I Mbakadiyo ka Manga sunge fu gu ‘Mbori Nga ga Zereda Ko’

1, 2. Gini ariapai Zion’s Watch Tower amangihe rogo Ngi 1895, na ga awirina mangapai angia gine?

HO GU zaaza Bawiriki Ziazia Kekeapai nangia John Bohnet agbia gu gako magazini ni nangia Zion’s Watch Tower rogo Ngi 1895, rago aima ngbatiko na gupai ko abihe. Gu magazini re adu na vovo kikindigi kekeapai ti kpotoho ni bibirihe gbiati kpia bambu ru rii sungburosungburo ime we akii rihe yo, na gaha we kini hasi rago ariyo rogo bitimo. Gu tingidapai naadu rogo gu magazini re tipa gu vovo kpotoho re aya, “Gaani Vovo Roko.”

² Rago angba ti Wiriba Bohnet ko ki kedi waraga fu Wiriba Russell. Ko aya, “Mi na ngbarago ka bi wai kpoto SINZIRI angera ni bawenehe. Si nangera ni bawenehe nzunzu.” Gu kura ruru Bawiriki Ziazia Kekeapai nangia John Brown, ake waraga tipa kpotoho ki ya: “Si ima ngba. Nangba wai mburu gu bambu sinziri re naru ni nyanyakihe, ime ki vura kaa sungburo kuti ni vurũ.” Gu kpoto magazini re nangia gu bambata ariapai awirinarani abihe rogo gu garã re, ono yangara ariapai nangiaha te. Rogo Ngbangba i abi gu kura bakere ariapai berewe. Ngbayo azere berewe ka bi gupai nga si na kina sungburosungburo ime ti ni.

3, 4. Ginipai gu Ngbaõbambu Sinziri nangia ga Ngbangba 15, 1895 aruguhe, na gini bakere ariapai si atingidi paha?

³ Gu Ngbaõbambu Sinziri nangia ga Ngbangba 15, 1895, adu na kekeapai rogoho nakusi gu kurapai berewe: Gu sungburosungburo ime nga ga akpakarapai aagbarasapa gu zereda nga ga riigbu watadu gu nga ga Abawiriki Ziazia Kekeapai. Awirina anaasovura aso dagbatiyo dedede tipa gu boro nikaa ngbembatayo rogo dungurati. Tipa ka undo awirina i bi gupai si aaidaha tipa ka ruga gu sino nga ga kparakaro naadu dagbayo re, kekeapai aringbisi riigbu kuti bakurungba. Si ape gupai nga agu aboro nangbembatayo rogo apai yo ambakadanga gu kurungba nga riigbu tipa gu wege nga ga sungburosungburo ime te. Ginipai si aaida i mangihe?

⁴ Gu kekeapai re aya, wene bakama kurungba namaa berãni ka ino singia agu ahe nabanda unga aboro kina rogo kurungba na abagbehe nambakadaha wenengai tipa ka sovura na gu kere sungburosungburo ime rengbe ka ye. Teketeke a, si aaida agu aboro nangbembatayo rogo riigbu ini gupai nga i ima mbakada adungurati dunduko tipa si rẽ ka sovura kuti agu akpakarapai narengbe ka da wa sungburosungburo ime. Tipa ka manga gipai re, gu kekeapai re apepa banaru ariapai. Si aya tona kina ti gu regbo re nibasa, “rogo adungurati dunduko, si naida i sia abaakumba” tipa “‘i ni ngerekurii’ akandoro.”—Amo. 20:28.

5. (a) Tipagine gu bambata mbakadapai nangia ga abaakumba angia gu wene diandue naada ti regboho? (b) Gini asanahe ani ka wisigopai tipaha?

⁵ Gu bambata mbakadapai naadu tipa abaakumba re asigira gu wene diandue naayugo wai si aida apai nimangi rogo adungurati. Si aundo awirinarani i ini wai ka sovura kuti agu akpakarapai gu Bambata Vura Nga ga Zegino aye na ni. Rogo agu agarã nangbefuo gure, gu kura sonakumbatayo rogo riigbu aundo ga Mbori aboro i ini wai rengbe yo ka rẽ ka mangasunge fu Yekova. Gini sangbanebi nga ga Baibiri naafura kumbatayo tipa gipai re? Gini aˈariapai bi mo ho nga gu riigbu namangihe? Wai du mo nagbia undo ti ni?

‘Mi Afú Zereda ni Gaoni Abarukuriapai’

6, 7. (a) Ginipai Yesaya 60:17 ayugoho? (b) Gu fugo nga “abarukuriapai” na “abarugupasunge” nayugo gine?

⁶ A wa ani abihe rogo Kapita 9, Yesaya aima ya Yekova nika fu maku fu gako aboro na ki kiisi namba yo. (Yes. 60:22) Ono tie, Yekova akidohe tipa ka mangapai ni bakerehe. Rogo kina gu bangisa sangbanebi re, ko aya: “Mi ayé na dahabu ku ba sirigi, mi ki ye na feda ku ba kpano; na ku ba ngua, mi ki ye na sirigi, ku ba ambia mi ki ye na marã. Mi afú zereda fu gaoni abarukuriapai a, na rurupai fu gaoni abarugupasunge.” (Yes. 60:17) Ginipai gu sangbanebi re aida ka pehe? Wai du si abi rani areme?

⁷ Ga Yesaya sangbanebi ape gupai nga ahe kinaho nikaa diaba akuraha. Oni kparia gupai nga pa dia he ba gu kuraha nga ariapai, angianga wenehe kuba gbegberẽhe ya, ono gu ngba kisusi kuba wenehe. Pa dia dahabu ba sirigi nayugo sonakumbatayo, na kina gu bangisapai re du tipa gu kura ahe i nafura tipaha. Nibi gi kpiapai re, Yekova aaida ka pe gupai nga, agu apai du tipa gako aboro nikaa ngba yeeye. Gini sonakumbatayo gi sangbanebi re aafura tipaha? Pa fura Yekova tipa “abarukuriapai” na “abarugupasunge,” gure nga ko aape gupai nga sonakumbatayo nikaa manga yeeye nibipa wai i nikaa ngerafuo gako aboro gbiati gako riigbu.

8. (a) Da du nasa agu asonakumbatayo du rogo ga Yesaya sangbanebi yo si mangi? (b) Gini undo ani agbiaha ti agu asonakumbatayo re? (Oni bi gu sanduki a nga “Ko Adi Rugute Kugume na Umbasitise.”)

⁸ Da nasa gupai nga agi ariapai re tona ka manga? Yekova aya: ‘Mi ayé na dahabu, . . . mi ki ye na feda . . . na . . . Mi afú zereda.’ Nirengo, agu ariapai nga ga sonakumbatayo rogo riigbu ayengo be ga boro ome te, ono be Yekova nitiko. Naatona ho Yesu ada ni ni Bakindo, Yekova ima mangasunge na Wiriko tipa ka ye na agi aˈariapai re. Gini undo gbia ani he ti agi aˈariapai re? Gu bangisa veresi re nape gupai nga gu sonakumbatayo re nika ye na “zereda” gbiati “rurupai.” Ka ani di ga Yekova ngbembatayo kugume na ki mangi ariapai, zereda nika kpatafurã dagbarani na nyemu rurupai nika fõngbaduraniyo ani mangisunge fu Yekova, gu mokedi nangia Pauro aya tipa ko wẽ ko nga “Mbori zereda.”—Frp. 4:9.

9. Ginihe nga mburu gu rugapai gbiati kodatise du rogo dungurati, na tipagine?

⁹ Nibipa Yekova, Pauro akepai nga: ‘Mbori ni Mbori ruguzuruguzu apai te ono zereda.’ (1 Kor. 14:33) Oni kparia gupai nga Pauro aaringbisanga ruguzuruguzupai na rugapai te ono ko aringbisihe kuti zereda. Tipagine? Oni makianga gipai re: Mangapai ni ruruhe ti genehe arengbanga ka ye na zereda nitihe te. Ni kpiapai, asekere rengbe ka ru ti genetenge ni ruru yo ka ndu kuti ngba vura yo, ono gi gayo mangapai ni ruruhe ti genehe re naye na kina vura angianga zereda ya. Sidu, wangia ani aKristano, si naida ani moi gu memepai kurirani yo nga: Agu ariigbu dunduko adu nga mburuhe rii zereda ya, si ati ati. Kuba gure, gu zereda nga ga Mbori naye na nyenye rugapai. Sidu, nairiwo gu ngbarago du ani na ni nga gu boro nakpuruwa gaani riigbu na kini ngbembatayo fuhe nga gu “Mbori nga ga zereda ko”! (Rom. 15:33) Gu zereda nga ga Mbori nga mburu rugaapai gbiati gu kodatise ani agbia ngbarago behe na kini bihe na nyanyakipaha rogo gaani adungurati rogo zegino dunduko.—Tam. 29:11.

10. (a) Gini asonakumbatayo namangi rogo gaani riigbu rogo agu agarã nasusi kusayo? (Oni bi gu sanduki nga “Wai Sonakumbatayo Amangi Rogo Ngbembatayo.”) (b) Gini asanahe ani nika wisigopai tipaha awere?

¹⁰ Gu sanduki nga “Wai Sonakumbatayo Amangi Rogo Ngbembatayo” nafugöpai tipa gu undo na gu ariapai naaye na agu arugapai namangi rogo gaani riigbu bakuru kusayo ti tonatona apai. Ono gini ariapai Yekova namangihe barambeda vurube gaani Bakindo tipa ‘sirigi da ni dahabu’? Rogo gini gene agu aˈariapai nga ga ngbembatayo re naye na zereda gbiati kodatise rogo adungurati rogo zegino dunduko? Wai du si aundo ro tipa mo irisi gu “Mbori nga ga zereda ko”?

Gu Gene Kristo Angbembatayo Rogoho fu Dungurati

11. (a) Wisigo Ziazia Kekeapai aye na gini ariapai rogo giarogopai yo? (b) Gini diaberã agu awirina du rogo riigbu bipasunge adiberã ka mangaha?

¹¹ Naatona rogo 1964 kuti 1971, riigbu bipasunge amangi mbakadapai tipa wisigo Ziazia Kekeapai sirisiri, agu apai i aawisigo ho angia, wai apai anaamanga rogo gu dungurati nangia ga aKristano rogo bambata sa kama agarã.a Nibipa wai apai aamanga rogo riigbu, i abihe nga gu rondo nga ga abaakumba nanaangerakurii apai rogo bambata sa kama agarã kuba gupai nga bangisa bakumba sa nimangihe. (Oni gedi AFiripoio 1:1; 1 Timoteo 4:14.) Ho awirina agirogo gupai re ni wenengai, riigbu bipasunge abihe nga gayo Bakindo nga Yesu nangbembatayo fuyo tipa i mangi ariapai rogo gu gene ga Mbori aboro amangaapai rogo riigbu ngbaha, na agu awirina naadu rogo riigbu bipasunge adiberã tipa ka mangapai kuti ga Bakindo rugapai. I amangi ariapai nibasa ka mbakadapai tipa riigbu nimangipai ringbisihe kuti gu mbakadapai nga ga abaakumba du rogo Ziazia Kekeapai yo. Gini bete aˈariapai namangi rogo agu agarã naatona ti 1970?

12. (a) Gini ariapai namangi dagba agu awirina naadu rogo riigbu Bipasunge? (b) Oni sakingo pa wai du Riigbu Bipasunge ni mbakadimbakadiyo. (Oni bi gu sanduki nga “Wai Riigbu Bipasunge Angerafuo Agu Azingo Nga ga Kindo,” kpewaraga 130.)

¹² Bambata ariapai atona na kina riigbu bipasunge nitihe. Mbata kusayo, awirina adu saba nga mbedimbedi aKristano naadu rogo gu rondo nga ga abarugupasunge (Watch Tower Bible and Tract Society of Pennsylvania). Ono tie, rogo 1971, riigbu bipasunge aguari ti aboro 7 kuti 11 na i aadunga berewe dagba agu aboro naadu rogo gu rondo nga ga abarugupasunge te. Agi awirina re aabi tiyo nga i kina sa na i ki tona ka tanga na sunge basungu-rii-kiti dagbatiyo rogo agarã ni basasa ringbisihe kuti arimo yo.

13. (a) Gini mbakadapai naima duho tipa agarã 40? (b) Ginipai Riigbu Bipasunge amangihe rogo 1972?

¹³ Gu ariapai nangbefuo gure adu na maapai kurii adungurati dunduko. Rogo gini gene? Naatona rogo 1932 kuti 1972, wirina sa nanaangerakurii apai rogo dungurati. Da ku rogo 1936, i anaayamba gu wirina re nga barugupasunge. Fuo gupai re ngbutuko, i aˈaria gu rimo re nga gu moyambu nga ga dungurati, na niyangaraha kuti gu babiapai nga ga dungurati. Agu awirina i asia yo re anaangera kakaka fuo gu zingo nga ga akandoro rogo toro yo. Gu babiapai nga ga dungurati anaamanga diaberã fu dungurati zanga ni sana gu kura abaakumba rogo dungurati. Ono tie, rogo gu garã nangia 1972, Riigbu Bipasunge ambakadi gene tipa bakere ariapai. Gu ariapai re angia gine?

14. (a) Na gini vovo mbakadapai natona rogo Tanvuo 1, 1972? (b) Wai du barii gu rondo nga ga abaakumba amangasunge na gu rugute du rogo AFiripoio 2:3?

¹⁴ Kuba gupai nga adungurati du na awirina ni basasa namangasunge ni agu ababiapai nga ga dungurati, si ada nga i sia gu kura awirina nyaki rogo toro yo ni abaakumba ringbisihe kuti Ziazia Kekeapai. Si adu nga i dunduko nika du rogo gu rondo nga ga abaakumba kaa ngerafuo dungurati. Gi vovo mbakadapai nga ga abaakumba re atona mangasunge rogo Tanvuo 1, 1972. Areme, gu barii rondo nga ga abaakumba abingo tiní nga ni kiipa ni ti akurani te, ono ni nabi tiní wa “gu ni du ni toni ni.” (Rk. 9:48) Nairiwo wai ngba du na agi awirina du na umbasitise re rogo zegino dunduko!—Frp. 2:3.

15. (a) Gu mbakadapai nga adungurati du na gu rondo nga ga abaakumba ye na gini wene sangbanaha? (b) Ginihe nayugo na ni nga gaani Bakindo namangapai na tatamana?

¹⁵ Gu mbakadapai nga, gu rondo nga ga abaakumba nikparaka agu asunge nga ga dungurati dagbatiyo ima ye na bakere ariapai. Oni makianga pa agu aundo biata si nafuhe: Bambataha nga, gu mbakadapai re naundo abaakumba dunduko i ini gupai nga Yesu du nga Rii dungurati ka i vura du na kina gini sunge beyo vurũ. (Ef. 5:23) Uehe nga, a wa Asanza 11:14 agumbaha: ‘Mbiko rimbasa aboro rondo, yo du pa zereda ni’ watadu diabese. Ho abaakumba asungo ni sa ka saka agu apai nafuda pa du dungurati wenengai rogo toro yo na kini makiapa agu aberãpai nga ga akurayo, si naundo yo i dakuti gu diaberã du na ngbanya na gu bangua arengo nga ga Baibiri. (Snz. 27:17) Yekova nafu maku kurii ngbatunga agu adiaberã re, na si naye na diabese. Biataha nga, padu dungu agu awirina niima nyaka rogo toro yo ni abaakumba, si naundo riigbu tipa i asadi ka mangapai kuti gu bakere zingo nga ga abaakumba tipa ngerafuo adungurati. (Yes. 60:3-5) Oni berẽnga kurii gipai re, bange adungurati rogo zegino dunduko nakio kina kumbatayo, rogo 1971 adungurati adu nga 27,000 na rogo 2013 bangehe aima susa 113,000! Si tie ziazia nga, mbiko gu tatamana nga ga gaani Bakindo, ko ima fu ababanda akandoro fu apefuoko ti wene regbo.—Mika 5:5.

‘Oni Dú ni Kpiahe fu Rimbasa Akandoro’

16. (a) Gini tindiro du be abaakumba? (b) Gini bipai Abawiriki Ziazia Kekeapai adu na ni tipa ga Yesu rugute nga mo ‘banda gimi akandoro’?

¹⁶ Ti tonatona gu regbo nangia ga Abawiriki Ziazia Kekeapai, abaakumba aima inoho nga i na gu tindiro beyo nga ka undo akurayo aidipase i nye ni ga Mbori amoyambu. (Oni gedi AGaratio 6:10.) Rogo 1908, kekeapai akuru rogo Ngbaõbambu Sinziri naafura tipa ga Yesu rugute nga: “Mo nibánda gimi akandoro.” (Yo. 21:15-17) Gu kekeapai re aya fu abaakumba wẽ: “Si ni nyanyakipa pai nga si naida ga Bairarani rugute tipa gako akandoro du ni nyanyakipa pai ngbaduraniyo, na ani nabihe ni bakere momu ka riga apefuo Gbia na kini ngerefuo yo.” Rogo 1925, Ngbaõbambu Sinziri anyakasipa nyakapa mangasunge ni bakumba fu abaakumba nga: “Gu kanisa nga ga Mbori nga gako, . . . na ko nika sana agu aboro asana dunduko di gu momu nga ga ngerafuo awirinayo.”

17. Wai du i naundo abaakumba tipa i du ni wene ababanda akandoro?

¹⁷ Wai du ga Yekova riigbu naundo abaakumba tipa i aria gayo birĩ nga ga ngerafuo akandoro ti ‘kpano ku rogo feda’? Ni fuko rabahe fuyo. Rogo 1959, i amangi gu bambata Sukuru Nga ga Sunge Kindo fu abaakumba. Wirikapai sa asakipai tipa gu riipa nga “Oni Ngerefuo yo Dawedawe.” I angarasi agu awirina re “i mangi mbakadapai tipa kaa ndu kaa bi abatungusipai kpuyo yo.” Gu wirikapai re ayugu agene ni bakiakia rengbe abaakumba ka nyakasa akandoro ngbaha ho i andu ni ka biyo. Rogo 1966, i arimisi gu kura vovopai ku rogo Gu Sukuru Nga ga Sunge Kindo. Gu vovo riipai re angia “Ndu Gupai Nyaki Sunge Banda Avusende Ti Ni.” Gini memepai gu wirikapai re adu tipaha? Si adu nga agu aboro nangbembatayo “mangisunge ngerafuo ga Mbori akandoro, na ka bangiriyo gonga ti ngerafuo gayo aborokporo gbiati sunge tungusapai ya.” Rogo agu agarã susi re, i ima manga dungu asukuru fu abaakumba. Gini wenepai ye ni sangbana gu rabahe ga Yekova riigbu afuhe ti aregbo dunduko re? Areme, ga Yekova riigbu na akutu awirina naima rẽ ka mangasunge ni ababanda akandoro.

18. (a) Gini bakere sunge i nafuhe fu abaakumba? (b) Tipagine Yekova na Yesu nakpinyemu agu abaakumba ti ni namangasunge nyanyaki tini?

¹⁸ Yekova du sia agu abaakumba nga aKristano vurube gu Bakindo nga Yesu i nimangi nyanyakipa asunge rogo dungurati. Gini asunge du ngaha? I ngbembatayo fu ga Mbori aboro ti gi kere regbo re. (Ef. 4:11, 12; 2 Tim. 3:1) Yekova na Yesu ima kpinyemu agu abaakumba namangasunge nyanyaki mbiko agi awirina re nairisa gu rugute nga ga Baibiri nga: “Oni mbú ti ga Mbori rimbasa akandoro du dagba roni, . . . ni zizi roni kuti ni te . . . , ni nyemuhe . . . , oni dú ni kpiahe fu rimbasa akandoro.” (1 Pet. 5:2, 3) Ani wisigingo agene ue du agu ababanda akandoro nga aKristano ngbaha ni kpiapai fu akandoro na wai i afubee ni bakerehe sa gu zereda gbiati ngbarago du rogo dungurati.

Gu Gene Abaakumba Abanda ga Mbori Avusende Ngbaha

19. Gini bipai ani nidu na ni tipa agu abaakumba nandu na ani gene tungusapai yo?

¹⁹ Bambatapai nga, abaakumba namangasunge na agu aboro du rogo dungurati. Gu bake Kitabu Wene Pangbanga nangia Ruka aya tipa Yesu wẽ: ‘Ko amerẽ rogo abaakporo na akporo dunduko nitungusi pai ki niyugu gu wene pangbanga nga ga ga Mbori ngbi, agu aboro nanidu bawe na ue i ki du na ko.’ (Rk. 8:1) Kina wai Yesu anaatungusapai na gako amokedi, agu abaakumba nga wene kpiapai natungusapai sa na awirinayo. I bi gupai nga ho i amangaha ni wo, i nafubee sa gu du sa nga ga dungurati. Agu aboro du rogo dungurati nabi agu abaakumba re wai? Wirinarani nga Jeannine garãri naima susa 80 aya: “Tungusapai sa na bakumba nafu momu fere mi fura na ni na mi ini ni wenengai.” Wirinarani nga Steven garãko naima susa 30 aya: “Ho bakumba atungusapai ni na mi kporo na kporo, mi nabihe nga ni naida ka undo re. Gbia gu ngbatunga undo re nafu bakere ngbarago fere.”

20, 21. Wai du rengbe abaakumba ka wirika gu babanda akandoro du pako rogo ga Yesu sanza yo? Oni funga kpiapai. (Oni bi gu sanduki a nga “Ndu Kabi Awirina Na Aposo Dũ.”)

²⁰ Uepai nga, ga Yekova riigbu ima raba abaakumba tipa i berẽpa agu aboro naima mbu dungurati. (Eb. 12:12) Tipagine si aida abaakumba undo agu aboro naima rungbura rogo toro yo ti ni, na wai du rengbe yo ka mangaha? Ga Yesu sanza tipa babanda akandoro gbiati ingiingi kandoro nafu karagapai sa gupai re. (Oni gedi Ruka 15:4-7.) Ho gu babanda akandoro re abi gupai ni nga kandoro nakpa, ko agbata gu kandoro re si ki du wa u nangia gu yangara kandoro naadu beko. Wai du agu abaakumba nga aKristano apekafuo gu kpiapai nga ga gu babanda akandoro re? Kina wai gu babanda akandoro re abi gu kandoro naingi na kikiipa ru, kinawo a abaakumba abi agu aboro naima inga ti dungurati na nyanyakipa yo. I nabi gu boro du ni rurungbura ni rogo toro yo wa ingiingi akandoro, angianga wa gu boro nambusa yo ya. Kurigure, kina wai babanda kandoro nidiberã ‘ka ndu ka gbata gu ru ingi,’ abaakumba nadia regbo kinawo a kaa gbata rurungbura aboro na kini undo yo.

²¹ Ginipai gu babanda kandoro du rogo gu sanza re amangaha ho ni agbia gu kandoro re ni? Ni natumba ru ku beni, “ki wagi ru pagoni” na ki ndu na u ku dagba akurai. Wakina gure a, gu wene afugo ngarasaro nga ga bakumba ima rengba ka undo gu boro rungbura rogo toro yo ni karaga tiní ku rogo dungurati. Gere nga gupai namangi tipa wirinarani nga Victor naraka vuru Afirika naambu kodatiko na dungurati. Ko aya: “Vuru agu agarã muambe mi aadunga na dungurati ya, abaakumba anaasada dedede tipa ka undo re.” Ginihe nazi ngbaduko yo nzunzu? Ko aya: “Rogo uru sa, John, nga gu bakumba ani amangi gu Sukuru Nga ga Abazakigene na ko, adi regbo ka ye ka bire na ki yugu agu asura (photo) fere ani adihe na ko ti regbo sukuru. Si asa re mi tingidipa dungu wene apai na mi ki tona ka kpinyemu gu ngbarago mi anaagbiaha ti gu regbo mi anaamangasunge fu Yekova.” Ngbutuko fuo John ye ka bi ko, Victor akaragatiko ku rogo dungurati. Areme, ko namangasunge berewe ni bazakigene. Nirengo, agu aKristano nga abaakumba nasa gupai nga ani du na ngbarago.—2 Kor. 1:24.b

Ngerafuo Dungurati Ngba Wene Gene Nanyakasa gu Kodatise Nga ga ga Mbori Aboro

22. Wai du rurupai gbiati zereda anyakasa gu kodatise nga ga aKristano rogo dungurati? (Oni bi gu sanduki a nga “Kina Ngbarani Nazere.”)

²² A wa ani afura tipaha mbata kusayo, Yekova aima fura kumbatayo nga zereda gbiati rurupai nika maapai dagba ga Mbori aboro. (Yes. 60:17) Agi asino du ue re nanyakasa gu kodatise nga ga adungurati. Rogo gini agene? Nibipa rurupai, ‘Mbori nga kina Yekova sa.’ (Pa Rug. 6:4) Gako arugute nga ga rurupai rogo adungurati dunduko rogo zegino kina sa. Nirengo, gako arugute tipa rurupai na gbegberẽhe kina sa dagba “ga Mbori aboro kanisa dunduko.” (1 Kor. 14:33) Sidu, dungurati rengbe kadu na diabese kina gu ka si amangapai ringbisihe kuti ga Mbori arugute. Nibipa zereda, gaani Bakindo naida ani du na zereda rogo dungurati na ni “aboro azarõ” a. (Mt. 5:9) Sidu tie, ‘ani pekefuo agu apai namanga sa zereda.’ Si naida ani mangi ome ka nyasariipa agu azanga giatise rengbe ka kura dagbarani. (Rom. 14:19) Rogo gu gene re, ani nafubee sa zereda gbiati kodatise rogo gaani dungurati.—Yes. 60:18.

23. Wangia ani ga Yekova amoyambu, ginipai ani agbia ngbarago behe areme?

²³ Rogo Ngbangba 1895, ti gu regbo Ngbaõbambu Sinziri atakipande pa gu bambata mbakadapai nangia ga abaakumba, agu awirina naangbembatayo aima yugo gayo nyemupai a. Gayo nyemupai angia gine? Gayo nyemupai gbiati kparakpee angia gi vovo mbakadapai riigbu amangihe re undo ga Mbori aboro i “mangipai ni ipo tipa kadu ni kodikodi yo rogo idapase yo.” Ho ani angerani kusayo, si nasarani ani du na bakere tambuahe nga gu kpuruwahe Yekova atona ka mangaha yeeye vurube gaani Bakindo aima ye na kodatise rogo gaani irisombori yo. (Tam. 99:4) Ni sangbanaha, ga Mbori aboro rogo zegino dunduko nangi mbiko ‘ani nata rogo Toro sa,’ na ‘ani nandu rogo fuõ rani sa,’ na kini irisi “mbori nga ga zereda” ko “kina ku bani sa.”—2 Kor. 12:18; Oni gedi Zefania 3:9.