“Ga Yekova Vura Nga Ha”

Gi kpakarapai re atona rogo gu garã nangia 1990 ho gu zogorago nga ga France ape gupai ni nga, si naida gaani be-basunge tumo marã-ngbeti tipa agu agamahe i agbiaha vuru agu agarã yo natona ti 1993 kuti 1996. Gu ba sarangbanga naadu France yo aamanganga ruru sarangbanga furani te. Tingbafuo i saringbanga kina ku rirani, irangbii adi marã rogo gu baigo marã nga ga be-basunge nga gu naima susa adorari 6,300,000. Sidu, gu yangarapai ani arengbe ka mangaha angia ka ndu na gaani ngbanga ku barangba gu Bapengbanga Nga ga Putu Du Tipa agu Arengo Nga ga Aboro. Mbata fu gi ba sarangbanga re gi gaani ngbanga, gu Bapengbanga Nga ga Putu Du Tipa agu Arengo Nga ga Aboro amangi mbakadapai tipa ani gbia tirani na agu abainipa andiko nga ga gu zogarago nga ga France tipa ka bihe singia ani rengbe ka dakutipai sa mbata fu i sari gu ngbanga re.

Ani aberẽ gupai nga, gu dee naangera kurii gi ngbanga re nika sana rani asana tipa ani tumo bete marã fu gu zogorago nga ga France. Ono tie, ani arugu tirani na gupai ziazia nga ka ani fu kandara dorari sa, gure nga ani ima kuo gu bangua arengo nga ga Baibiri. Awirina nga akumba na dee aima fu gamahe na nyemuhe tipa ka songoda sunge Kindo, ono gayo agamahe aangianga ga irangbii te. (Mt. 22:21) Ono tie, ani aima ndu tipa gu dunguratise re tipa ka yugo irisa tipa agu andiko nga ga gu bambu-ngbanga du Putu yo.

Ani akodi tirani rogo bawene vuru bambu yo sa tipa ka gia gu ngbanga re. Apai aatonanga wenengai te. Gu dee naafura kuba gu bambu-ngbanga du Putu yo aya, aDezire Yekova duwa ka i tumo bete gu marã ngbeti France asana yo tipaha. Ga Yekova toro asarani ani sana ri nga, “Ya mo mo iningo gupai nga irangbii ima dia marã rogo gaani baigo marã yo nga amirioni biama na beberehe?”

Gipai re aima zigbä ri. Ho gu badona ni naabi pa andiko kua irangbii yo aini gupai ni i amangihe re, gayo mangapai kuti gu ngbanga re aima ariatihe nikerehe. Ri abira yo na ki digisi gu ngbanga re nibasa. Mi atingidi gupai nga Yekova ima mangapai ngba gu gene ani aarengbanga ka mangapai ngbaha ya, nga ka aria apai dunduko tipa ani du na diabese rogo gu ngbanga re. Ani adu na bakere ngbarago ho ani aguari ni pati gu pe ngbanga re, na kina ngbarani nazere ka bi gupai namangi re.

Rogo Banzinga 30, 2011, gu Bapengbanga Nga ga Putu Du Tipa agu Arengo Nga ga Aboro amangi gu diaberã nga gu nambakadi apai furani. I adi gu marã ngbeti ani atumoho kusayo na ki ru ndiko tipa airangbii karaga gu gaani marã i adihe na gu kuraha kuriihe! Gi nyanyakipa diaberã nga ga ndiko re nabanda gaani ndikidi irisombori kindi France yo. Gu sanahe nga gu ani aainongo ho nga ani nika sanaha re ya adu wakina gu mbia i aimi Goriata na ni. Si aima aria gu sangbanapai gu sarangbanga re aye na ni. Tipagine ani adu na diabese ti ni? Bambiko wakina gupai Davide apehe fu Goriata nga, “kina ga Yekova vura nga ha.”​—1 Sam. 17:45-47.

Anga gere nga gu bangisa regbo ani adu na diabese rogo gumba ngbanga yo te. Wa vura duhe nga agu azogarago du na bakere ome ti ni gbiati aboro pambori ima soga rani, ani ima du na diabese rogo angbanga nga 1,225 rogo bakere aBambu gumba-ngbanga rogo aringara nga 70 na rogo agu abambu gumba-ngbanga du rogo zegino dunduko. Agi adiabese ani nadu na ni rogo agumba ngbanga re ima banda gaani bangua arengo, wa gu nga gaani rengo ka ke gaani pambori ringbisihe kuti andiko, gaani rengo kaa tungusapai gbaiga, gaani rengo ka zanga rimiso tirani ku rogo agu apumbo nangarasa aboro kuti agu apai nga ga birĩ zogarago, gbiati gu gaani rengo du tipa ka zanga dia kure kutii kpotorani yo.

Tipagine mi arimisi tire ti ni ku rogo gumba angbanga Putu yo wa si avura du nga mi aamangasunge Rii-basunge Nga ga Zegino Nga ga aDezire Yekova New York yo Amerika yo?

MI ASONO ROGO GU NGBADIMOKPORO AVUNGURE ADU NA NYEMU KA MANGASUNGE AMOKEDI

Avungure nga George na Lucille, akuru rogo gu rika nga ga 12 Girada yo na i aamangasunge Ethiopia yo, nga gu ba i avungure rogoho rogo 1956. I ayambu rimo re nga Firipo, tifuo gu batungusi wene pangbanga nadu rogo bambata sa kama agarã. (Amo. 21:8) Rogo gu garã nangbe fuoho, irangbii arugusi gaani irisombori yo. Wa si avura du nga mi adu kindi ni tooni re, mi natingida pa wai atingida gaani aborokporo airisombori rogo gbuko yo. Wa mi angia gude, mi aberẽ gupai nga si aima ngba wa gure! Si nipa gberãrago nga, agbiangbii asa rani ngbaome ani kuru rogo gu ringara re rogo 1960.

Gaani aborokporo aga ku Wichita, Kansas yo Amerika yo, ono avungure aambunga gayo nyemupai nga ga mangasunge ni amokedi i adu na ni mbata kusayo te. I ayugupai fere na dawire nga Judy, gbiati tooni tamere nga Leslie, nga aguyo i avungurani na yo Ethiopia yo tipa ani kpinyemu Yekova na kini irisiko kina boro ngbadurani yo. Mi azi bapatiza ho garãre adu ni 13. Tifuo agarã biata kusa, gaani aborokporo aga kaa mangasunge yo bakere zingo adu ni ni bakerehe Arequipa, Peru yo.

Rogo gu garã nangia 1974 ho garãre adu ni 18, gu be-basunge du Peru yo asia re na kura awirina ni akumba biama ani nimangisunge ni kparakpara abazakigene. Ani aandu kaa tungusapai rogo agu adagbarago i aatungusanga pai mbata rogoho ya, ariyo rii agu abaagangara nga ga Central Andes. Gipai re aakodapa tungusapai fu agu aboro naape gu fugo nga Quechua gbiati Aymara. Ani andu na gu kurungba i ayambaha nga motor home nga gu kpiaha angera wakina bakiki sanduki. Mi ima kpinyemu kaa berãpa agu aregbo ani aamangasunge na Baibiri ka yugo gupai fu agu aboro naaraka rogo gu rago re nga Yekova nika dia arungo barambeda kusayo, akaza, gbiati kpio kusayo. (Yugo. 21:3, 4) Dungu aboro nada ni airisi Yekova.

MI ATONA MANGASUNGE RII-BASUNGE NGA GA ZEGINO YO

Ti gu regbo ani andu ku Peru yo rogo 1977, Albert Schroeder, nga gu ko nangia boro Riigbu Bipasunge nga ga aDezire Yekova, angarasi re tipa mi hiisi gu fuomu nga ga mangasunge Betere yo rii-basunge nga ga zegino yo. Sidu, mi ahiisi he. Ngbutuko fuo gure, rogo Banzinga 17, 1977, mi atona gimi sunge rogo gu Betere du Brooklyn yo. Rogo agu agarã nadu biama fuo gure, mi amangisunge rogo gu basunge naangerafuo Giriso Rago gbiati Ngerafuo ho.

Rogo Banzinga 1978, mi agbia Elizabeth Avallone pati gu bakere dunguratise nga ga dungu aringara namangi New Orleans yo, Louisiana yo. Avunguri asonosi ri kina rogo rengo yo wa gu avungure asonosi re a. Elizabeth aima digo ni mangisunge anazakigene tipa agarã biama, na ri aabi mangasunge Kindo ti aregbo dunduko wakina gari gene raka. Ani atona kaa fura dagba tirani. Ani atona ka inido tirani wenengai na ki tona ka kpinyemu tirani ni bakerehe. Ani arogo tirani rogo Tanvuo 20, 1979, na ani ki tona mangasunge Betere yo ni arogotise.

Agu awirina nadu rogo gu gaani bambata dungurati nga aguyo naape pa aboro Sepania Brooklyn yo aima du na bakere nyemuse tiyo. Ani ima mangasunge rogo kura adungurati a biata nga gu awirina naima du na nyemuse tiyo rogoho na nga aguyo naima ngarasa rani tipa ani naandu kindi kumbatayo na gaani sunge Betere yo. Ani na bakere tambuahe tipa gayo undo, kina wai a du ani na ni fu agu awirina naundo rani ka ngerafuo avungurani ho i agbinza ni na kini idi na undo.

GIMI SUNGE ROGO GU RONDO NABIPA ANDIKO

Kina ngbare nazere nga, rogo Ngi 1982 i asia re tipa mi naamangasunge rogo Gu Rondo Nabipa Andiko Betere yo. Fuo agarã biata kusa, i asana re tipa mi ndu ka wirikapai yunivasiti yo tipa kada ni bainiparugute. Mi aye ka wirika gupai nga aboro Amerika yo na rogo kura aringara adu na ranirii ka manga dungu apai mbiko agu adiabese bape-angbanga yo aDezire Yekova adu na ni. I asakipai tipa gi nyanyakipa angbanga re ni bakerehe rogo gaani riko.

Rogo 1986 ho garãre adu ni 30, i asia re ni babiapai kurii Gu Rondo Nabipa Andiko. Mi aima du na ngbarago nga aboro Betere aima du na kido kuti re ni bakerehe wa si avura du nga mi adu kindi ni paranga re. Ono mi aima du a na bakabangirise bambiko kura dungu apai adu kinaho mi aainongo pai tipaha ya, na mi aima ino gupai nga gi sunge re adunga taata te.

Mi ada ni bainiparugute rogo 1988, ono mi aainongo wai gu sukuru re adu na maapai kurii re na kuriipa gimi pagume na Yekova te. Bakere wirikapai ima rengba ka sa boro ni du na bakere nyemu kadu na diabese rogo raka yo na ni naabi tini nga ni ngba ki susi kura aboro nga aguyo awirika nga pai wa ni ya. Elizabeth nabatasi re. Ri aundo re tipa mi tona gbeberã re berewe kuti manga agu apai mi aamangaha mbata tipa kaa banda gimi pabakure na Yekova ni nyanyakihe mbata fu mi ndu ku yunivasiti yo. Tingbafuo bete regbo, mi atona mbeda berewe na Yekova. Mi ima ino gupai anga du na bakere inohe nga gupai nyakipa ha rogo raka yo te mbiko gupai namangi re. Gupai nasa raka si du na ndikidi rogoyo ti ni nga du na mbembedi pagume na Yekova na du na bakere nyemuse koyo du ko ni gbiati gako aboro.

PA BANDA WENE PANGBANGA NA PA NYAKASA HA

Tingbafuo mi nyasi wirikapai sukuru yo tipa ndiko, mi atona ka gbeberã re kuti undo gaani basunge tipa si ngerefuo agu asunge nga ga andiko Betere yo na ka banda ga Yekova riigbu gbiati gaani rengo tipa kaa tungusa wene pangbanga. Rago aima ngba tire na gimi sunge, ono si aima du ni kpakarakpakaraha bambiko apai aˈariatihe ni kina ipo rogo gaani riigbu. Ni kpiapai, ani anaasana aboro i naafu agamahe tipa gaani awaraga, ono natona ti gu garã nangia 1991, i asana Gu Rondo Nabipa Andiko tipa i undo ka fu rugapai nibipa wai ka i rugusi gipai re. Natona ti gu regbo re kaa ndu kumbatayo, aDezire Yekova atona ka zanga dia marã tipa awaraga. Gipai re aima sa sunge si du taata Betere yo na gene tungusapai yo na si aundo rani tipa ani ne agu akpakarapai duti tumo marã ngbeti. Kura aboro aberẽ gupai nga gi ariapai re nika sarani ani zanga bakere marã nga gu nika sa gupai nga ka ani dunga na awaraga be rani ka fuhe fu agu aboro nayugo nyemupai ya, na ni sangbanaha, bete aboro gbua na rengbe ka wirikapai tipa Yekova. Ono kurapai kia namangi. Gu bange aboro naairiso Yekova natona ti gu gara nangia 1990 aima kio wa bara ue kisusi gu nadu mbata, na awere aboro dunduko ima rengba ka wirikapai rogo agu awaraga du mburuhe rii Baibiri zanga i tumo marã tipaha. Mi ima ye ka bi gupai nga bakere aˈariapai rogo gaani riigbu na diabese mbiko ga Yekova undo na gu rugapai ani agbiaha be ruru kangara moyambu.​—Gate 15:2; Mt. 24:45.

Ani aadunga na diabese rogo angbanga Bambu gumba-ngbanga yo mbiko gupai nga ani na wene abainipa rugute te. Dedede, gupai ni nasa abasapungbanga na airangbii i undo rani nga gu wene mangaapai nga ga ga Yekova aboro. Mi abi kpiapai nga ga gipai re rogo gu garã nangia 1998 ho aboro biata rogo Riigbu Bipasunge na adiayo adu pati gu kparakpara bakere dunguratise namangi Cuba yo. I adu na weneringise gbiati irisa, na gipai re ayugu gupai fu airangbii nga ani arimisongo tirani ku rogo birĩ-zogarago yo te kisusi ai gupai ani aapehe fuyo pati agu adunguratise ani aamangaha na yo.

Ono tie, ti kura aregbo, gu yangara gene rengbe ani ka mangapai kuti iraira sarangbanga ngbaha nga, ka ‘banda wene pangbanga na pa nyakasa ha’ ngbanga yo. (Frp. 1:7) Ni kpiapai, tipa badungu agarã, airangbii Putu yo na South Korea yo aaidanga ka idapa gaani rengo du tipa ka manga gu sunge aboro ringara ni naamangaha kuba mangasunge abanzengere te. Ni sangbanaha, i aba awirina ku bambukiso yo Putu yo bangeyo adu nga 18,000 gbiati awirina 19,000 South Korea yo mbiko mangayo pai kuti gayo sangbakpotoseyo ka zanga mangasunge abanzengere.

Ni yangaraha, rogo Bamburu 7, 2011, gu Bapengbanga Nga ga Putu Du Tipa agu Arengo Nga ga Aboro amangi gu diaberã i aamanganga ha mbata rogo zegino ya vurube Bayatyan v. Armenia nga gu naaida agu aringara dunduko du Putu yo naafu gu sunge akodanga sunge abanzengere ya fu agu aboro aidanga ka mangasunge abanzengere ya bambiko gu gayo aida nga ga pambori. Fuo gure, gu ba sarangbanga nadu South Korea yo amangi kina ngbatunga gu diaberã re rogo Banzinga 28, 2018. Ka bete gu kura awirinarani nga paranga aboro arimisi tiyo ku rogo birĩ-zogarago, ka i amangingo gi nyanyakipa adiaberã re te.

Gu rondo nabipa andiko rii-basunge yo gbiati agu du rogo abe-basunge dunduko namangasunge nyanyaki tipa ka songoda gaani rengo ka iriso Yekova na ka tungusa wene pangbanga nga ga Kindo. Si nipa irisa furani ka ru kuba awirinarani nga aguyo nagbiatiyo na arungosiro be airangbii. Zavura ho ani adunga ni na diabese ngbanga yo ni ya, ani namanga dezirepai fu agbia na abakindo na fu arikaaboro. (Mt. 10:18) Si naida abasapungbanga, agu aboro narukuba airangbii, aboro aũgbandaka apangbanga, gbiati aboro dunduko mangipai kuti agu averesi ani akehe rogo gaani awaraga na agu ani amangasunge na ni Bambu gumba-ngbanga yo tipa ka songodapai ku bara gaani angbanga yo. Agu boro nakpinyemu rurupai nawirikapai tipa ada nga aDezire Yekova na mburu gayo aida. Kura agi aboro re ima da ni awirinarani airisimbori.

TAMBUAHE FORO YEKOVA!

Vuru agu agarã yo 40 susi kusayo, mi ima du na gu momu bere nga ga mangasunge kina sa na gu rondo nabipa andiko rogo abe-basunge dunduko rogo zegino na ka ru rogo dungu aBambu gumba-ngbanga na barabangiri nyanyakipa aboro. Mi ima kpinyemu agu awirinami mi amangasunge na yo rogo Gu Rondo Nabipa Andiko rogo rii-basunge yo nga ga zegino gbiati agu arondo nabipa andiko rogo zegino dunduko. Mi ima gbia badungu amaku rogo gimi raka yo na ki du na ngbarago.

Elizabeth ima songoda re rogo nyemuse yo na niruru ri vuru agu agarã yo 45 susi kusayo, ti wene aregbo na ti gbegberẽ aregbo a. Mi ima kpinyemu ri tipa gupai re bambiko ri aima mangaha wo zavura ti agu aregbo ri aanidu na gu kaza naasa ri ka ome dunga tiri ya.

Ani ima bi gupai ni tirani nga ome na diabese ayengo be gaani rengbanapai te. A wa Davide apehe, “Yekova nga ga gako aboro ome.” (Tam. 28:8) Nirengo, “ga Yekova vura nga ha.”