nayugo gupai nga anga Mbori du naye na gu fudifudiapai namanga rani te.​—Yakoba 1:13.

Ino gupai nga Mbori naberã parani aberã ho ani arungo ni nafu wasa afu furani.​—Zekaraya 2:8.

Si nafu gu maabangirise nga arungo dunduko nika nyasa anyasa.​—Atambuahe 37:9-11.

YA MO NDUPAI HO NZUNZU ANI IDI KUTI GUPAI BAIBIRI APEHE?

Ii, ani bingo nduapai ue:

• Mbori ima soga rungo na gu gbegberẽ apai aboro amanga akurayo nani. Mo makianga wai Yekova Mbori adu ho aboro aamanga gako aboro ni gbegberẽe bakurukusayo. Baibiri nape gupai nga ko aduna bakere gberãrago ho aboro ‘aamanga yó ni kini rungosiyo.’​—Abasapungbanga 2:18.

  Rago angbanga ti Mbori na agu aboro namanga akurayo gbegberẽe te. Nikpiapai, Baibiri nape gupai nga “gu be nauka kure boro wenesa” nga kere gbegberẽ he bangiriko.​—Asanza 6:16, 17.

• Mbori nangerafuo rani wadu ani nibasasa dunduko. Anga kina boro inipa ‘gani gberãngbi na gani rungo’ nitini sa te, ono Yekova ima inoho a!​—2 Pekapai 6:29, 30.

  Yekova nika digiso agu arungo nga ga aboro dunduko nibasasa vurube gako Kindo barambeda. (Matayo 6:9, 10) Wa du rago re tie, ko nafu wasa afu fu agu aboro nagbata ko nzunzu.​—Amokedi 17:27; 2 AKorindo 1:3, 4.