Oni Ngere Koyo Du Mbori ni Tipa Wene Rogatise

Yekovaa Mbori nakpamia bambata arogotise. Ziazia Kekeapai nape gupai furani nga ko amangi bambata dee “ki ye na ri fu kumba [nga Adamu].” Rago angba ti Adamu ni bakerehe ko ki ya: “Gere nga gu meme dagba amemere yo nga pasio rogo pasiore yo.” (Bambata Pai 2:22, 23) Yekova na kina nyemu gupai kindi nga arogotise du na bakere ngbarago.

Ho boro amanga rogatise ni, ní rengbe arengba ka berã gupai nga apai dunduko nikaa ndu wenengai zanga wiri kpakarapai. Ono ka gumba rengo nzunzu, zavura gu kumba na dee naima kpinyemu tiyo wenengai, kpakaraapai nakura akura rogo gayo ramukporo. (1 AKorindo 7:28) Rogo gi waraga re, oni nika bi agu arugute nga ga Ziazia Kekeapai nga gu rengbe oni ka mangasunge na ni oni ki gbia ngbarago rogo gaoni rogatise na ramukporo.​—Atambuahe 19:8-11.

1 ONI MANGI AGU ASUNGE YEKOVA AFUHE FURONI

GUPAI ZIAZIA KEKEAPAI AGUMBAHA: Kumbakudee nga bariikporo.​—AEfeso 5:23.

Ka mo ngia kumbakudee, Yekova nakpinyemu gupai bero nga mo ningerefuo diaro ni nunga. (1 Petero 3:7) Yekova afu ri foro ni gamo mounda, na ko naida mo nimangi ri ni irisa na nyemuse. (Bambata Pai 2:18) Si naida mo kpinyemu diaro ni bakerehe gbe, kini peresipa agu apai mbatayo nabi ri mbata fu gamo.​—AEfeso 5:25-29.

Ka mo ngia diakumba, Yekova nakpinyemu gupai bero nga mo niirisi kumbamo ni bakerehe gbe na kini undo ko tipa ko nimangi gako asunge wenengai. (1 AKorindo 11:3; AEfeso 5:33) Mo nisongodi agu adiaberã ko nikaa mangaha na kini gitiro na ko rogo apai yo. (AKorosaio 3:18) Ka mo amangaha wo, mo nika ngba bangiri kumbamo na bangiri Yekova ni bakerehe gbe.​—1 Petero 3:1-6.

GUPAI RENGBE MO KA MANGAHA:

• Mo sana diaro watadu kumbamo tipa gupai rengbe mo ka mangaha tipa ka ngba berewe funi gbe. Mo degeturo wenengai sa gupai ní nika pehe, na mo ki asadi ka manga gupai ní nagumbaha

• Mo du na zerangbaduse. Si nika dia bete regbo adia mo kini ka ino wai wenengai rengbe mo ka sa ngbarago ti gamo badiarogatise

2 MO NIBERẼPA GAMO BADIAROGATISE WENENGAI

GUPAI ZIAZIA KEKEAPAI AGUMBAHA: Si naida mo niberẽpa agu apai ngba ti diaro watadu kumbamo. (AFiripoio 2:3, 4) Mo nimangi gamo badiarogatise ni gu boro pani naima nyaka foro gbe, kini tingidi gupai nga Yekova nakpinyemu gupai be gako amoyambu nga i du ‘ni bayee yo fu aboro dũ.’ (2 Timoteo 2:24) “Gu boro kina ho nagba sa fugo wa kina baso sa rũ he, ono mirã iratatamana nafu husa.” Sidu, oni nifura ni tatamana. (Asanza 12:18) Ga Yekova toro rengbe arengba ka undo roni oni nifura ni weneringise na nyemuse.​—AGaratio 5:22, 23; AKorosaio 4:6.

GUPAI RENGBE MO KA MANGAHA:

• Mo kpari fu Mbori tipa ko undo ro mo du na zezeredi ngbaduse ho oni aida ka fura ni riipa tagbagaapai

• Mo berẽ wenengai kurii gupai mo nika gumbaha na wai mo nika gumbaha

3 KA MO BERẼNGA KINA PA TIRO YA

GUPAI ZIAZIA KEKEAPAI AGUMBAHA: Ho mo amanga rogatise ni, mo na gamo badiarogatise nada ni “boro sa.” (Matayo 19:5) Ono wa vura duhe wo, gaoni aberã rengbe arengba kadu ni kparakakparakaha. Sidu, si naida oni wiriki wai kadu na berã sa na bipai sa. (AFiripoio 2:2) Kodatise nga nyanyakipa pai ho oni amanga diaberã ni tipa pai. Ziazia Kekeapai naya: “Berã pa mbakadapai dunduko du ni nyakasinyakasi he be kina rugapai.” (Asanza 20:18) Oni sa sangba Ziazia Kekeapai si undo roni oni nimangi adiaberã sa.​—Asanza 8:32, 33.

GUPAI RENGBE MO KA MANGAHA:

• Mo nigumba agu apai fu gamo badiarogatise namanga, na agu apai du berãro yo, gbiati wai du kpotoroyo tipa apai

• Mo fura na gamo badiarogatise mbata fu mo mangi diaberã