KAPITA 14
Songoda Kina ga Mbori Zogarago Sa, Kura Zogarago Te
1, 2. (a) Gini bangua rengo banda apefuo Kristo dakuti gi gaani regbo re? (b) Wai du avurarani naˈasadi ka diabe rani, na sangbanaha nga gine?
YESU aru barangba Pirato, nga gu nyanyakipa basapungbanga nangia ga aYudo, na ki pepa gu bangua rengo banda ndikidi apefuoko da kuti gi gaani regbo re. Ko aya: “Gi ngbi aenga nga rogo gi zegino te re; ka gi ngbi aenge rogo gi zegino re; ka gimi amoyambu naso vura tie, i ka fu re fu aYudo; were gi ngbi aenga nga etere.” (Yo. 18:36) Pirato ambu Yesu i imiko, ono gu diabese re adu tipa umba regbo. Yesu aima zinga be kpio. Agu abazogo nangia ga aRomo yo aidi ka nyasariipa apefuo Kristo, ono i aadunga na diabese te. AKristano agbandaka gu pangbanga nga ga Kindo rogo arago dunduko ti gu regbo re.—Koro. 1:23.
2 Fuo i sigira Kindo rogo 1914, bete nyanyakipa abazogo rogo zegino aima asada ka nyasariipa ga Mbori aboro. Ono guni ho sa naadi berani te. Dungu azogarago gbiati aboro poritiki aˈasadi ka manga rani ngbaome tipa ka rimiso rani ku rogo gayo tagbagaapai. Ono i aadunga na diabese tipa ka kparaka rani te. Areme, azogo nga ga Kindo naraka rogo papara zegino naabaha. Wa vura duhe wo, ani ni kodikodi rani rogo zegino dunduko, na ani arimisongo tirani ku rogo poritiki te. Gaani kodatise nayugo gupai nga ga Mbori Kindo nazogarago, na gu Bakindo nga Yesu Kristo naruga gako azogo, nakpuruwa yo na kini bandayo kindi. Ani bingo agu agene ko namangihe ngbaha, na ki bi wai ko nanyakasi gaani idapase rogo agu adiabese nga ga angbanga wa ka ani mangi ome ka zanga ‘du ni aboro zegino.’—Yo. 17:14.
Gupai Naada ni Nyanyakipa Pai
3, 4. (a) Ginipai namangi ti gu regbo i asigira Kindo ti ni? (b) Ya mo ga Mbori aboro arugutiyo mbata wenengai na gupai nga ga kparatise ti zegino? Oni sakinga rogoyo.
3 Fuo i sigira ga Mbori Kindo nibasa, vura atona ngbangbaturũ yo na i ki ba Satana ku auru kpotosende. (Oni gedi Yugoti 12:7-10, 12.) Vura amangi auru kpotosende a, nga gu naˈasadi ga Mbori aboro. I adiberã tipa ka pekafuo ga Yesu kpiapai na ka zanga du ni papara gi zegino re. Ti tonatonaha, i aaruganga tiyo nzunzu na guhe si aaida i mangihe tipa ka kparatiyo ti poritiki te.
4 Ni kpiapai, gu namba sita buku nangia Millennial Dawn (L’Aurone du Millénium),a nga gu nakuru rogo 1904, angarasi aKristano ka i rimisingo tiyo ku rogo vura yo ya. Ono tie, si aya ka si du nga i zi Kristano tipa ni da ni sekere, si naida ni sanahe tipa gu sunge akodanga sovura ya. Ka si du nga i aidanga ha funi te na i ki kedi ni ku ba vura yo, si naida ni mangi ome ka zanga imo boro. Herbert Senior, naraki ringara aNgirisi yo na nazi bapatiza rogo 1905, afura tipa gupai re ki ya: “Apai aima du ni vunduvunduhe dagba awirina mbiko rugute aadunga ho naayugoho singia si ni ruruhe ka rimo sunge asekere ono zanga ndu sa vura te.”
5. Wai du gu Ngbaõbambu Sinziri nangia ga Mbirinvuo 1, 1915, atona ka kpuruwa gaani giarogopaiyo?
5 Ono tie, gu Ngbaõbambu Sinziri nangia ga Mbirinvuo 1, 1915, atona ka kpuruwa gaani giarogopaiyo tipa gipai re. Nibi agu apai si aaida i mangihe naadu rogo buku sa agumbaha, (Studies in the Scriptures/Études des Écritures), Ngbaõbambu Sinziri aya: “Ani nabaka kina bangirani singia rimo sunge asekere zanga sovura asanga rani ani mbupa gaani idapase te.” Ono ginipai rengbe ka manga ka i serekpo Kristano nga ka ni avonga roko asekere na ki da ni sekere ya i nika imo ni? Gu kekeapai re aya: “Anga wenepai ngaha nga boro kpi niruru ni fu Gbia Zereda mbiko ni aidanga ka basasangba ko te te, kuba gupai nga ni kpi mbiko manga ni sunge fu abakindo gi zegino re na kini songodi yo, wa gu nga ka manga agu apai natagbagatihe na gu yugopai nga ga gaani Bakindo du ngbangbaturũ yo? Nibipa agu akpio du ue re, ani naida na gu bambataha mbiko du niruru rani fu gu gaani Bakindo du Ngbangbaturũ yo.” Wa gu kekeapai re avura pe gi nyanyaki afugo re vurũ, si adigisihe na gu fugo nga: “Ani ayanga aboro mangihe wo te. Berãpai du gbua ani nafuhe.”
6. Ginipai oni nawirikihe ti gu kpiapai nga ga Wiriba Herbert Senior?
6 Kura awirina aima rugatiyo na gipai re wenengai, na i ki diberã ka zanga mangasunge asekere. Herbert Senior, fugoko nidu mbata kusayo aya: “Tipa re tigimi, mi aabingo gu kparakparapai naadu ti zoga zende we rogo bakurungba [gu sunge angianga sovura ya] na ti rimisoho ku rogo bundu ka zumo ho te.” (Rk. 16:10) Ni sangbana gipai re, i aba Wiriba Senior ku bambukiso yo mbiko sangbakpotokoyo aaidanga ko mangi sunge asekere te. Ko na gu kura awirina biama adu dagba agu aboro naadu 16 sangbakpotoyo yo aaidanga ha fuyo i mangi sunge asekere ya, kodihe na gu kura akumba rogo gu kura apambori, i azi yo ku rogo gu bambukiso nga Richmond ringara aNgirisi yo, na kusa, i atona yamba yo nga Richmond 16. Ti gu regbo re, i andu na Herbert gbiati gu kura aboro naadu wa ko ni gbuko ku ba vura yo France yo. I asaringbanga yo yo nga i nofo yo kusayo. I arugusi ko gbiati gu kura aboro ti gene tenge tipa ka nofa yo, ono ka i aimongo yo ya. Kuba gure, i azi yo na agarã 10 ku bambukiso yo.
“Mi arugu tire na gupai nga, si naida ga Mbori aboro du na pazereda na aboro dunduko, zavura ti regbo vura vurũ.”—Simon Kraker (Oni bi genewaraga 7)
7. Ti tonatona gu Ue Vura Nga ga Zegino, ginipai ga Mbori aboro aye ka bihe?
7 Ti gu regbo gu Ue Vura Nga ga Zegino atona, ga Yekova aboro dunduko aima rugatiyo na ginihe nga zanga rimisotise ku rogo agu atagbagapai nga ga zegino na gupai si aida i mangihe tipa ka pekafuo ga Yesu kpiapai. (Mt. 26:51-53; Yo. 17:14-16; 1 Pet. 2:21) Ni kpiapai, gu Ngbaõbambu Sinziri nangia ga Ngbangba 1, 1939, adu na nyanyakipa kekeapai vuruhe yo nga “Kparatise ti Agu Apai Nga ga Zegino,” si aya: “Si naida ga Yekova aboro mangipai kuti gu kidohe nga i arimisongo tiyo ku rogo agu atagbagapai nga ga rikaaboro ti regbo vura te.” Simon Kraker namangisunge rogo rii-basunge, Brooklyn, New York yo afura tipa gu kekeapai re nga: “Mi arugu tire na gupai nga, si naida ga Mbori aboro du na pazereda na aboro dunduko, zavura ti regbo vura vurũ.” Gu riahe nga ga toro re aye ti wene regbo na si aima undo ka mbakada ga Mbori aboro tipa gu nyanyaki asada nagbiayo tipa du yo niruru yo fu Kindo.
Serekpohe be gu ‘Ime’ Nga ga Sogote
8, 9. Wai du ga gu mokedi nangia Yoane sangbanebi adigisitihe?
8 Gu mokedi nangia Yoane ape gupai nga tingbafuo i sigira Kindo rogo 1914, daragona nga Satana Bakitingbanga, nika asada ka nyasariipa asongodi ga Mbori Kindo ni uka ko gu ime ngbako yo nga gu narukuba gu kurapai.b (Oni gedi Yugoti 12:9, 15.) Wai du gu ga Yoane sangbanebi re adigisitihe? Naatona rogo1920 ka ndu kumbatayo, ga Mbori aboro aima gbiatiyo na bakere rungosiro. A wa si amangi tipa agu awirina naaraki rogo gu papara Amerika du ku nodiyo ti regbo gu ue vura nga ga zegino, i aba Wiriba Kraker ku bambukiso yo tipa du ko niruru ko fu ga Mbori Kindo. Nirengo, ti regbo vura, aDezire Yekova nange dagba gu kura zizi aboro yo dunduko naadu bambukiso Amerika yo mbiko sangbakpotoyo yo aaidanga ha fuyo i sovura te.
9 Bakitingbanga na gako aboro aaida ka gbarasapa agu azogo nga ga Kindo i mbupa manga rurupai, ka i vura kaa raka kina wari vurũ. Rogo Afirika, Putu, na Amerika yo, i aima ye na yo ku barangba agbiangbanga na kini pe gupai fuyo nga ka i aria berãyo i nambu yo ambu. Mbiko gayo diaberã ka zanga rimiso tiyo ku rogo agu atagbagapai nga ga zegino, i akisi yo ku bambukiso yo, ki taki yo, na kini kuadi aguyo. Germani yo, ga Mbori aboro agbiatiyo na kere rungosiro mbiko i aká ka fu iriso fu Hitler watadu ka ndu gene vura yo. Aboro wa 6,000 i azi yo ku bambukiso yo ti regbo aNazi, na bange agu aDezire Yekova nangia aboro Germani gbiati aguyo naangianga aboro Germani ya aima kpi be rungosiro kisusi 1,600. Wa si avura du wo, gene aadunga be Bakitingbanga tipa ka nyasariipa ga Mbori aboro te.—Mk. 8:34, 35.
‘Kpotosende’ Nambira ‘Ime’
10. Ginihe “kpotosende” arukubaha, na wai du si nasongodi ga Mbori aboro?
10 Gu sangbanebi gu mokedi nangia Yoane akehe ayugu gupai nga “kpotosende” narukuba agu aboro zegino du na wene bipai nika mbira gu “ime” narukuba rungosiro, tipa ka undo ga Mbori aboro. Wai du gu papara sangbanebi re nadigisi tihe? Rogo gu dungu agarã yo nangbefuo gu Ue Vura Nga ga Zegino, wo “kpotosende” naaundo pai kubara ruru asongodi ga Masiya Kindo yo. (Oni gedi Yugoti 12:16.) Ni kpiapai, kindigi abambu ngbanga ni bakiakia aima banda gu ga aDezire Yekova rengo nga ga zanga mangasunge asekere gbiati rimisotise ku rogo gu mangaapai naataasarimo ringara. Ni bambatapai, ani bingo gu nyanyakipa adiabese Yekova afuhe fu gako aboro nibipa mangasunge asekere.—Tam. 68:20.
11, 12. Gini akpakarapai Wiriba Sicurella na Thlimmenos agbiatiyo na ni, na sangbanaha angia gine?
11 Amerika. Anthony Sicurella adu dagba agu agude yo sita nangia awiri aDezire Yekova. Ko azi bapatiza na garãko nga 15. Ho ko ada ni nga 21, ko andu ka ke rimoko na agbia ngbii nga ko nga bamangisunge fu Mbori. Fuo agarã ue kusa, rogo 1950, ko andu berewe i ke ko ku dagba agu aboro yo sangbakpotoyo yo aidanga ha fuyo i sovura ya. Wa vura duhe nga gu Basunge Nga ga Kusa Ngbanga Kuti Aboro (FBI) aabingo ho ni gbegberẽpai te, gu Basunge Nabipa Sapangbanga aaidanga ha fuko te. Fuo i peke gipai re rogo rukutu abambu ngbanga bara dunguhe, Bakere Bambu Ngbanga nga ga Amerika angere ku rogo ga Wiriba Sicurella pai na ki saringbanga fuko. Gu ngbanga i asarihe re aima undo na sara kura angbanga rogo Amerika nibipa agu aboro sangbakpotoyo yo aaidanga ha fuyo i mangisunge asekere ya.
12 Ringara AGiriki. Rogo 1983, i akitingbanga Iakovos Thlimmenos ya irisa tiko te mbiko ko aká ka vo roko asekere na i ki kisi ko ku bambukiso yo. Fuo i kusiko, ko afu rimoko tipa sunge ngerafuo marã, i ki kaha aka fuko mbiko kekeapai adu ti rimo nga ko nga bamangi gbegberẽ apai. Ko andu na gipai re ku ngbanga yo, ono gu bambu ngbanga nga ga ringara aGiriki aaidanga ha fuko te, sidu, ko ki ndu ku rogo gu Bakere Bambu Ngbanga Nga ga Putu. Rogo 2000, agbiangbanga 17, nga ga gu bambu ngbanga re, asaringbanga fuko, na gayo diaberã angia kpiapai tipa manga fu kura aboro gbegberẽ. Mbata fu gu sarangbanga re, agbia-ngbii akepai ti rimo awirina susi 3,500 ringara aGiriki yo nga i nga amangi gbegberẽ apai mbiko i azi yo ku bambukiso yo tipa zanga rimiso tiyo ku rogo gu tagbagaapai nga ga zegino. Fuo gi wene sarangbanga re, ringara aGiriki arũ ndiko na ki di agu apai kusayo i akitingbanga yo na ni. Berewe a, fuo agbia wisigi agu andiko nga ga ringara aGiriki, i anyakasipa gu ndiko i aima rũhe bete agarã kusayo fu aboro ringara dunduko nga i ima rengba ka manga gu kura sunge kia kuba manga sunge asekere.
“Mbata fu mi rimi ku bambu ngbanga yo, mi akpari nyanyaki fu Yekova, na mi ki bi gupai nga ko ima fu zereda fere.”—Ivailo Stefanov (Oni bi genewaraga 13)
13, 14. Ginipai oni abihe nga ani rengbe ka wirikaha ti gu ngbanga nangia ga Ivailo Stefanov na Vahan Bayatyan?
13 Bulgaria. Rogo 1994, garã Ivailo Stefanov adu nga 19 ho i arimisi ko ni ku rogo sunge asekere ngbaome. Ko aima ká ka mangasunge asekere watadu agu asunge du abangerekurii he nga asekere. I aziko na agarã nga 18 ku bambukiso yo ono ko ki du nga kango kuti gu diaberã re, mbiko ko adu na rengo ka manga gupai sangbakpotokoyo aaidaha. I akedi gi gako ngbanga re ku rogo gu Bakere Bambu Ngbanga Nga ga Putu. Rogo 2001, mbata fu i sari gako ngbanga, abazogo nga ga Bulgaria yo ambakadipai dagbayo na Wiriba Stefanov. Gu zogarago nga ga Bulgaria ambupai fu Wiriba Stefanov kodihe na agu aboro ringara nga ga Bulgaria yo dunduko naadu na nyemu ka manga gu kura sunge kia kuba sunge asekere.c
14 Armenia. Rogo 2001, Vahan Bayatyan ada ti gu garã i aidaha fu aboro dunduko i mangisunge asekere.d Sangbakpotokoyo aaidanga ha fuko ko mangisunge asekere te ono agbiangbanga ki kaha aka fuko. Rogo Mbirinvuo 2002, i aziko ku bambukiso yo tipa agarã ue na beberehe ono i ki kusiko fuo adiwi bawe na beberehe. Ti gu regbo re, ko angia kango ku rogo gu Bakere Bambu Ngbanga Nga ga Putu na i ki idihe fuko. Ono tie, rogo Tanvuo 27, 2009, ngbanga aima ti na ko. Gu sarangbanga re aima imisa agu awirina naadu na kina gu bangisa kpakarapai re tiyo Armenia yo. Ono tie, gu kindigi agbiangbanga nga ga gu bambu ngbanga re awisigi gu ngbanga re berewe. Rogo Bamburu 7, 2011, agbiangbanga asaringbanga fu Vahan Bayatyan. Gere nangia bambata regbo gu Bambu Ngbanga Nga ga Putu bihe nga agu aboro sangbakpotoyo yo aidanga i mangisunge asekere ya mbiko gayo pambori, i na kina rengo beyo mbiko gu ndiko du tipa gu ranirii nga ga berãpai, sangbakpotoseyo, gbiati pambori nabanda yo abanda. Gu sarangbanga re aabandanga kina gu rengo nga ga aDezire Yekova sa te ono akama amirioni agu aboro du rogo agu aringara du nga papara gu Bakere Bambu Ngbanga Nga ga Putu re.e
I zaki awirina Armenia yo fuo gu Bakere Bambu Ngbanga Nga ga Putu saringbanga fuyo
Gu Mangaapai Nataasa gu Zogarago Nga ga Ringara
15. Tipagine ga Yekova aboro aidanga ka rimiso tiyo ti ni ku rogo agu apai nataasarimo ringara ya?
15 Anga ga Yekova aboro niruru yo fu ga Masiya Kindo ni zanga yo manga kina sunge asekere sa te, ono ni zanga yo rimiso tiyo ku rogo agu apai nataasa gu zogarago nga ga ringara. Gbe fuo tona Ue Vura Nga ga Zegino, dungu aboro rogo zegino dunduko atona ka taasa gayo ringara. Dungu aringara naida gayo aboro-ringara zungahe ka ra nigoyo fu gayo ringara ni bi yo abia taasa ringara, na kini de masa fu bendeere. Ono tie, ani nara nigorani fu kina Yekova sa. (Gate 20:4, 5) Ni sangbana gipai re, ani ima gbiatirani na arungosiro. Wa vura duhe wo, Yekova ima mangasunge berewe na “kpotosende” si mbiri bete agu arungosiro re. Oni kparianga bete gu nyanyakipa adiabese Yekova nafuhe furani vurube Kristo nibipa gipai re.—Tam. 3:8.
16, 17. Gini kpakarapai Lillian na William Gobitas agbiatiyo na ni, na ginipai mo nawirikihe ti ni?
16 Amerika. Rogo 1940, dagba agbiangbanga 9, nga ga gu Bakere Bambu Ngbanga Nga ga Amerika, aguyo 8 asaringbanga ni gbegberẽhe fu aDezire Yekova nibi gu ngbanga naadu dagba gu sukuru nga ga Minersville na Gobitis. Lillian Gobitas,f garãri adu nga 12, na kawiiri nga William, garãko adu 10, aaida ka nye niruru yo fu Yekova, sidu, i aká ka de masa fu bendeere na ka bibia taasarimo ringara. Ni sangbanaha, i ado yo kusayo sukuru yo. Gipai re aye ku barabangiri Bakere Bambu Ngbanga, na agbiangbanga ki pe gupai nga gu diaberã nga ga sukuru rẽarẽ kuti agu andiko nga ga ringara bambiko si “nasa aboro-ringara i du ni kodikodi yo.” Gu sarangbanga re aye na bakere rungosiro. Dungu awiri aDezire Yekova i ado yo sukuru yo, aguyo kini zanga gayo asunge, na dungu aguyo naagbiatiyo na azubohe be aboro zuu. Buku sa (The Lustre of Our Country) ape gupai nga, gu “rungosiro aDezire Yekova agbiatiyo na ni rogo 1941 kuti 1943, angia gu kere rungosiro aboro agbiatiyo na ni tipa gayo apambori rogo ue bawe kama agarã Amerika yo.”
17 Gu diabese nangia ga avura Mbori adu tipa bete regbo gbua. Rogo 1943, Bakere Bambu Ngbanga asari gu kura ngbanga berewe naadu wakina gu nangia ga Gobitis. I aayambaha nga gu ngbanga du dagba abangerekurii sukuru nga ga West Virginia na Barnette. Bara gere, Bakere Bambu Ngbanga asaringbanga fu aDezire Yekova. Gere nangia bambata regbo gu Bakere Bambu Ngbanga nga ga Amerika fugu gaha diaberã fuo bete regbo gbua. Fuo gu sarangbanga re, gu bakere rungosi ga Yekova aboro Amerika yo aagbiatiyo na ni agito kusende. Vurube gupai re, i atona ka irisa gu rengo nga ga aboro-ringara Amerika yo.
18, 19. Ginihe Pablo Barros apehe nga si naundo ko ko ru nyanyaki, na wai du rengbe gu kura ga Yekova amoyambu ka wirika gako kpiapai?
18 Argentina. Rogo 1976, i ado Pablo na Hugo Barros, garãyo adu nga muambe na saba sukuru yo mbiko i aaidanga ka irisa bendeere te. Ti gu kura regbo sa, nangerekurii sukuru azugbaga Pablo na ki ngoka riko yo. Fuo nyasa sukuru, ri adingiso yo tipa saa sa, ki asadi ka manga yo ngbaome i mangi agu apai nataasarimo ringara. Pablo aya: “Zanga ga Yekova undo, mi aarengbanga ka ru nyanyaki sa gu soapai naaida mi mbupa du mi niruru re te.”
19 Ho gupai re aye ni ku ngbanga yo, basapungbanga aya ga sukuru diaberã ni kina ruruhe ka do aPablo na Hugo. Ono tie, i andu na gi ngbanga re ku rogo gu Bakere Bambu Ngbanga nga ga Argentina. Rogo 1979, Bakere Bambu Ngbanga aˈaria gu diaberã nangia ga umba bambu ngbanga, ki ya: “Gu mbusa re [ka do agude] andunga sa na gu ndiko nga ga ringara du tipa gu rengo nga ga wirikapai te (Article 14) gbiati gu sunge nga ga ringara nga agude dunduko wirikipai (Article 5) te.” Gu diabese re aima undo awiri aDezire Yekova wa 1,000. Si asa gupai nga ka i donga kura agude berewe ya, na aguyo i ado yo wa aPablo na Hugo, i akaraga yo ku sukuru yo berewe.
Dungu paranga aDezire Yekova niima du niruru yo ti regbo asada
20, 21. Wai du gupai naadu tipa Roel na Emily Embralinag nanyakasi gaoni idapase?
20 Philippines. Rogo 1990, Roel Embralinag,g garãko adu 9, na dawiriko nga Emily, garãri adu 10, kodihe na gu kura awiri aDezire Yekova nga 66, i ado yo sukuru yo tipa zanga de masa fu bendeere. Ba Roel na Emily, nangia Leonardo, aˈasadi ka fura na abangerekurii sukuru ka i aidanga ha ya. Wa apai aagbera kina kumbatayo, Leonardo andu na gipai re ku rogo gu Bakere Bambu Ngbanga nga ga ringara. Marã aadunga be Leonardo te na ko aadunga na bainiparugute beko ni songodi ko a te. Agu aborokporo re akpari nyanyaki fu Yekova ko undo yo. Kuri gipai re, i anaasawia agi agude re ti aregbo dunduko. Leonardo abihe nga ko adunga na diabese te mbiko ko ainongo wai ka fura ngbanga yo te.
21 Ono pai aye ka manga nga wirina nga Felino Ganal, nangia bainiparugute mbata fu gu basunge nabipa Andiko rogo gu ringara re aundo ka fura kuba yo ngbanga yo. Ti gu regbo re, Wiriba Ganal aima mbu mangasunge fu gu basunge re na ki da ni Dezire Yekova. Ho Bakere Bambu Ngbanga angere ni ku rogo gupai re, agbiangbanga dũ asaringbanga ni wenehe fu aDezire Yekova na ki zahe ti do agude sukuru yo. Berewe a, apai aima gberã fu agu aboro naida ka gbarasapa du ga Mbori aboro niruru yo.
Zanga Rimisotise ku Rogo Agu Apai Nga ga Zegino Naye na Kodatise
22, 23. (a) Tipagine du ani nadu ti ni na diabese rogo nyanyakipa angbanga yo? (b) Gu zereda du dagbarani rogo zegino dũ nayugo gine?
22 Tipagine ga Yekova aboro nadu ti ni na diabese rogo nyanyakipa angbanga? Kindigi pa aboro nga ga poritiki berani te. Ono wa vura duhe wo, rogo dungu aringara na dungu abambu ngbanga, agu agbiangbanga du na ruru bipai aima banda rani be gu kereapai ka mangi rani be avurarani na gu kura adiaberã i amangihe aima rimo agu andiko nga ga ringara. Zanga kapa, Kristo du songodi rani tipa ani du na agu adiabese re. (Oni gedi Yugoti 6:2.) Tipagine du ani naandu ti ni ku ngbanga yo na gaani apai? Anga ani naida ka manga ariapai ti andiko te. Kuba gure, gaani sasa nga ani naida ka ndu kumbatayo kaa mangasunge fu gaani Bakindo nga Yesu Kristo zanga pai ka na ani ti ni.—Amo. 4:29.
23 Rogo gi zegino agu atagbagapai nga ga poritiki naima kparakaha na hi be sogote re, gaani Bakindo nga Yesu Kristo ima fu maku kurii gu ome apefuoko amangaha rogo zegino dunduko tipa ka kparatiyo ti gu tagbagaapai nga ga zegino. Satana na diabese tipa ka kparaka rani na ka zio rani te. Kindo ima dungura amirioni aboro “awírika nga pa sovura berewe” ya. Padu ani ni kodikodi rani rogo pazereda rogo zegino dũ nga iˈiriwopai, si nga gu nyanyaki gopai nayugoho nzunzu nga ga Mbori Kindo nazogarago!—Yes. 2:4.
a I nayamba gi buku re a nga The New Creation (Nouvelle Création). Kusa, agu abuku dunduko nangia Millénnial Dawn (L’Aurore du Millenium) i ayambuhe nga Studies in the Scriptures (Études des Écritures).
b Ka oni aida ka inopai tipa gu sangbanebi re, oni bi gu buku nga Revelation—Its Grand Climax At Hand! (La Révélation: le grand dénouement est proche!), kapita 27, kpewaraga 184-186.
c Gu giatise re aaida na gupai a nga gu zogarago nga ga Bulgaria fu gu kura asunge kia nga gu adunga bangerekuriihe nga sekere ya fu agu aboro dunduko sangbakpotoyo yo aidanga i mangi sunge asekere ya.
d Ka oni aida ka ino gu kura apai, oni bi gu Ngbaõbambu Sinziri nga ga Ngbangba 1, 2012, kpewaraga 29-31.
e Vuru agarãyo 20, gu zogarago nga ga Armenia aima zio paranga aDezire Yekova ku bambukiso yo naima susa 450. Rogo Ngbangba 2013, i azaki gu yangada yo naadu bambukiso yo.
f Ti regbo ngbanga, i aakenga rimo agu aborokporo re wenengai te.
g Ti regbo ngbanga, i ake rimo agu aborokporo re ni irairaha nga Ebralinag.