Ababanda Akandoro, Oni Wiriki Bakere Babanda Akandoro
“Kristo ahi pai a tigako tipa roni, ki he kpia pai fu roni, oni peke fuo ko.5”—1 PET. 2:21.
1, 2. (a) Ginipai rengbe ka manga ka si du nga i nangerafuo akandoro wenengai? (b) Tipagine badungu aboro adu ti ni ti rago Yesu wa agu akandoro adunga babandara tira ya?
AKANDORO nazugo ho babandara angera ni fuo ra wenengai. Waraga sa nafura tipa zoga akandoro aya, “gu boro nandu na akandoro kuba riga ra yo ka ni amaanga berãni fuo ra ya, gani akandoro nika gbia tira na dungu akaza na fuo bete agarã ka ami adunga berewe ni wene ra ya.” Ono tie, ho boro angera ni fuo gani akandoro wenengai, ami nadu wenengai na kini zugo.
2 Gu gene abaakumba angera ngbaha fuo ga Mbori akandoro ko nafura fuyo ni basasa rengbe kadu na bakere ome kurii padu ami dunduko wenengai rogo toro yo rogo dungurati. Oni tingidi gupai nga Yesu adu na nunga bakere rimbasa mbiko “i arungo, ki nigbandaka, wa kina agu akandoro adu nga na babandara ti ra ya.” (Mt. 9:36) Tipagine i adu ti ni rogo ngbatunga rungo wa gure? Bambiko agu aboro naadu na gu tindiro beyo nga kaa yugopai fuyo tipa ga Mbori aNdiko angia gbegberẽ aboro, na ni airabiriki. Kuba gupai nga ga aYisaraere abarumbatayo rogo pambori niundo na kini rigi gayo akandoro, i ‘anaavoda rõrõi tindiro’ ku pagora.—Mt. 23:4.
3. Ginipai si aida abaakumba moihe kuriyo yo wa i amanga gayo sunge nga ga ngerafuo akandoro rogo dungurati?
3 Agu aKristano nga ababanda kandoro du ti gi gaani regbo re, i na bakere tindiro beyo. Agu akandoro i angerafuo ra, ami nga ga Yekova na Yesu ra, nga gu boro nga “wene babanda akandoro.” (Yo. 10:11) I “angbe” agu akandoro re ni gu mosoro nga “kikipa kure” Yesu. (1 Kor. 6:20; 1 Pet. 1:18, 19) Ko aima kpinyemu akandoro ni bakerehe na ki fu ungako tipa ra. Si naida abaakumba naatingida gupai dedede nga i namangasunge kutiibe Mbori na Wiriko nga Yesu Kristo nga “bakere babanda akandoro.”—Eb. 13:20.
4. Ginipai gi kekeapai re nika wisigopai tipaha?
4 Wai tie si aida abaakumba nimangi fu akandoro? I nazungodi agu aboro du rogo dungurati ‘i gisangba gayo abaakumba’ du dagbayo. Ono tipa abaakumba tigayo, i nangarasa yó nga ka i ‘du nga ni abazogo aguyo i asia payo fuyo’ ya. (Eb. 13:17; oni gedi 1 Petero 5:2, 3.) Wai tie rengbe abaakumba ka ngbembatayo rogo apai zanga i du ni abazogo akandoro? Ka pehe ngba kura gene, wai rengbe abaakumba ka ngerafuo agu azingo nga ga akandoro zanga i susi gu ngbanda nga ga gayo pagbia Mbori afuhe fuyo?
“KI NITINDI RA TI NGBADUKO”
5. Agu afugo du rogo Yesaya 40:11 nayugo ginipai tipa Yekova?
5 Gu nebi nangia Yesaya afura tipa Yekova ki ya: “Ko aríga gako rimbasa akandoro wa babandara, ko adúngura wiri akandoro ku beko, ki nitindi ra ti ngbaduko, ki ningbe fu agu ra ku mbata yo ni zera nahaga awira.” (Yes. 40:11) Agi afugo re nayugo gupai nga Yekova nangera angerafuo agu azingo du agu aboro na ni du ni rurungbura yo rogo dungurati. Wene babanda akandoro nangerafuo agu azingo du gani akandoro na ni ni basasa na kidu barambeda tipa ka undo ra. Yekova ima ino agu azingo du agu aboro na ni du rogo dungurati na ko na nyemu ka fu gu undo fuyo i aidaha. A wa babanda akandoro naatinda fogo awira ho ami aida undo ni, Yekova nga “Ba inaapai” nika tinda rani ho du ani rogo aʹasada. Ko nika fu wasa furani ho du ani ni rogo bakere asada watadu ho du ani ni na zingo.—2 Kor. 1:3, 4.
6. Nidu bakumba ni babanda akandoro rogo toro yo, wai rengbe ní ka pekafuo ga Yekova kpiapai?
6 Nairiwo gu wenepai gu bakumba nga Kristano awirikaha be gu Barani du ngbangbaturũ yo! Wakina Yekova, si naida ní naangera angerafuo agu azingo nga ga akandoro. Ka bakumba ini gu kpakarapai akandoro agbia tira na ni na gupai si aida ní mangihe fu ra ni ipiipihe, si rengbe ka sa ní ní ngarasi ra na ki fu undo fu ra. (Snz. 27:23) Nirengo, si naida bakumba nifura besemene na akurani aidipase. Wa vura duhe nga si aidanga ní inipai tipa ga aboro futufutuapai dunduko te, si naida ní du na nyemu ka ino agu apai ní abihe na kini gihe rogo dungurati na kidu barambeda tipa ka ‘undo aguyo anyakanga ya.’—Amo. 20:35; 1 Tesa. 4:11.
7. (a) Ginipai aboro aamanga ga Mbori akandoro na ni ti rago Yezekere na Yeremaya? (b) Ginipai rengbe ani ka wirikaha ti wai Yekova asogo gbegberẽ ababanda akandoro?
7 Ani bingo gu bipai naadu ti agu ababanda akandoro Yekova asogoyo. Ti rago Yezekere na Yeremaya, Yekova asogo agu aboro si aaida i du ni agu aboro kaa ngerafuo gako akandoro ono ka i amanganga ha wenengai ya. Ho boro aadunga ni naangerafuo akandoro ya, para agberẽ na ami ki gbandaka. Kuba gupai nga agu ababanda akandoro re nirigi ra, i aarungosi ra na kini “rigi kina tiyo.” (Yeze. 34:7-10; Yere. 23:1) Ani rengbe ka ringbisa agu ababanda kandoro Mbori asogoyo re kuti agu abarumbatayo du rogo agu akanisa i aya si nga ga aKristano. Gipai re a nanyakasa ndu gupai si aida agu abaakumba nga aKristano ningerefuo ga Yekova akandoro wenengai ti ni rogo nyemuse yo.
“MI YUGU PAI FU RONI”
8. Waigu Yesu ayugu wene kpiapai tipa ka dia gu gbegberẽ bipai du boro na ni?
8 Mbiko gu ingapai du ti aboro, kura ga Mbori akandoro arengbanga ka giarogo gupai ko aida ami mangihe ni ipo te. Ami ima rengba ka zanga mangapai ringbisihe kuti agu arugute nga ga Ziazia Kekeapai, watadu ami rengbe ka mangapai ngba gu gene nayugo na ni nga ami ata nyakanga rogo toro yo te. Ginipai rengbe abaakumba ka mangaha? Si naida i wiriki gu hipai Yesu adu na ni fu gako abawiriki ho i anaaberã kina pa gu boro nika du ni bakumba ní ni rogo Kindo. Kuba gupai nga Yesu zingi kuti yó, ko anaayugopai fuyo na kini fu wene arugute fuyo tipa du na umbasitise. (Rk. 9:46-48; 22:24-27) Ko azundu nduyo tipa ka yugo umbasitise fuyo, na si nga gu sino si aida agu abaakumba nga aKristano du na ni.—Oni gedi Yoane 13:12-15; 1 Pet. 2:21.
9. Gini ngbatunga bipai Yesu aaida gako abawiriki du na ni?
9 Yesu adu na bipai kia tipa sunge abaakumba ti gu aYoane na Yakoba adu na ni. Agi amokedi ue re aida kadu na kikiipa ba beyo rogo Kindo. Ono Yesu arugu gi gayo bipai re ki ya: “Oni ini he ya agu yo nazoga aGendiria i namanga yo a wa i nakpi nyemu he; gayo abanyaki ki nyakasi yo. Ka si dú nga wo dagba roni yo ya. Ono gu ni nakpi nyemu ka du ni bahe dagba roni, ni adú ni gaoni moyambu.” (Mt. 20:25, 26) Si aida amokedi ne gu sino nga ga ‘zoga’ akurayo watadu ka ‘mangayo wa i akpinyemuhe.’
10. Waigu Yesu aida abaakumba mangi fu akandoro, na gini kpiapai Pauro amoihe fuyo?
10 Yesu naida abaakumba nimangi akandoro kina wai ko anaamanga ra. Si naida abaakumba duwa akanga fu awirinayo angianga ni abairayo ya. Ngbatunga gu bipai nga ga umbasitise re naadu ti Pauro mbiko ko aya fu agu abaakumba naadu Efesa yo wẽ: “Oni ini agu apai tigaoni mi anamanga dedede ho mi adu ni na oni, ti gu rago mi ada Asia yo mbata, wa mi anamanga pa Gbia ni ndikidi umbasitise.” Pauro aaida agu abaakumba re undo akurayo rogo umbasitise yo. Ko aya: “Mi aringbisi pai fu roni ni apai dunduko, ya oni ta manga sunge were niunda agu yo anyaka nga ya.” (Amo. 20:18, 19, 35) Pauro aayanga fu AKorindo wẽ ko nga gbia kurii gayo idapase te. Kuba gure, ko angia gu ga Mbori moyambu naadu na umbasitise na kini idi ka undo kura aboro tipa i mangisunge fu Mbori. (2 Kor. 1:24) Pauro amoi wene kpiapai nga ga umbasitise nga gu nyanyakipa pai si aida abaakumba mangihe areme.
‘ONI KA KUTI RENGOPAI’
11, 12. Wai rengbe bakumba ka undo kurani idipase tipa ní mangi diaberã?
11 Si naida bakumba rogo dungurati ‘kakuti gu rengopai du ku sangba gupai i ayugoho yo.’ (Tito 1:9) Ono ní mangihe wo “ni zera.” (Gara. 6:1) Kuba gupai nga ní asadi ka manga awirinani rogo dungurati i nimangipai ngba kura gene, wene babanda akandoro naasada ka rimisopai ku ngbadu awirinani yo. Ni kpiapai, bakumba rengbe ka undo wirina tipa ní mangi nyanyaki diaberã ni saka ko pai na ní riipa gu bangua arugute nga ga Ziazia Kekeapai. Ko rengbe ka sana ní a tipa ní wisigi kekeapai sa rogo gaani awaraga yo. Ko rengbe ka pe gupai funi nga ka ní mangipai ngba iraira gene, si rengbe ka gbarasa gani pagume na Yekova. Si naida bakumba nyakasi gupai funi nga si naida ní gbata undo be Yekova mbata fu ní mangi diaberã. (Snz. 3:5, 6) Fuo saka bakumba pai na wirinani idipase, ní rengbe ka mbu ní tipa ní mangi diaberã ni tiní.—Rom. 14:1-4.
12 Gu pagbia du abaakumba na ni, si naye rogo Ziazia Kekeapai yo. Sidu, si naida i mangisunge na Ziazia Kekeapai ngba wene gene na kini mangi gupai si apehe. Mangaha wo rengbe ka sa abaakumba i zanga mangasunge na gayo pagbia ngba iraira gene. Nirengo, i kutiibe aYekova na Yesu, na agu aboro du rogo dungurati ni basasa nika karagapai fu aYekova na Yesu tipa agu adiaberã i amangaha.—Gara. 6:5, 7, 8.
‘ONI DÚ NI KPIAPAI FU RIMBASA AKANDORO’
Abaakumba naundo gayo aborokporo i mbakaditiyo tipa tungusapai (Oni bi genewaraga 13)
13, 14. Gini ngbatunga abangiriba si aida bakumba du rogoho nga kpiapai fu akandoro?
13 Fuo Petero rugu abaakumba rogo dungurati nga ka ‘i dú nga ni abazogo aguyo i aasia payo fuyo ya,’ ko azungodi yo nga ‘i dú ni kpiapai fu rimbasa akandoro.’ (1 Pet. 5:3) Wai rengbe bakumba kadu ni kpiapai fu akandoro? Ani bingo apai ue si aidaha be gu boro naida ka “gbata sunge babipai.” Si naida ní du “ni bayee ni” na nidu ni gu boro “nazoga kpuni tigani wenengai.” Kangia aborokporo be bakumba, si naida ní ngerefuo yó ngba wene gene mbiko “ka kumba aina nga pa zoga kpuko ya, ko awira pa banda ga Mbori kanisa wai?” (1 Tim. 3:1, 2, 4, 5) Tipa kumba rẽ ka mangasunge ni babiapai, si naida nidu ni bayee ní na ni gu boro niima rugatini wenengai na agu arugute nga ga Ziazia Kekeapai na ki ini wai ka mangasunge na ni rogo gani raka yo. Si naida ní du na zera ho akpakarapai akura ni na ni gu boro naberã wenengai mbata fu ní mangi diaberã. Ho awirina abi agi asino re ni ti bakumba, si nasayo i nikido kutini.
14 Abaakumba namaa wene kpiapai a fu akurayo aKristano ho i angbe ni mbatayo rogo sunge tungusapai. Yesu amoi wene kpiapai fu ababiapai rogo gi bangiriba re. Pa tungusa gu wene pangbanga nga ga Kindo nangia nyanyakipa sunge fu Yesu auru kpotosende ane. Ko ayugu wai fu gako abawiriki si aida i mangi gi sunge re. (Mk. 1:38; Rk. 8:1) Nairiwo wai ngbaha ti gi gaani regbo re kaa bi abatungusipai i ni tungusipai sa na abaakumba wa i abi wai du abaakumba zaaza kutingba gi sunge batasa unga aboro re na kini wiriki gayo wene yugopai! Ka bakumba fu tiní kakaka kuti tungusa wene pangbanga apai ki vura du tiní vurũ, si nangarasa agu aboro du rogo dungurati i wiriki gani kpiapai. Si naida abaakumba moi wene kpiapai fu awirinayo rogo mbakada adunguratise na kini karagapai ba dunguratise yo na gu kura apai wa giriso Bambu Kindo.—Ef. 5:15, 16; oni gedi AEbere 13:7.
Abaakumba namaa wene kpiapai gene tungusapai yo (Oni bi genewaraga 14)
“ONI SÓNGODI AGU YO NARUNGBURA”
15. Gini ndupai abaakumba naandu kaa bi awirinayo kpuyo yo ti ni?
15 Wene babanda akandoro namangapai ni ipo ka undo gani kandoro ho u nahõ ni watadu ho u akaza ni. Teketeke a, si naida abaakumba mangipai ni ipo tipa ka undo gu boro nawoka rogo toro yo watadu guni naida na undo. Agu awirina niima gbinza gbiati aguyo nawoka i nga agu aboro si aida i moiberãse wenengai tipa agu azingo du yó na ni, ono gbe si naida i undoyo rogo toro yo na kini ngarasiyo. (1 Tesa. 5:14) Paranga aboro rogo dungurati rengbe kaa gbiatiyo na akpakarapai, wa gu nga takpata na “ga paranga gbegberẽ nyemuahe.” (2 Tim. 2:22) Si naida abaakumba nindu dedede kaa bi awirinayo kpuyo yo tipa ka ino agu apai i agbiatiyo na ni na kini ngarasiyo na wene arugute rogo Ziazia Kekeapai yo. Ka i fu arugute tipa ngbatunga agu apai re ti wene regbo, si rengbe ka banda awirinayo ti gu kerepai ka gbiayo.
16. Ka si du nga wirina ho rogo dungurati si aida i undo ní rogo toro yo, gini undo rengbe abaakumba ka fuhe funi?
16 Na ka si du nga kpakarapai gu duho namaa ga kandoro raka rogo toro yo ngbapai? Yakoba aya: “Gu ni [ho] du dagba roni yo na kaza? Ni yámbu ga kanisa abaakumba i ki kpari auru ni, niuka nzeme ku auru ni ni rimo Gbia. Gu kpe nga ga idapase abátasa gu ni nakaza, Gbia atúmba ni ku ari; si ngia ni amangi ingaapai, i avù ni avu ti ni.” (Yak. 5:14, 15) Ka si vura du nga gu boro nawoka ní ‘ayambanga ga kanisa abaakumba’ te, si naida i yara ni ipo tipa ka undo ní ka inipai tipaha. Ho abaakumba akpara ni tipa awirinayo na kini undoyo ti regbo kpakaraapai, i nayugoho nga i nga wene abaakumba na i nangarasa agu aboro du kutii beyo.—Oni gedi Yesaya 32:1, 2.
17. Ho abaakumba awirika gu kpiapai ni nga ga “bakere babanda akandoro,” sangbanaha nga gine?
17 Rogo agu apai dunduko abaakumba amangaha rogo ga Yekova riigbu, i naasada ka wirika gu “bakere babanda akandoro” nga Yesu Kristo. Nibi gu undo abaakumba afuhe rogo toro yo, akandoro nagbia undo nibakerehe na kini zugo kina ku mbatayo. Mbiko gipai re, ani nafu tambuahe fu gaani bakere Babanda Akandoro nga Yekova.